Legal Rights: తండ్రి వీలునామా రాయకుండా చనిపోతే ఆస్తి ఎవరికి చెందుతుంది.. వివరాలు ఇవిగో.!

Legal Rights: ఆస్తి పంపకాలు అనగానే మన సమాజంలో అనేక వివాదాలు, కుటుంబ గొడవలు తెరపైకి వస్తాయి. ఒక వ్యక్తి తాను బ్రతికున్నప్పుడే తన ఆస్తి ఎవరికి చెందాలో స్పష్టంగా వీలునామా రాస్తే ఎవరికీ ఎలాంటి సమస్యలు రావు. కానీ, చాలా సందర్భాల్లో పెద్దలు వీలునామా రాయకుండానే హఠాత్తుగా మరణిస్తుంటారు. ఇలాంటి పరిస్థితుల్లో ఆస్తి ఎవరికి చెందుతుంది అన్నది పెద్ద ప్రశ్న. అడ్వకేట్ రాధిక ఓ ఇంటర్వ్యూలో పంచుకున్న వివరాల ప్రకారం, ఒక వ్యక్తి వీలునామా రాయకుండా చనిపోతే, మన దేశ చట్టాల ప్రకారం ఆ ఆస్తి ఎలా పంపకం జరుగుతుందో స్పష్టంగా తెలుసుకుందాం.

హిందూ వారసత్వ చట్టం ప్రకారం, ఒక వ్యక్తి వీలునామా రాయకుండా మరణిస్తే, అతని ఆస్తి మొదటి శ్రేణి వారసులకు సమానంగా పంచుతారు. ఈ మొదటి శ్రేణి వారసులలో మరణించిన వ్యక్తి భార్య, కుమారులు, అలాగే కుమార్తెలు ఉంటారు. వీరందరికీ ఆస్తిలో సమాన వాటా ఉంటుంది. తల్లిదండ్రుల ఆస్తిలో ఆడపిల్లలకు హక్కు లేదని గతంలో ఒక అపోహ ఉండేది. కానీ 2005లో వచ్చిన చట్ట సవరణ తర్వాత, మగపిల్లలతో పాటు సమానంగా ఆడపిల్లలకు కూడా తండ్రి ఆస్తిలో పూర్తి హక్కు లభించింది. పెళ్లయినా, కాకపోయినా కూతురికి కచ్చితంగా ఆస్తిలో సమాన వాటా చెందుతుంది.

వీలునామాకు సంబంధించిన మరో ముఖ్య విషయం ఏంటంటే, ఒక వ్యక్తి తాను కష్టపడి సంపాదించిన సొంత ఆస్తిని ఎవరికైనా ఇష్టమొచ్చిన వారికి వీలునామా రాసి ఇచ్చే పూర్తి హక్కు ఉంటుంది. దాన్ని పిల్లలు ప్రశ్నించలేరు. కానీ, అది వంశపారంపర్యంగా వచ్చిన పిత్రార్జితం అయితే మాత్రం, ఆ వ్యక్తి తన ఇష్టానుసారం మొత్తం ఆస్తిని ఎవరికో ఒకరికి వీలునామా రాయడానికి చట్టం అంగీకరించదు. పిత్రార్జితంలో పుట్టిన ప్రతి బిడ్డకు జన్మతః సమాన హక్కు ఉంటుంది. కాబట్టి అందులో కేవలం తన వాటాకు వచ్చిన భాగాన్ని మాత్రమే వీలునామాగా రాసే అధికారం ఆ వ్యక్తికి ఉంటుంది.

అలాగే ఒకసారి వీలునామా రాసిన తర్వాత దాన్ని మార్చలేమని చాలామంది అనుకుంటారు. కానీ వ్యక్తి బ్రతికున్నంత కాలం తన వీలునామాను ఎన్నిసార్లైనా మార్చుకునే అవకాశం చట్టం కల్పించింది. ఏది చివరగా రాసి రిజిస్టర్ చేయబడిందో, ఆ డాక్యుమెంట్ మాత్రమే చెల్లుబాటు అవుతుంది. కాబట్టి కుటుంబంలో ఆస్తి తగాదాలు రాకుండా ఉండాలంటే, ముందు జాగ్రత్తగా ఒక స్పష్టమైన వీలునామా రాయడం ఎంతో ముఖ్యం.