Tata CEO: ఎవరి ఈ టీవీ నరేంద్రన్..టాటా సన్స్ ఛైర్మన్ రేసులోకి ఎలా వచ్చారు..?

Tata CEO: టాటా గ్రూప్‌లో మళ్లీ నాయకత్వ మార్పుల కలకలం మొదలైంది. టాటా సన్స్ ప్రస్తుత ఛైర్మన్ నటరాజన్ చంద్రశేఖరన్ తన పదవి నుంచి వైదొలుగుతున్నట్లు ప్రకటించడంతో కార్పొరేట్ దిగ్గజ ప్రపంచంలో ఒక్కసారిగా తీవ్ర ఉత్కంఠ నెలకొంది. వచ్చే ఏడాది ఫిబ్రవరితో ఆయన పదవీ కాలం ముగియనుండటంతో, తదుపరి బాధ్యతలను ఎవరికి అప్పగించాలనే దానిపై టాటా గ్రూప్ సరికొత్త ఎంపిక కమిటీని ఏర్పాటు చేసేందుకు వేగంగా పావులు కదుపుతోంది. ఈ రేసులో పలువురు ప్రముఖుల పేర్లు వినిపిస్తున్నప్పటికీ, అందరి దృష్టిని ఆకర్షిస్తున్న పేరు టీవీ నరేంద్రన్. 61 ఏళ్ల టీవీ నరేంద్రన్ ప్రస్తుతం టాటా స్టీల్ విభాగానికి సీఈఓ, మేనేజింగ్ డైరెక్టర్‌గా బాధ్యతలు నిర్వర్తిస్తున్నారు.

ఎన్ఐటీ తిరుచి నుంచి ఇంజినీరింగ్ పట్టా పొందిన ఆయన, ప్రతిష్టాత్మక ఐఐఎం కలకత్తా నుంచి మేనేజ్‌మెంట్ గ్రాడ్యుయేషన్ పూర్తి చేశారు. 1988లో సాధారణ ఉద్యోగిగా టాటా గ్రూప్‌లో చేరిన నరేంద్రన్, దాదాపు 37 ఏళ్లకు పైగా ఈ సంస్థతోనే కొనసాగుతున్నారు. సేల్స్, మార్కెటింగ్, ఇంటర్నేషనల్ బిజినెస్ విభాగాల్లో పనిచేసిన ఆయన, ఆగ్నేయాసియా మార్కెట్లలో టాటా స్టీల్ జెండా ఎగురవేయడంలో ప్రధాన పాత్ర పోషించారు. 2013లో టాటా స్టీల్ ఎండీగా, ఆ తర్వాత సీఈఓగా పదోన్నతి పొందారు.

ఛైర్మన్ రేసులో నోయల్ టాటా, సౌరభ్ అగర్వాల్ పేర్లు కూడా బలంగా వినిపిస్తున్నప్పటికీ, గ్రూప్‌లో సుదీర్ఘ అనుభవం, సంక్షోభాలను తట్టుకునే సత్తా ఉన్న నరేంద్రన్ వైపే యాజమాన్యం మొగ్గు చూపే అవకాశం ఉందని కార్పొరేట్ వర్గాలు భావిస్తున్నాయి. టాటా సన్స్ పగ్గాలు చేపట్టబోయే కొత్త నాయకుడికి పూలబాట ఏమీ పరిచి లేదు. ముఖ్యంగా భారీ నష్టాల్లో కూరుకుపోయిన మూడు కీలక విభాగాలను గట్టెక్కించడమే ఆయన ముందున్న అతిపెద్ద సవాలు.

2025-26 ఆర్థిక సంవత్సరంలో ఎయిరిండియా ఏకంగా రూ. 22,238 కోట్ల నష్టాలను చవిచూసింది. అహ్మదాబాద్ విమాన ప్రమాదం, పశ్చిమాసియా ప్రాంతంలో ఊహించని యుద్ధ వాతావరణం వంటి ప్రతికూల పరిస్థితులు సంస్థను తీవ్రంగా దెబ్బతీశాయి. ఈ విమానయాన సంస్థను మళ్లీ లాభాల బాట పట్టించడం కొత్త ఛైర్మన్‌కు అగ్నిపరీక్షే.

డిజిటల్ విప్లవంలో దూసుకుపోవాలని తెచ్చిన 'టాటా న్యూ' యాప్ మార్కెట్లో ఆశించిన స్థాయిలో ఆకట్టుకోలేకపోయింది. పోటీ సంస్థల వేగానికి తట్టుకోలేక టాటా డిజిటల్ నష్టాలు దాదాపు రూ. 5,000 కోట్లకు చేరాయి. అంతేకాక, బిగ్ బాస్కెట్ 10-మినిట్ డెలివరీ వ్యూహం ఆలస్యం కావడం కూడా పెద్ద దెబ్బ కొట్టింది. భవిష్యత్తు సాంకేతిక పరిజ్ఞానంపై భారీగా పెట్టుబడులు పెడుతున్న టాటా ఎలక్ట్రానిక్స్ విభాగం కూడా ప్రస్తుతం నష్టాల్లోనే కొనసాగుతోంది. నాణ్యత, ఉత్పత్తి సామర్థ్యం పెంచి సంస్థను నిలబెట్టాల్సి ఉంది.

వందల ఏళ్ల నమ్మకానికి మారుపేరైన టాటా గ్రూప్‌ను నష్టాల సుడిగుండాల నుంచి గట్టెక్కించి, మళ్లీ ప్రగతి పథంలోకి నడిపించే సత్తా ఎవరికి ఉందనేది ఇప్పుడు మిలియన్ డాలర్ల ప్రశ్న. ఫిబ్రవరి నాటికి కొత్త ఛైర్మన్ ఎవరనేది తేలనుండగా, ఒకవేళ టీవీ నరేంద్రన్ ఈ సింహాసనాన్ని అధిష్టిస్తే.. ఈ సవాళ్లను ఆయన ఎలా ఎదుర్కొంటారో చూడటం ఆసక్తికరంగా మారనుంది.