Tata Sons: టాటా సన్స్‌కు ఆర్‌బీఐ షాక్.. లిస్టింగ్‌పై టాటా ట్రస్ట్స్ వర్సెస్ ఎస్‌పీ గ్రూప్

Tata Sons: భారత కార్పొరేట్ దిగ్గజం 'టాటా గ్రూప్' మాతృ సంస్థ 'టాటా సన్స్' చుట్టూ ఇప్పుడు అటు ఆర్థిక, ఇటు యాజమాన్య యుద్ధం తీవ్ర రూపం దాల్చింది. పబ్లిక్ లిస్టింగ్ నుంచి తప్పించుకోవడానికి టాటా సన్స్ వేసిన ప్లాన్‌కు భారతీయ రిజర్వ్ బ్యాంక్ గట్టి షాక్ ఇచ్చింది.

కోర్ ఇన్వెస్ట్‌మెంట్ కంపెనీ హోదా నుంచి మినహాయింపు కావాలంటూ టాటా సన్స్ చేసుకున్న వినతిని ఆర్‌బీఐ నిష్కర్షగా తిరస్కరించింది. చట్ట ప్రకారం మార్కెట్‌లో లిస్ట్ కావాల్సిందేనని ఆర్‌బీఐ స్పష్టం చేయడంతో, బాంబే హౌస్‌లో ఇప్పుడు పెద్ద ఎత్తున కలకలం రేగుతోంది.

2022లో ఆర్‌బీఐ టాటా సన్స్‌ను అగ్రశ్రేణి ఎన్బీఎఫ్‌సీగా వర్గీకరించి, పబ్లిక్ లిస్టింగ్ కోసం మూడేళ్ల సమయం ఇచ్చింది. అయితే, ఐపీఓ బాటను తప్పించుకునేందుకు టాటా సన్స్ తన వద్ద ఉన్న రుణాలను పూర్తిగా తీర్చేసి, సీఐసీగా తన రిజిస్ట్రేషన్‌ను రద్దు చేయాలని దరఖాస్తు చేసుకుంది.

కానీ ఆర్‌బీఐ మాత్రం నిబంధనలకు కట్టుబడి ఉంటూ ఆ దరఖాస్తును తోసిపుచ్చింది. నిబంధనల ప్రకారం నిర్దేశిత గడువులోగా కంపెనీ స్టాక్ మార్కెట్‌లో లిస్ట్ కావడం తప్పనిసరి అని తేల్చిచెప్పింది.

టాటా సన్స్ లిస్టింగ్ వ్యవహారం కేవలం ఒక ఆర్థిక ప్రక్రియ మాత్రమే కాదు. ఇది గ్రూప్‌లోని రెండు ప్రధాన భాగస్వాముల మధ్య ఉన్న సుదీర్ఘ విభేదాలను మళ్ళీ బయటపెట్టింది. టాటా సన్స్‌లో ఏకంగా 66 శాతం వాటా కలిగిన 'టాటా ట్రస్ట్స్' ఈ లిస్టింగ్‌ను తీవ్రంగా వ్యతిరేకిస్తోంది.

పబ్లిక్ లిస్టింగ్ వల్ల టాటా గ్రూప్ యొక్క సంప్రదాయ నిర్మాణం, వ్యాపార రహస్యాల పారదర్శకత, అలాగే దాతృత్వ లక్ష్యాలు దెబ్బతింటాయని ట్రస్ట్స్ సభ్యులు ఆందోళన చెందుతున్నారు. లిస్టింగ్‌ను అడ్డుకోవాలని గతేడాదే బోర్డు తీర్మానం కూడా ఆమోదించింది.

టాటా సన్స్‌లో దాదాపు 18.4 శాతం వాటా ఉన్న రెండో అతిపెద్ద భాగస్వామి షాపూర్జీ పల్లోంజీ గ్రూప్ మాత్రం లిస్టింగ్‌ను స్వాగతిస్తోంది. కంపెనీ మార్కెట్‌లోకి వస్తే, తమ వాటాలోని కొంత భాగాన్ని విక్రయించి భారీగా నిధులు సమీకరించుకునే అవకాశం ఎస్‌పీ గ్రూప్‌నకు లభిస్తుంది.

ఒకవైపు ఆర్‌బీఐ లిస్టింగ్ ఒత్తిడి, మరోవైపు వాటాదారుల పోరు నడుస్తుండగానే టాటా గ్రూప్‌లో మరో కీలక పరిణామం చోటుచేసుకుంది. టాటా సన్స్ ఛైర్మన్ ఎన్. చంద్రశేఖరన్ తన ప్రస్తుత పదవీకాలం ముగిసిన తర్వాత మూడోసారి బాధ్యతలు చేపట్టబోనని బోర్డుకు స్పష్టం చేశారు.

నాయకత్వ మార్పు ఖాయమైన సమయంలోనే ఆర్‌బీఐ ఇచ్చిన ఈ ఝలక్ టాటా సన్స్ భవిష్యత్తును అత్యంత ఆసక్తికరంగా మార్చింది. మార్కెట్ నిపుణుల విశ్లేషణ ప్రకారం...

లిస్టింగ్ వల్ల టాటా సన్స్‌లో పారదర్శకత పెరిగి పెట్టుబడుల సామర్థ్యం విస్తరిస్తుందని ఒక వర్గం భావిస్తుంటే, శతాబ్దాల నాటి సంప్రదాయ విధానాలకు గండిపడుతుందని మరొక వర్గం లబోదిబోమంటోంది. నిబంధనల ఆర్‌బీఐ నాటిన బాణానికి, టాటా గ్రూప్ తీసుకునే తదుపరి నిర్ణయం భారత కార్పొరేట్ చరిత్రలోనే ఒక కొత్త అధ్యాయానికి తెరలేపనుంది.