SSY: మీ కూతురు వివాహం స‌మ‌యానికి రూ. 70 ల‌క్ష‌లు కూడ‌బెట్టాలా? నెల‌కు ఎంత ప‌క్క‌న పెట్టాలంటే

SSY: సుకన్య సమృద్ధి ఖాతా ఎవరు తెరవవచ్చు.?

సుకన్య సమృద్ధి యోజన ప్రత్యేకంగా బాలికల కోసం రూపొందించిన ప్రభుత్వ పథకం. కూతురు పుట్టినప్పటి నుంచి ఆమెకు 10 సంవత్సరాలు పూర్తయ్యేలోపు తల్లిదండ్రులు లేదా చట్టబద్ధమైన సంరక్షకులు ఖాతా తెరవవచ్చు.

సాధారణంగా ఒక కుటుంబంలో గరిష్టంగా ఇద్దరు బాలికల పేరుతో ఖాతాలు తెరవడానికి అవకాశం ఉంటుంది. అయితే కవలలు లేదా ఒకేసారి ముగ్గురు పిల్లలు జన్మించిన ప్రత్యేక సందర్భాల్లో ఇద్దరి కంటే ఎక్కువ మందికి ఖాతాలు తెరవడానికి నిబంధనల ప్రకారం అవకాశం ఉంటుంది. ఈ పథకంలో పెట్టుబడికి ప్రభుత్వ భద్రత ఉండటం ప్రధాన ఆకర్షణగా చెప్పొచ్చు.

ఏడాదికి ఎంత పెట్టుబడి పెట్టాలి.? ఎన్ని సంవత్సరాలు చెల్లించాలి.?

ఈ పథకంలో తక్కువ మొత్తంతో కూడా పెట్టుబడి ప్రారంభించవచ్చు. ఒక ఆర్థిక సంవత్సరంలో కనీసం రూ.250 నుంచి పెట్టుబడి పెట్టే అవకాశం ఉంటుంది. గరిష్టంగా ఏడాదికి రూ.1.50 లక్షల వరకు జమ చేయవచ్చు.

మొత్తం డబ్బును ఒకేసారి చెల్లించాల్సిన అవసరం లేదు. పెట్టుబడిదారుల సౌకర్యాన్ని బట్టి విడతల వారీగా కూడా జమ చేయవచ్చు.

గుర్తుంచుకోవాల్సిన విష‌యాలు

ఖాతా తెరిచిన తేదీ నుంచి 15 సంవత్సరాల వరకు మాత్రమే డబ్బు జమ చేయాలి. ఖాతా మొత్తం మెచ్యూరిటీ కాలం 21 సంవత్సరాలు. 15 ఏళ్ల తర్వాత కొత్తగా పెట్టుబడి పెట్టాల్సిన అవసరం ఉండదు. మిగిలిన 6 సంవత్సరాల పాటు ఇప్పటికే ఉన్న మొత్తానికి వడ్డీ కొనసాగుతుంది. అంటే 15 సంవత్సరాలు పెట్టుబడి పెట్టి ఆ తర్వాత కూడా మరో 6 సంవత్సరాలు చక్రవడ్డీ ప్రయోజనం పొందే అవకాశం ఉంటుంది.

వడ్డీ రేటు, పన్ను ప్రయోజనాలు ఏంటి.?

సుకన్య సమృద్ధి యోజనపై ప్రభుత్వం కాలానుగుణంగా వడ్డీ రేటును సమీక్షిస్తుంది. ప్రస్తుతం ఈ పథకానికి 8.20 శాతం వార్షిక వడ్డీ రేటు వర్తిస్తోంది. అయితే భవిష్యత్తులో ప్రభుత్వం వడ్డీ రేటును మార్చే అవకాశం ఉంటుంది.

ఈ పథకానికి పన్ను పరంగా కూడా మంచి ప్రయోజనాలు ఉన్నాయి. ఇది సాధారణంగా EEE (ఎక్సెంప్ట్‌- ఎక్సెంప్ట్‌-ఎక్సెంప్ట్‌) ప్రయోజనాలతో కూడిన పథకంగా గుర్తింపు పొందింది. అంటే.. పెట్టుబడి చేసిన మొత్తంపై ఆదాయపు పన్ను చట్టంలోని సెక్షన్ 80C కింద నిబంధనలకు లోబడి పన్ను మినహాయింపు పొందవచ్చు. ఖాతాలో వచ్చే వడ్డీపై పన్ను ఉండదు. మెచ్యూరిటీ సమయంలో వచ్చే మొత్తంపై కూడా పన్ను మినహాయింపు ఉంటుంది. అయితే పన్ను ప్రయోజనాలు వ్యక్తిగత ఆదాయపు పన్ను విధానం, నిబంధనలపై ఆధారపడి ఉంటాయి.

రూ.1.5 లక్షలు పెట్టుబడి పెడితే రూ.70 లక్షలు ఎలా వస్తాయి.?

సుకన్య సమృద్ధి యోజనలో ప్రతి సంవత్సరం గరిష్టంగా రూ.1.50 లక్షలు పెట్టుబడి పెడుతున్నార‌ని అనుకుందాం. ఇలా వరుసగా 15 సంవత్సరాల పాటు పెట్టుబడి పెడితే.. మొత్తం పెట్టుబ‌డి రూ.22,50,000 అవుతుంది. 15 సంవత్సరాల తర్వాత కొత్తగా డబ్బు జమ చేయాల్సిన అవసరం ఉండదు. అయితే ఖాతా మెచ్యూరిటీ అయ్యే వరకు మరో 6 సంవత్సరాల పాటు ఇప్పటికే ఉన్న మొత్తంపై చక్రవడ్డీ కొనసాగుతుంది. ప్రస్తుతం ఉన్న 8.20 శాతం వడ్డీ రేటు దీర్ఘకాలం కొనసాగుతుందని అంచనా వేసి లెక్కిస్తే, 21 సంవత్సరాల తర్వాత మెచ్యూరిటీ సమయంలో సుమారు రూ.70 లక్షలకు పైగా ఫండ్ సమకూరే అవకాశం ఉంది.

అయితే ఇక్కడ ఒక విషయం గుర్తుంచుకోవాలి. సుకన్య సమృద్ధి యోజన వడ్డీ రేటును ప్రభుత్వం ప్రతి త్రైమాసికానికి సమీక్షించే అవకాశం ఉంది. కాబట్టి 21 సంవత్సరాల తర్వాత వచ్చే తుది మెచ్యూరిటీ మొత్తం భవిష్యత్తులో అమలయ్యే వడ్డీ రేట్లపై ఆధారపడి మారవచ్చు. చిన్న మొత్తాలతో ప్రారంభించి క్రమం తప్పకుండా పెట్టుబడి పెడితే కూతురి భవిష్యత్తు కోసం పెద్ద ఆర్థిక భద్రతను సృష్టించుకోవడానికి సుకన్య సమృద్ధి యోజన ఉపయోగపడుతుంది.