Savings Account: సేవింగ్స్ అకౌంట్‌లో ఉన్న డ‌బ్బుకు.. ఫిక్స్‌డ్ డిపాజిట్ వ‌డ్డీ పొందొచ్చ‌ని తెలుసా.?

Savings Account: చాలా మంది తమ డబ్బును సేవింగ్స్ బ్యాంక్ అకౌంట్‌లోనే ఉంచుతుంటారు. అయితే సేవింగ్స్ అకౌంట్‌పై సాధారణంగా తక్కువ వడ్డీ మాత్రమే లభిస్తుంది. కానీ మీ అకౌంట్‌లో ఎక్కువ మొత్తం నిల్వ ఉంటే, ఆటో స్వీప్ అనే బ్యాంకింగ్ సదుపాయాన్ని యాక్టివేట్ చేయించడం ద్వారా అదే డబ్బుపై ఫిక్స్‌డ్ డిపాజిట్‌కు సమానమైన వడ్డీ పొందవచ్చని మీకు తెలుసా?

ఆటో స్వీప్ ఫెసిలిటీ అంటే ఏంటి?

ఆటో స్వీప్ అనేది బ్యాంకులు అందించే ప్రత్యేక సేవ. ఇందులో మీ సేవింగ్స్ అకౌంట్‌లో ఒక నిర్దిష్ట పరిమితికి మించి డబ్బు జమ అయితే, అదనపు మొత్తాన్ని బ్యాంక్ ఆటోమేటిక్‌గా ఫిక్స్‌డ్ డిపాజిట్‌గా మారుస్తుంది. దీంతో ఆ అదనపు మొత్తంపై సేవింగ్స్ అకౌంట్ వడ్డీ కాకుండా, అప్పటి ఎఫ్‌డీ వడ్డీ రేటు ప్రకారం వడ్డీ లభిస్తుంది. దీంతో మీ డబ్బు అలాగే అకౌంట్‌లో ఉండి కూడా ఎక్కువ రాబడిని అందిస్తుంది.

ఈ సదుపాయం ఎలా పనిచేస్తుంది?

ఆటో స్వీప్ ఫెసిలిటీ తీసుకునే సమయంలో బ్యాంక్ మీతో కలిసి ఒక కనీస బ్యాలెన్స్ లేదా స్వీప్ లిమిట్‌ను నిర్ణయిస్తుంది. ఉదాహరణకు, మీరు రూ.25,000ను స్వీప్ లిమిట్‌గా నిర్ణయించుకున్నారని అనుకుందాం. మీ సేవింగ్స్ అకౌంట్‌లో రూ.60,000 ఉంటే, అందులో రూ.25,000 సేవింగ్స్ అకౌంట్‌లోనే ఉంటుంది. మిగిలిన రూ.35,000 ఆటోమేటిక్‌గా ఎఫ్‌డీగా మారుతుంది. ఆ రూ.35,000పై బ్యాంక్ అమల్లో ఉన్న ఫిక్స్‌డ్ డిపాజిట్ వడ్డీ రేటు వర్తిస్తుంది. అవసరమైనప్పుడు డబ్బు ఉపయోగించుకునే సౌలభ్యం కూడా కొనసాగుతుంది.

ఆటో స్వీప్ ఫెసిలిటీ వల్ల కలిగే ప్రయోజనాలు

ఈ సదుపాయం ద్వారా అదనంగా ఉన్న డబ్బుపై ఎఫ్‌డీ స్థాయి వడ్డీ లభిస్తుంది. అలాగే సేవింగ్స్ అకౌంట్‌లో రోజువారీ లావాదేవీల కోసం అవసరమైన కనీస మొత్తం అందుబాటులోనే ఉంటుంది. ఎఫ్‌డీని విడిగా ఓపెన్ చేయాల్సిన అవసరం ఉండదు. మొత్తం ప్రక్రియ ఆటోమేటిక్‌గా జరిగిపోతుంది కాబట్టి సమయం, శ్రమ రెండూ ఆదా అవుతాయి. దీర్ఘకాలంలో చూస్తే మీ పొదుపుపై మరింత ఎక్కువ రాబడి పొందే అవకాశం ఉంటుంది.

ఈ ఫెసిలిటీ ఎలా యాక్టివేట్ చేయాలి?

మీకు ప్రభుత్వ లేదా ప్రైవేట్ బ్యాంకులో సేవింగ్స్ అకౌంట్ ఉంటే, ముందుగా మీ బ్యాంక్‌లో ఆటో స్వీప్ ఫెసిలిటీ అందుబాటులో ఉందో లేదో తెలుసుకోండి. ఈ సేవను బ్యాంక్ బ్రాంచ్‌లో దరఖాస్తు చేసి లేదా కొన్ని బ్యాంకుల్లో ఇంటర్నెట్ బ్యాంకింగ్, మొబైల్ బ్యాంకింగ్ ద్వారా కూడా యాక్టివేట్ చేసుకోవచ్చు. ఒకసారి ఈ సదుపాయాన్ని ప్రారంభిస్తే, మీ సేవింగ్స్ అకౌంట్‌లో ఉన్న అదనపు మొత్తంపై ఆటోమెటిక్‌గా ఎఫ్‌డీ వడ్డీ లభిస్తుంది.

ఈ సదుపాయం ఎవరు ఉపయోగించుకోవచ్చు.?

ప్రతి నెల జీతం వచ్చిన తర్వాత సేవింగ్స్ అకౌంట్‌లో ఎక్కువ‌ మొత్తం ఉంచేవారు, వ్యాపార లావాదేవీల కోసం ఎక్కువ నగదు అకౌంట్‌లో ఉంచేవారు లేదా అత్యవసర నిధిని సేవింగ్స్ అకౌంట్‌లోనే స్టోర్‌ చేసే వారు ఆటో స్వీప్ ఫెసిలిటీ ఉప‌యోగ‌ప‌డుతుంది. డబ్బు ఎప్పుడైనా అవసరమైనప్పుడు అందుబాటులో ఉండటంతో పాటు, అదనపు మొత్తంపై ఎక్కువ వడ్డీ కూడా పొందే అవకాశం ఉండటంతో ఇది ఇన్వెస్ట‌ర్ల‌కు ఉపయోగకరమైన బ్యాంకింగ్ సేవగా చెప్పవచ్చు.