Petrol Diesel Price : తగ్గుతున్న ముడి చమురు ధరలు.. త్వరలోనే వాహనదారులకు గుడ్ న్యూస్ వచ్చేనా?

Petrol Diesel Price : దేశంలోని వాహనదారులకు ఇంధన ధరల పరంగా ప్రస్తుతం ఒక రకమైన ఊరట లభిస్తోంది. గడచిన కొన్ని వారాలుగా దేశవ్యాప్తంగా పెట్రోల్, డీజిల్ ధరలు ఎలాంటి మార్పులు లేకుండా ఒకేలా కొనసాగుతున్నాయి. జులై 11వ తేదీన కూడా దేశీయ మార్కెట్లో ఇంధన రేట్లు స్థిరంగా ఉన్నట్లు అధికారిక వర్గాల ద్వారా సమాచారం అందుతోంది. మే నెలలో వరుసగా నాలుగు సార్లు ధరలను పెంచిన ప్రభుత్వ రంగ చమురు కంపెనీలు, ఆ తర్వాత నుండి రేట్లలో ఎలాంటి మార్పులు చేయకుండా స్థిరత్వాన్ని పాటిస్తున్నాయి. రోజువారీగా ఉదయం 6 గంటలకే ఈ ధరలు అప్‌డేట్ అవుతుంటాయి. అయితే వివిధ రాష్ట్రాలు విధించే స్థానిక పన్నులు, రవాణా ఖర్చుల ఆధారంగా ఆయా నగరాల్లో ధరలు కొద్దిపాటి తేడాలతో మారుతుంటాయి.

మెట్రో నగరాల్లో రేట్ల సెగ

దేశంలోని ప్రధాన మెట్రో నగరాల్లో ఇంధన ధరలను పరిశీలిస్తే రేట్ల వ్యత్యాసం స్పష్టంగా కనిపిస్తుంది. దేశ రాజధాని న్యూఢిల్లీలో ప్రస్తుతం లీటర్ పెట్రోల్ ధర రూ.102.12 గా ఉండగా, డీజిల్ ధర లీటరుకు రూ.95.20 వద్ద విక్రయించబడుతోంది. ఇక ఆర్థిక రాజధాని ముంబైలో ఈ భారం మరింత ఎక్కువగా ఉంది. ముంబైలో లీటర్ పెట్రోల్ రూ.111.21 కాగా, డీజిల్ రూ.97.83 గా ఉంది. కోల్‌కతాలో పెట్రోల్ రూ.113.51, డీజిల్ రూ.99.82 వద్ద కొనసాగుతుండగా.. దక్షిణ భారత్‌లోని చెన్నైలో పెట్రోల్ సుమారు రూ.107.94, డీజిల్ సుమారు రూ.99.55 గా ఉంది. అదేవిధంగా బెంగళూరులో లీటర్ పెట్రోల్ ధర రూ.110 నుంచి రూ.111 మధ్య ఉండగా, డీజిల్ ధర సుమారు రూ.98 నుంచి రూ.99 వరకు పలుకుతోంది.

తెలుగు రాష్ట్రాల్లో చమురు భారం

రెండు తెలుగు రాష్ట్రాల్లో ఇంధన ధరల భారం దేశంలోని ఇతర ప్రాంతాల కంటే చాలా ఎక్కువగా ఉండటం గమనార్హం. ముఖ్యంగా ఆంధ్రప్రదేశ్ రాష్ట్రంలో ఇంధన ధరలు దేశంలోనే అత్యధిక స్థాయిలో నమోదవుతుండటంతో వాహనదారులు తీవ్ర ఇబ్బందులు పడుతున్నారు. ఏపీలోని విజయవాడలో లీటర్ పెట్రోల్ ధర రూ.117.25 కి చేరగా, డీజిల్ లీటర్ సుమారు రూ.105 వద్ద విక్రయించబడుతోంది. మరో ప్రధాన నగరం విశాఖపట్నంలో పెట్రోల్ లీటర్ రూ.116.39 ఉండగా, డీజిల్ సుమారు రూ.104.11 గా ఉంది. తెలంగాణ విషయానికి వస్తే, రాజధాని హైదరాబాద్‌లో లీటర్ పెట్రోల్ ధర రూ.115.69 గా కొనసాగుతోంది. డీజిల్ సుమారు రూ.103 నుంచి రూ.105 మధ్య విక్రయించబడుతోంది.

మే నెల బాదుడు వెనుక కారణం ఇదే

గత మే 2026 నెలలో పెట్రోల్ ధరలు అకస్మాత్తుగా పెరగడానికి అంతర్జాతీయ రాజకీయ పరిస్థితులే ప్రధాన కారణం. పశ్చిమాసియాలో తలెత్తిన యుద్ధ వాతావరణం, అలాగే ప్రపంచ చమురు రవాణాకు కీలకమైన హోర్ముజ్ జలసంధి వద్ద జరిగిన ఉద్రిక్తతల కారణంగా అంతర్జాతీయ మార్కెట్లో ముడి చమురు ధరలు విపరీతంగా పెరిగిపోయాయి. దీంతో దేశీయ ఆయిల్ మార్కెటింగ్ కంపెనీలైన ఇండియన్ ఆయిల్ (IOC), భారత్ పెట్రోలియం (BPCL), హిందుస్థాన్ పెట్రోలియం (HPCL) లు మే నెలలో ఏకంగా నాలుగు దఫాలుగా ధరలను పెంచాయి. ఈ నాలుగు పెంపుల ద్వారా పెట్రోల్‌పై సుమారు రూ. 2.6 నుంచి రూ. 2.8 వరకు, డీజిల్‌పై రూ. 2.7 నుంచి రూ. 2.8 వరకు అదనపు భారాన్ని మోపడంతో ధరలు ఈ స్థాయికి చేరుకున్నాయి.

అంతర్జాతీయంగా తగ్గుతున్న ముడి చమురు ధరలు

ప్రస్తుతం గ్లోబల్ మార్కెట్లో పరిస్థితులు క్రమంగా చక్కబడుతున్నాయి. అంతర్జాతీయ ముడి చమురు ధరలు ప్రస్తుతం బ్యారెల్‌కు సుమారు 75 నుంచి 76 అమెరికన్ డాలర్ల వద్ద స్థిరపడ్డాయి. ఈ క్రూడాయిల్ ధరల తగ్గుదలని బట్టి జూలై 1వ తేదీ నుంచే దేశంలోని కొన్ని ప్రైవేట్ రిఫైనరీ సంస్థలు తమ బంకుల్లో ఇంధన ధరలను స్వల్పంగా తగ్గించాయి. అయితే ప్రభుత్వ రంగ చమురు కంపెనీలు మాత్రం ఇంకా ఎలాంటి అధికారిక రేట్ల తగ్గింపును ప్రకటించలేదు. ఇండ్ మనీ, మల్టీబ్యాగ్ వంటి పారిశ్రామిక విశ్లేషక సంస్థల సమాచారం ప్రకారం.. అంతర్జాతీయ మార్కెట్లో ముడి చమురు ధరలు ఇదే రకంగా జులై, ఆగస్టు నెలల్లో కూడా స్థిరంగా తక్కువగా కొనసాగితే, రాబోయే రోజుల్లో ప్రభుత్వ కంపెనీలు కూడా ధరలను తగ్గించే అవకాశం పుష్కలంగా ఉందని అంచనా వేస్తున్నారు.