Post Office: బ్యాంక్ ఎఫ్‌డీల కంటే ఎక్కువ వ‌డ్డీ.. పోస్టాఫీస్‌లో అధిక రాబ‌డి ఇచ్చే ఈ బెస్ట్ స్కీమ్స్ ఇవే

Post Office: ఈ రోజుల్లో సంపాదనతో పాటు పొదుపు కూడా ఎంతో ముఖ్యం. సాధారణంగా పెట్టుబడుల విషయంలో బ్యాంక్ ఫిక్స్‌డ్ డిపాజిట్లు (FDలు) సురక్షితమైన ఎంపికగా భావిస్తారు. అయితే ఇటీవల అనేక బ్యాంకులు FDలపై వడ్డీ రేట్లను తగ్గించడంతో పెట్టుబడిదారులు పోస్టాఫీస్ ప‌థ‌కాల‌వైపు ఆక‌ర్షితుల‌వుతున్నారు.

నేషనల్ సేవింగ్స్ సర్టిఫికేట్ (NSC) – భద్రతతో పాటు స్థిరమైన రాబడి

భద్రతకు ప్రాధాన్యం ఇచ్చే పెట్టుబడిదారులకు నేషనల్ సేవింగ్స్ సర్టిఫికేట్ (NSC) మంచి ఎంపికగా ప‌రిగ‌ణిస్తున్నారు. ప్రస్తుతం ఈ పథకంపై సంవత్సరానికి 7.7 శాతం వడ్డీ లభిస్తోంది. ఇందులో వచ్చే వడ్డీ ప్రతి సంవత్సరం కాంపౌండ్ అవుతూ పెట్టుబడి మొత్తాన్ని పెంచుతుంది. ఉదాహరణకు రూ.10,000 పెట్టుబడి పెడితే ఐదేళ్ల తర్వాత అది సుమారు రూ.14,490కు చేరుతుంది. ఈ పథకం కేంద్ర ప్రభుత్వం ఆధ్వర్యంలో నడుస్తుండటంతో పెట్టుబడి భద్రతపై ఎలాంటి సందేహం ఉండదు. అలాగే ఆదాయపు పన్ను చట్టంలోని సెక్షన్ 80C కింద రూ.1.5 లక్షల వరకు పన్ను మినహాయింపు ప్రయోజనం కూడా పొందవచ్చు. అయితే పెట్టుబడి చేసిన మొత్తం ఐదేళ్ల పాటు లాక్-ఇన్‌లో ఉంటుంది.

సుకన్య సమృద్ధి యోజన – కుమార్తె భవిష్యత్తుకు బలమైన భరోసా

కుమార్తెల భవిష్యత్తు కోసం ప్రభుత్వం తీసుకొచ్చిన అత్యంత ప్రజాదరణ పొందిన పథకాలలో సుకన్య సమృద్ధి యోజన ఒకటి. ప్రస్తుతం ఈ పథకంపై సంవత్సరానికి 8.2 శాతం వడ్డీ లభిస్తోంది. ఇది ప్రస్తుతం అందుబాటులో ఉన్న అత్యధిక సురక్షిత వడ్డీ రేట్లలో ఒకటిగా చెప్పవచ్చు. ఈ పథకంలో తల్లిదండ్రులు తమ కుమార్తె పేరుతో ఖాతా తెరిచి 15 సంవత్సరాల పాటు డబ్బులు జమ చేయవచ్చు. ఖాతా 21 సంవత్సరాల వరకు లేదా కుమార్తె వివాహం వరకు కొనసాగుతుంది. ఈ పథకం ప్రత్యేకత ఏమిటంటే, పెట్టుబడి చేసిన మొత్తం, పొందిన వడ్డీ, మెచ్యూరిటీ సమయంలో వచ్చే మొత్తం పూర్తిగా పన్ను మినహాయింపు పరిధిలో ఉంటాయి. విద్య, ఉన్నత చదువులు, వివాహం వంటి భవిష్యత్తు ఖర్చుల కోసం ఇది ఎంతో ఉపయోగపడుతుంది.

కిసాన్ వికాస్ పత్ర (KVP) – పెట్టుబడి డబుల్ అయ్యే పథకం

తక్కువ రిస్క్‌తో దీర్ఘకాల పెట్టుబడిని కోరుకునేవారికి కిసాన్ వికాస్ పత్ర (KVP) మంచి అవకాశంగా నిలుస్తోంది. ప్రస్తుతం ఈ పథకంపై సంవత్సరానికి 7.5 శాతం వడ్డీ లభిస్తోంది. కాంపౌండింగ్ ప్రయోజనంతో పెట్టుబడి చేసిన మొత్తం సుమారు 115 నెలల్లో, అంటే దాదాపు 9 సంవత్సరాలు 7 నెలల్లో రెట్టింపు అవుతుంది. ఉదాహరణకు రూ.10,000 పెట్టుబడి పెడితే మెచ్యూరిటీ సమయానికి అది సుమారు రూ.20,000 అవుతుంది. ఈ పథకం కూడా ప్రభుత్వ హామీతో నడుస్తుండటంతో పెట్టుబడిపై నష్టం వచ్చే అవకాశం ఉండదు. మార్కెట్ హెచ్చుతగ్గుల ప్రభావం కూడా ఉండదు. దీర్ఘకాలంలో నిశ్చితమైన రాబడి కోరుకునే వారికి ఇది సరైన ఎంపిక.

పోస్టాఫీస్ పథకాలు ఎందుకు ప్రత్యేకం?

పోస్టాఫీస్ సేవింగ్స్ పథకాల ప్రధాన ఆకర్షణ భద్రత. ఇవన్నీ కేంద్ర ప్రభుత్వ మద్దతుతో నడుస్తుండటంతో పెట్టుబడిదారులకు డబ్బు భద్రతపై పూర్తి నమ్మకం ఉంటుంది. అంతేకాకుండా బ్యాంక్ FDలతో పోలిస్తే కొన్ని పథకాలలో అధిక వడ్డీ రేట్లు లభిస్తున్నాయి. మార్కెట్ రిస్క్ లేకపోవడం, స్థిరమైన రాబడులు రావడం, పన్ను ప్రయోజనాలు అందుబాటులో ఉండటం వల్ల చిన్న పెట్టుబడిదారుల నుంచి మధ్యతరగతి కుటుంబాల వరకు వీటిపై ఆసక్తి పెరుగుతోంది.

ఏ పథకం ఎవరికి సరిపోతుంది?

స్థిరమైన రాబడి, పన్ను ప్రయోజనాలు కోరుకునేవారికి NSC అనుకూలంగా ఉంటుంది. కుమార్తె భవిష్యత్తు కోసం దీర్ఘకాలిక పొదుపు చేయాలనుకునే కుటుంబాలకు సుకన్య సమృద్ధి యోజన ఉత్తమ ఎంపిక. పెట్టుబడి చేసిన మొత్తం రెట్టింపు కావాలని భావించే వారు కిసాన్ వికాస్ పత్రను పరిశీలించవచ్చు. పెట్టుబడి లక్ష్యం, కాలపరిమితి, ఆర్థిక అవసరాలను బట్టి సరైన పథకాన్ని ఎంచుకుంటే భవిష్యత్తులో మంచి ఆర్థిక భద్రతను పొందవచ్చు.