Viral News: సీబీఎస్‌ఈ హిస్టరీ పేపర్‌ క్యూఆర్ కోడ్ స్కాన్ చేస్తే షాకింగ్ రిజల్ట్.. సోషల్ మీడియాలో వైరల్!

CBSE history paper QR code leads to Orry: సాధారణంగా పరీక్షా పత్రాల పంపిణీలో అత్యంత కట్టుదిట్టమైన భద్రత పాటించే సీబీఎస్‌ఈ (CBSE) బోర్డు పరీక్షల్లో ఈ మధ్య కొన్ని వింత సంఘటనలు చోటుచేసుకుంటున్నాయి. తాజాగా మార్చి 30న జరిగిన 12వ తరగతి హిస్టరీ (చరిత్ర) పరీక్ష పత్రంలోని క్యూఆర్ కోడ్ (QR Code) ఇప్పుడు ఇంటర్నెట్‌లో హాట్ టాపిక్‌గా మారింది. ఆ కోడ్‌ను స్కాన్ చేసిన విద్యార్థులకు ఊహించని ఫలితం రావడమే ఇందుకు కారణం.

అసలేం జరిగింది?

పరీక్షా పత్రాల ప్రామాణికతను తనిఖీ చేయడానికి బోర్డు క్యూఆర్ కోడ్‌లను ముద్రిస్తుంది. అయితే, హిస్టరీ ఎగ్జామ్ సెట్-1 మరియు సెట్-3 పేపర్లలో ఉన్న కోడ్‌ను స్కాన్ చేయగా.. ప్రముఖ సోషల్ మీడియా సెలబ్రిటీ ఓర్హాన్ అవత్రామణి (ఓరీ) కి సంబంధించిన గూగుల్ సెర్చ్ పేజీ ప్రత్యక్షమైంది. దీంతో పరీక్షల ఒత్తిడిలో ఉన్న విద్యార్థులు ఒక్కసారిగా ఆశ్చర్యానికి గురయ్యారు.

ఓరీ ఆసక్తికర స్పందన:

ఈ విషయం సోషల్ మీడియాలో వైరల్ కావడంతో ఓరీ స్వయంగా తన ఇన్‌స్టాగ్రామ్ స్టోరీలో స్పందించారు. "నేను ఇండియన్ హిస్టరీలో భాగమయ్యాను. ఇది నాకు దక్కిన గొప్ప గౌరవం. సీబీఎస్‌ఈ పేపర్ ఇప్పుడు సరికొత్త ‘ఫుల్‌ఝడి’ ప్యాకెట్ లాంటిది" అంటూ తనదైన శైలిలో సరదాగా వ్యాఖ్యానించారు.

గతంలో ‘రిక్ రోల్’ ప్రాంక్:

సీబీఎస్‌ఈ బోర్డు పరీక్షల్లో ఇలాంటి వింతలు జరగడం ఇది మొదటిసారి కాదు.

మార్చి 9న: గణితం (Maths) పేపర్‌పై ఉన్న క్యూఆర్ కోడ్‌ను స్కాన్ చేస్తే.. ప్రఖ్యాత సింగర్ రిక్ ఆస్ట్లీ పాడిన “నెవర్ గన్నా గివ్ యు అప్” అనే వీడియో ప్లే అయ్యింది. ఇంటర్నెట్ పరిభాషలో దీనిని ‘రిక్ రోల్’ (Rickroll) ప్రాంక్ అని పిలుస్తారు.

బోర్డు వివరణ: అప్పట్లో ఈ అంశంపై బోర్డు స్పందిస్తూ.. ఆ కోడ్‌లు కేవలం అంతర్గత భద్రత మరియు ట్రాకింగ్ కోసం మాత్రమేనని, విద్యార్థులు వాటిలోని కంటెంట్‌ను పట్టించుకోవాల్సిన అవసరం లేదని స్పష్టం చేసింది.

ఏది ఏమైనా, సీరియస్‌గా సాగే బోర్డు పరీక్షల మధ్య ఇలాంటి సరదా సంఘటనలు విద్యార్థులలో చర్చనీయాంశంగా మారుతున్నాయి.