PPF: కొత్త‌గా ఉద్యోగంలో చేరారా? ఈరోజు నుంచే ఇలా చేస్తే రిటైర్మెంట్ నాటికి కోటి రూపాయ‌లు మీ సొంతం

PPF: ప్రస్తుతం చాలా మంది భవిష్యత్ ఆర్థిక భద్రత కోసం సురక్షిత పెట్టుబడి మార్గాలను వెతుకుతున్నారు. అలాంటి వాటిలో పబ్లిక్ ప్రావిడెంట్ ఫండ్ (PPF) ఒకటి. ఇది కేంద్ర ప్రభుత్వ ఆధ్వర్యంలో నడిచే దీర్ఘకాలిక సేవింగ్ స్కీమ్ కావడంతో రిస్క్ లేకుండా స్థిరమైన రాబడి కోరుకునే వారికి మంచి ఆప్ష‌న్‌గా చెప్పొచ్చు.

PPF అంటే ఏమిటి.. ఎంత వడ్డీ లభిస్తుంది?

పబ్లిక్ ప్రావిడెంట్ ఫండ్‌కు ప్రస్తుతం సంవత్సరానికి 7.1 శాతం వడ్డీ లభిస్తోంది. ఈ వడ్డీ ప్రతి ఏడాది కంపౌండ్ అవుతూ పెట్టుబడిని మరింత వేగంగా పెంచుతుంది. కేంద్ర ప్రభుత్వం ప్రతి మూడు నెలలకు ఒకసారి వడ్డీ రేట్లను సమీక్షిస్తుంది. PPF ఖాతాకు 15 సంవత్సరాల లాక్-ఇన్ పీరియడ్ ఉంటుంది. అయితే మెచ్యూరిటీ పూర్తైన తర్వాత మరో ఐదు సంవత్సరాల చొప్పున ఖాతాను పొడిగించుకునే అవకాశం కూడా ఉంది. ఒక ఆర్థిక సంవత్సరంలో కనీసం రూ.500 నుంచి గరిష్టంగా రూ.1.5 లక్షల వరకు పెట్టుబడి పెట్టవచ్చు.

25 ఏళ్ల నుంచే ప్రారంభిస్తే భారీ ఫండ్

ఒక వ్యక్తి 25 ఏళ్ల వయసులో ప్రతి సంవత్సరం రూ.1.5 లక్షలు PPFలో పెట్టుబడి పెట్టడం ప్రారంభిస్తే, 60 ఏళ్ల వయసు వచ్చే సరికి భారీ ట్యాక్స్ ఫ్రీ ఫండ్ సిద్ధమవుతుంది. ప్రస్తుతం ఉన్న 7.1 శాతం వడ్డీ రేటు ప్రకారం 35 సంవత్సరాల పాటు క్రమం తప్పకుండా పెట్టుబడి కొనసాగిస్తే మొత్తం రూ.52.5 లక్షలు పెట్టుబడిగా జమ అవుతాయి. అయితే కంపౌండింగ్ ప్రభావంతో దాదాపు రూ.1.74 కోట్ల వరకు వడ్డీ లభించే అవకాశం ఉంది. ఇలా మొత్తం ఫండ్ విలువ సుమారు రూ.2.26 కోట్లకు చేరుతుంది. దీర్ఘకాలంలో చిన్న మొత్తాలను క్రమంగా పెట్టుబడి పెడితే ఎంత పెద్ద మొత్తంగా మారుతుందో దీనితో అర్థమవుతుంది.

40, 50 ఏళ్ల వయసులో ఎంత మొత్తం వస్తుంది?

PPFలో క్రమం తప్పకుండా పెట్టుబడి పెడితే మధ్యలోనే మంచి ఫండ్ సిద్ధమవుతుంది. ఉదాహరణకు 25 ఏళ్ల వయసులో ప్రారంభించి 15 సంవత్సరాల పాటు పెట్టుబడి పెడితే, అంటే 40 ఏళ్ల వయసు వచ్చే సమయానికి మొత్తం రూ.22.5 లక్షలు పెట్టుబడి పెట్టినట్లవుతుంది. అయితే వడ్డీతో కలిపి ఈ మొత్తం దాదాపు రూ.40.68 లక్షలకు చేరే అవకాశం ఉంది. అదే 25 సంవత్సరాల పాటు పెట్టుబడి కొనసాగిస్తే, అంటే 50 ఏళ్ల వయసు నాటికి మొత్తం పెట్టుబడి రూ.37.5 లక్షలు అవుతుంది. కానీ కంపౌండింగ్ కారణంగా మొత్తం ఫండ్ విలువ రూ.1.03 కోట్ల వరకు పెరిగే అవకాశం ఉంటుంది.

ప్రస్తుతం PPFలో పెట్టుబడి మంచిదేనా?

ఇటీవల RBI వడ్డీ రేట్ల తగ్గింపు తర్వాత బ్యాంక్ FDలపై లభించే రాబడులు తగ్గుముఖం పట్టాయి. ఈ పరిస్థితిలో PPFలో లభిస్తున్న 7.1 శాతం వడ్డీ మరింత ఆకర్షణీయంగా కనిపిస్తోంది. ముఖ్యంగా దీనిపై వచ్చే వడ్డీ పూర్తిగా ట్యాక్స్ ఫ్రీ కావడం పెట్టుబడిదారులకు పెద్ద ప్రయోజనం. 30 శాతం పన్ను శ్రేణిలో ఉన్న వ్యక్తులకు PPF ద్వారా వచ్చే రాబడి, సాధారణ FDలతో పోలిస్తే మరింత లాభదాయకంగా భావిస్తున్నారు. అందుకే ప్రస్తుతం సురక్షిత పెట్టుబడుల కోసం చూస్తున్నవారిలో PPFకు మంచి ఆదరణ పెరుగుతోంది.

రిటైర్మెంట్ ప్లానింగ్‌కు ఎందుకు బెస్ట్ ఆప్షన్?

PPFలో మార్కెట్ రిస్క్ ఉండదు. షేర్ మార్కెట్‌లా ఒడిదుడుకులు లేకుండా స్థిరమైన రాబడి లభించడం దీని ప్రధాన ప్రత్యేకత. ఈక్విటీ SIPలు దీర్ఘకాలంలో ఎక్కువ లాభాలు ఇవ్వొచ్చు కానీ వాటిలో రిస్క్ కూడా అధికంగా ఉంటుంది. PPF మాత్రం గ్యారంటీతో కూడిన రాబడిని అందిస్తుంది. రిటైర్మెంట్ తర్వాత ఆర్థిక భద్రత కోరుకునే వారికి ఇది నమ్మకమైన సేవింగ్ సాధనంగా మారింది. చిన్న వయసులోనే పెట్టుబడి ప్రారంభిస్తే భవిష్యత్‌లో పెద్ద ఆర్థిక భారం లేకుండా ప్రశాంతమైన జీవితం గడిపే అవకాశం ఉంటుంది.