Post office: 10 ఏళ్ల‌లో రూ. 17 ల‌క్ష‌లు సంపాదించ‌డం మీ ల‌క్ష్య‌మా.? ఈ పోస్టాఫీస్ ప‌థ‌కంతో సాధ్య‌మే

Post office: చిన్న మొత్తాలతో పొదుపు చేస్తూ భవిష్యత్తుకు పెద్ద మొత్తాన్ని సిద్ధం చేసుకోవాలని చాలా మంది కోరుకుంటారు. అలాంటి వారికి పోస్టాఫీస్ రికరింగ్ డిపాజిట్ (RD) స్కీమ్ మంచి ఎంపికగా చెప్పొచ్చు. ఈ ప‌థ‌కం ద్వారా 10 ఏళ్ల‌లో రూ. 17 ల‌క్ష‌లు ఎలా జ‌మ చేయాలో ఇప్పుడు తెలుసుకుందాం.

ప్రభుత్వ హామీతో పూర్తిగా సురక్షిత పెట్టుబడి

పోస్టాఫీస్ RD స్కీమ్‌కు కేంద్ర ప్రభుత్వ హామీ ఉంటుంది. అందువల్ల ఇందులో పెట్టిన డబ్బు పూర్తిగా సురక్షితంగా ఉంటుంది. షేర్ మార్కెట్ లేదా మ్యూచువల్ ఫండ్ల మాదిరిగా మార్కెట్ ఒడిదుడుకుల ప్రభావం ఈ పథకంపై ఉండదు. అందుకే రిస్క్ తీసుకోవడానికి ఇష్టపడని వారు ఈ స్కీమ్‌ను ఎక్కువగా ఎంచుకుంటున్నారు. ప్రస్తుతం పోస్టాఫీస్ RDపై సంవత్సరానికి 6.7 శాతం వడ్డీ లభిస్తోంది. ఇందులో చక్రవడ్డీ (Compounding) ప్రయోజనం కూడా ఉండటంతో, కాలం గడిచే కొద్దీ పెట్టుబడిపై వచ్చే రాబడి పెరుగుతుంది. ఈ పథకంలో నెలకు కేవలం రూ.100తోనే పెట్టుబడి ప్రారంభించవచ్చు.

ఎవరు ఖాతా తెరవొచ్చు? ఎంతకాలం పెట్టుబడి పెట్టాలి?

ఏ భారతీయ వయోజనుడైనా పోస్టాఫీస్ RD ఖాతా తెరవవచ్చు. అలాగే 10 సంవత్సరాలు నిండిన పిల్లల పేరుతో కూడా తల్లిదండ్రులు లేదా సంరక్షకులు ఖాతా ప్రారంభించవచ్చు. 18 ఏళ్లు పూర్తయిన తర్వాత వారు స్వయంగా ఖాతాను నిర్వహించుకునే అవకాశం ఉంటుంది. ఈ పథకం ప్రారంభ కాలపరిమితి 5 సంవత్సరాలు. అయితే అవసరమైతే మరో 5 సంవత్సరాలు పొడిగించుకోవచ్చు. నెల 1 నుంచి 15వ తేదీ మధ్య ఖాతా తెరిస్తే ప్రతి నెల 15వ తేదీలోపు వాయిదా చెల్లించాలి. 16వ తేదీ తర్వాత ఖాతా తెరిస్తే నెల చివరి తేదీలోపు వాయిదా చెల్లించాలి.

అవసరమైతే రుణం కూడా పొందొచ్చు

ఈ పథకంలో మరో ముఖ్యమైన ప్రయోజనం రుణ సౌకర్యం. ఖాతా ప్రారంభించి కనీసం ఒక సంవత్సరం పూర్తయితే, అప్పటివరకు జమ చేసిన మొత్తంలో 50 శాతం వరకు రుణం తీసుకోవచ్చు. ఈ రుణంపై వడ్డీ, RD వడ్డీ రేటుకంటే 2 శాతం మాత్రమే ఎక్కువగా ఉంటుంది. అలాగే అవసరమైతే మూడు సంవత్సరాల తర్వాత ఖాతాను ముందుగానే మూసివేసే అవకాశం కూడా ఉంది.

రోజుకు రూ.333 ఆదా చేస్తే రూ.17 లక్షలు ఎలా వస్తాయి?

రోజుకు సుమారు రూ.333 పొదుపు చేస్తే నెలకు దాదాపు రూ.10,000 పెట్టుబడి పెట్టినట్లే. మొదటి 5 సంవత్సరాలు

నెలవారీ పెట్టుబడి: రూ.10,000, మొత్తం పెట్టుబడి రూ.6,00,000 అవుతుంది. 6.7 శాతం వడ్డీతో లభించే వడ్డీ సుమారు రూ.1,13,659తో క‌లిపి మెచ్యూరిటీ మొత్తం సుమారు రూ.7,13,659 అవుతుంది. మరో 5 సంవత్సరాలు కొనసాగిస్తే.. పెట్టుబడిని మరో 5 సంవత్సరాలు కొనసాగిస్తే మొత్తం పెట్టుబడి రూ.12,00,000 అవుతుంది. చక్రవడ్డీ ప్రభావంతో వడ్డీ సుమారు రూ.5,08,546 వరకు చేరవచ్చు. దీంతో 10 సంవత్సరాల చివరికి మొత్తం ఫండ్ సుమారు రూ.17,08,546 అవుతుంది.

ఈ పథకం ఎవరికి బాగా ఉపయోగపడుతుంది?

చిన్న మొత్తాలను క్రమం తప్పకుండా పొదుపు చేసి, భవిష్యత్తులో పెద్ద మొత్తాన్ని సమకూర్చుకోవాలనుకునే వారికి పోస్టాఫీస్ RD మంచి ఎంపిక. ముఖ్యంగా... ఉద్యోగులు, గృహిణులు, చిన్న వ్యాపారులు, రిస్క్ లేని పెట్టుబడులను కోరుకునే వారు, పిల్లల చదువు, వివాహం లేదా భవిష్యత్ అవసరాల కోసం నిధి సిద్ధం చేసుకోవాలనుకునే కుటుంబాల‌కు ఈ పథకం ఉపయోగకరంగా ఉంటుంది.