NSE IPO: ఐపీఓ తర్వాత ఎన్‌ఎస్‌ఈ స్వయంగా లిస్టింగ్ కాదు.. బీఎస్ఈ సీఈఓ సుందరరామన్

NSE IPO: నేషనల్ స్టాక్ ఎక్స్ఛేంజ్ (NSE) ప్రతిపాదిత ఇనీషియల్ పబ్లిక్ ఆఫరింగ్ (IPO) మరియు లిస్టింగ్‌పై బాంబే స్టాక్ ఎక్స్ఛేంజ్ (BSE) మేనేజింగ్ డైరెక్టర్, సీఈఓ సుందరరామన్ రామమూర్తి కీలక వ్యాఖ్యలు చేశారు. ప్రస్తుత నిబంధనల (Regulatory Framework) ప్రకారం ఐపీఓ ప్రక్రియ పూర్తయిన తర్వాత ఎన్‌ఎస్‌ఈ తన సొంత ఎక్స్ఛేంజ్‌లోనే స్వయంగా లిస్టింగ్ చేసుకోవడానికి అవకాశం లేదని ఆయన స్పష్టం చేశారు. తమ వేదికపైనే ట్రేడింగ్ చేసుకునేలా డ్రాఫ్ట్ రెడ్ హెర్రింగ్ ప్రాస్పెక్టస్ (DRHP)కు ఎలాంటి అనుబంధ పత్రాన్ని (Addendum) జారీ చేయడం లేదని ఎన్‌ఎస్‌ఈ క్లారిటీ ఇచ్చినట్లు ఒక నివేదిక తెలిపింది.

గతంలో 2017లో బీఎస్ఈ కూడా తన సొంత ఎక్స్ఛేంజ్‌లోనే ట్రేడింగ్ అనుమతి కోరినప్పటికీ నిబంధనల ప్రకారం అనుమతి లభించలేదని ఈ సందర్భంగా సుందరరామన్ గుర్తుచేశారు. ఈ క్రమంలోనే ఎన్‌ఎస్‌ఈ కూడా 'అనుమతించబడిన ట్రేడింగ్' కేటగిరీ కింద స్వయంగా లిస్ట్ కాబోతోందంటూ వస్తున్న వార్తలను ఎన్‌ఎస్‌ఈ కొట్టిపారేసిందని ఆయన తెలిపారు.

మరోవైపు, ఇటీవల ప్రవేశపెట్టిన 'క్లోజింగ్ ఆక్షన్ సెషన్' (CAS) విధానంపై స్పందిస్తూ.. సీఏఎస్ వ్యవస్థకు లిక్విడిటీ ఎంతో కీలకమని, ప్రదర్శనలో కొరత ఉండటం వల్ల ఇండెక్స్ ఆప్షన్ వాల్యూమ్‌లు తగ్గి భాగస్వామ్యం తగ్గిందని అభిప్రాయపడ్డారు. ఇదిలా ఉండగా, ఆగస్టు నెలలో ఎన్‌ఎస్‌ఈ ఈక్విటీ డెరివేటివ్స్ టర్నోవర్ రూ. 34.48 లక్షల కోట్లకు పడిపోయి నవంబర్ 2023 తర్వాత అత్యల్ప స్థాయికి చేరగా, బీఎస్ఈ టర్నోవర్ రూ. 32.2 లక్షల కోట్లకు చేరినట్లు గణాంకాలు వెల్లడిస్తున్నాయి.