POCSO Case : భర్త వికృత చేష్టలతో ఇల్లు వదిలిన భార్య.. కన్న కూతురిపైనే తండ్రి రాక్షసత్వం.!

POCSO Case : గుజరాత్‌లోని గాంధీనగర్ జిల్లాలో మానవత్వం తలదించుకునే అత్యంత హేయమైన ఘటన వెలుగులోకి వచ్చింది. స్నేహితురాలి పట్ల అసభ్యకరంగా ప్రవర్తించిన భర్త తీరు పట్ల రోత పుట్టి ఇల్లు వదిలివెళ్లిన భార్యపై కక్ష పెంచుకున్న ఒక తండ్రి, పసిపాప అని కూడా చూడకుండా తన నాలుగేళ్ల కన్నకూతురిపైనే అత్యాచారానికి ఒడిగట్టాడు. ఈ ఘాతుకానికి పాల్పడిన 32 ఏళ్ల నిందితుడిని పోలీసులు పోక్సో (POCSO) చట్టం కింద అరెస్ట్ చేశారు.

గొడవకు దారితీసిన భర్త వికృత చేష్టలు

పోలీసులు వెల్లడించిన వివరాల ప్రకారం.. నిందితుడి భార్యకు చెందిన ఒక స్నేహితురాలు కొంతకాలంగా వారి ఇంట్లోనే తాత్కాలికంగా నివాసముంటోంది. ఈ క్రమంలో ఆమె పట్ల నిందితుడు నిరంతరం అసభ్యకరంగా ప్రవర్తించడమే కాకుండా, ఇంట్లో ఎవరూ లేని సమయం చూసి ఆమెను వేధింపులకు గురిచేసి, లొంగదీసుకోవడానికి ప్రయత్నించాడు. ఈ విషయాన్ని ఆ బాధితురాలు తన స్నేహితురాలైన నిందితుడి భార్యకు తెలిపింది. దీంతో దంపతుల మధ్య తీవ్రస్థాయిలో గొడవ చెలరేగింది. భర్త ప్రవర్తనపై తీవ్ర అసహ్యానికి, మనస్తాపానికి గురైన భార్య.. తన నాలుగేళ్ల కుమార్తె, రెండేళ్ల కుమారుడిని తీసుకుని గాంధీనగర్‌లోనే ఉన్న తన పుట్టింటికి వెళ్లిపోయింది.

కన్నతండ్రే కదా అని నమ్మితే.. పాపను తీసుకెళ్లి ఘాతుకం

భార్య పుట్టింటికి వెళ్లిన కొద్దిరోజుల తర్వాత నిందితుడు అత్తగారింటికి వెళ్లాడు. అక్కడ భార్య కుటుంబ సభ్యులతో గొడవపడి, పిల్లల్లో ఒకరిని తనతో పాటు పంపాలని తీవ్ర ఒత్తిడి తెచ్చాడు. మొదట వారు అతడి నైజం తెలిసి పంపడానికి నిరాకరించినప్పటికీ, చివరకు కన్నతండ్రే కదా అన్న భావనతో నాలుగేళ్ల కుమార్తెను అతనితో పాటు పంపించేందుకు అంగీకరించారు.

ఆ రాత్రి పాపను ఇంటికి తీసుకెళ్లిన నిందితుడు, చిన్నారి తన పక్కన నిద్రపోతున్న సమయంలో ఆమెపై లైంగిక దాడికి ఒడిగట్టాడు. తీవ్రమైన నొప్పితో చిన్నారి గట్టిగా రోదిస్తూ కలవరపడటంతో నిందితుడు తన వికృత చర్యను ఆపివేశాడు.

స్నానం చేయిస్తుండగా వెలుగులోకి వచ్చిన ఉదంతం..

మరుసటి రోజు ఉదయం చిన్నారిని బాత్‌రూమ్‌కు తీసుకెళ్లి స్నానం చేయిస్తున్న సమయంలో, ఆమె మేనత్త పాప శరీరంలో తీవ్ర రక్తస్రావం జరుగుతుండటాన్ని గమనించింది. వెంటనే అనుమానం వచ్చి కుటుంబ సభ్యులకు సమాచారం అందించింది. పరుగెత్తుకుంటూ వచ్చిన తల్లి, చిన్నారిని ప్రశ్నించగా రాత్రి జరిగిన ఘోరాన్ని చెప్పడంతో వెంటనే గాంధీనగర్ సివిల్ ఆసుపత్రికి తరలించారు. అక్కడ పాపను పరీక్షించిన వైద్యులు, ఆమెపై తీవ్రస్థాయిలో లైంగిక దాడి జరిగినట్లు ధ్రువీకరించారు.

కొన్ని గంటల్లోనే నిందితుడి అరెస్ట్

వైద్యుల నివేదిక ఆధారంగా బాధిత తల్లి స్థానిక పోలీసు స్టేషన్‌లో భర్తపై ఫిర్యాదు చేసింది. ఘటన తీవ్రతను గుర్తించిన పోలీసులు తక్షణమే రంగంలోకి దిగి, పోక్సో చట్టంతో పాటు భారతీయ న్యాయ సంహిత (BJS)లోని పలు తీవ్రమైన సెక్షన్ల కింద కేసు నమోదు చేశారు. ఫిర్యాదు అందిన కొన్ని గంటల వ్యవధిలోనే దారుణానికి ఒడిగట్టిన కన్నతండ్రిని పోలీసులు అరెస్ట్ చేసి రిమాండ్‌కు తరలించారు. ఈ ఘటన స్థానికంగా తీవ్ర దిగ్భ్రాంతిని, ఆగ్రహజ్వాలలను రేకెత్తించింది.