Post Office Schemes: FD కంటే ఎక్కువ వడ్డీ కావాలా..? ప్ర‌భుత్వ హామీతో ఏకంగా 8.2% వరకు

Post Office Schemes: బ్యాంకులు ఫిక్స్‌డ్ డిపాజిట్ (FD) వడ్డీ రేట్లను తగ్గిస్తున్న నేపథ్యంలో, పెట్టుబడిదారులు ప్రత్యామ్నాయ మార్గాల కోసం చూస్తున్నారు. ఇలాంటి సమయంలో పోస్టాఫీస్ చిన్న పొదుపు పథకాలు ఆకర్షణీయమైన వడ్డీతో పాటు భద్రతను కూడా అందిస్తున్నాయి. అలాంటి కొన్ని బెస్ట్ స్కీమ్స్ గురించి ఇప్పుడు తెలుసుకుందాం.

FD కంటే ఎక్కువ వడ్డీ ఇచ్చే పోస్టాఫీస్ స్కీమ్స్

ప్రస్తుతం చాలా ప్రభుత్వ, ప్రైవేట్ బ్యాంకులు ఎఫ్‌డీలపై 6 నుంచి 7 శాతం మధ్య వడ్డీ మాత్రమే అందిస్తున్నాయి. కానీ పోస్టాఫీస్‌లోని కొన్ని చిన్న పొదుపు పథకాలు 7 శాతానికి పైగా వడ్డీ ఇస్తున్నాయి. ఈ పథకాల వడ్డీ రేట్లను కేంద్ర ప్రభుత్వం ప్రతి మూడు నెలలకు ఒకసారి సమీక్షించి ప్రకటిస్తుంది. దీంతో పెట్టుబడిదారులకు మెరుగైన రాబడి పొందే అవకాశం ఉంటుంది.

సీనియర్ సిటిజన్స్, NSC, KVPలో మంచి రాబడి

* సీనియర్ సిటిజన్ సేవింగ్స్ స్కీమ్ (SCSS) ప్రస్తుతం 8.2 శాతం వడ్డీ అందిస్తోంది. పదవీ విరమణ చేసిన వారికి ఇది మంచి పెట్టుబడి ఎంపికగా చెప్పొచ్చు.

* నేషనల్ సేవింగ్స్ సర్టిఫికేట్ (NSC)పై 7.7 శాతం వార్షిక వడ్డీ లభిస్తుంది. ఇందులో పెట్టుబడి చేసిన మొత్తం ఐదేళ్ల తర్వాత ఒకేసారి మెచ్యూరిటీ రూపంలో అందుతుంది.

* కిసాన్ వికాస్ పత్ర (KVP)పై 7.5 శాతం వడ్డీ లభిస్తుంది. ఈ పథకంలో పెట్టుబడి చేసిన మొత్తం సుమారు 115 నెలల్లో (దాదాపు 9.5 ఏళ్లలో) రెట్టింపు అవుతుంది.

పీపీఎఫ్‌, మంథ్లీ ఇన్‌క‌మ్ స్కీమ్ కూడా..

* పబ్లిక్ ప్రావిడెంట్ ఫండ్ (PPF) దేశంలో అత్యంత ప్రజాదరణ పొందిన పొదుపు పథకాలలో ఒకటి. దీనిపై ప్రస్తుతం 7.1 శాతం చక్రవడ్డీ లభిస్తుంది. 15 ఏళ్ల కాలపరిమితి ఉన్న ఈ పథకంలో పెట్టుబడిపై పన్ను మినహాయింపు ప్రయోజనాలు కూడా ఉంటాయి.

* పోస్టాఫీస్ మంత్లీ ఇన్‌కమ్ స్కీమ్ (MIS)పై 7.4 శాతం వార్షిక వడ్డీ లభిస్తుంది. ఈ పథకం ద్వారా ప్రతి నెలా వడ్డీ ఆదాయం పొందాలనుకునే వారికి మంచి అవకాశం ఉంటుంది.

మహిళలు, బాలికల కోసం ప్రత్యేక పథకాలు

* మహిళా సమ్మాన్ సేవింగ్స్ సర్టిఫికేట్ మహిళల కోసం ప్రత్యేకంగా రూపొందించిన పథకం. దీనిపై 7.5 శాతం వడ్డీ లభిస్తుంది. రెండేళ్ల కాలపరిమితి ఉన్న ఈ పథకం మహిళలకు మంచి పొదుపు అవకాశాన్ని అందిస్తుంది.

* సుకన్య సమృద్ధి యోజన బాలికల భవిష్యత్తు కోసం రూపొందించిన ప్రత్యేక పథకం. దీనిపై ప్రస్తుతం 8.2 శాతం వడ్డీ లభిస్తోంది. బాలిక పేరుతో ఖాతా తెరిచి దీర్ఘకాలికంగా పొదుపు చేయవచ్చు. పన్ను మినహాయింపుతో పాటు అధిక రాబడి కూడా ఈ పథకం ప్రత్యేకత.

టైమ్ డిపాజిట్ స్కీమ్ కూడా మంచి ఆప్ష‌న్‌

పోస్టాఫీస్ 2 సంవత్సరాల టైమ్ డిపాజిట్ (Time Deposit) స్కీమ్‌పై ప్రస్తుతం 7 శాతం వడ్డీ లభిస్తోంది. ఇందులో వడ్డీని ప్రతి మూడు నెలలకు ఒకసారి లెక్కిస్తారు. తక్కువ కాలానికి భద్రతతో కూడిన పెట్టుబడి చేయాలనుకునే వారికి ఇది మంచి ఎంపికగా చెప్పవచ్చు.

మొత్తంగా చూస్తే, బ్యాంకుల ఎఫ్‌డీలతో పోలిస్తే పోస్టాఫీస్ చిన్న పొదుపు పథకాలు ప్రస్తుతం మెరుగైన వడ్డీతో పాటు ప్రభుత్వ భద్రత, కొన్ని పథకాలలో పన్ను మినహాయింపు వంటి అదనపు ప్రయోజనాలను కూడా అందిస్తున్నాయి. అందువల్ల పెట్టుబడి చేసే ముందు మీ అవసరాలకు సరిపోయే పథకాన్ని ఎంపిక చేసుకోవడం మంచిది.