UPI చెల్లింపుల్లో కొత్త రూల్.. మోసాలు అరికట్టేందుకు బ్యాంకుల కొత్త ప్రతిపాదన!

UPI: ప్రస్తుత డిజిటల్ యుగంలో యూనిఫైడ్ పేమెంట్స్ ఇంటర్‌ఫేస్ (UPI) సేవలు సామాన్యుల జీవితంలో ఒక భాగమైపోయాయి. క్షణాల వ్యవధిలో చిల్లర డబ్బుల సమస్య లేకుండా ఏకకాలంలో డిజిటల్ లావాదేవీలు జరపడానికి అందరూ యూపీఐ యాప్‌లనే ఎక్కువగా ఆశ్రయిస్తున్నారు. అయితే, రోజురోజుకూ పెరుగుతున్న టెక్నాలజీతో పాటు ఆన్‌లైన్ మోసాలు, సైబర్ నేరాలు కూడా అదే స్థాయిలో పెరిగిపోతున్నాయి. డిజిటల్ పేమెంట్స్ చేసే సమయంలో అమాయక ప్రజలు కొందరు కేటుగాళ్ల వలలో చిక్కుకుని తమ కష్టపడి సంపాదించిన డబ్బును కోల్పోతున్నారు. ఈ రకమైన ఆర్థిక మోసాలను సమర్థవంతంగా అరికట్టడానికి, యూపీఐ లావాదేవీలను మరింత సురక్షితంగా మార్చడానికి దేశంలోని బ్యాంకులు కీలకమైన ముందడుగు వేశాయి.

UPI చెల్లింపుల్లో జరుగుతున్న మోసాలకు పూర్తిస్థాయిలో కళ్లెం వేయాలనే ఉద్దేశంతో బ్యాంకులు తాజాగా 'రిస్క్ బేస్డ్ వెరిఫికేషన్ సిస్టమ్' అనే కొత్త విధానాన్ని ప్రతిపాదించాయి. డిజిటల్ లావాదేవీల భద్రతను పెంచే దిశగా ఈ ప్రతిపాదన ప్రస్తుతం తీవ్ర చర్చనీయాంశంగా మారింది. ఈ కొత్త సిస్టమ్ అమల్లోకి వస్తే ఆన్‌లైన్ చెల్లింపుల తీరు పూర్తిగా మారే అవకాశం ఉంది. ఖాతాదారులు చేసే ప్రతి సాధారణ చెల్లింపు మాదిరిగా కాకుండా, మోసపూరిత కార్యకలాపాలకు ఆస్కారం ఉన్న లావాదేవీలపై ఇది ప్రత్యేక నిఘా ఉంచనుంది.

ఈ కొత్త నిబంధన పనితీరు ఎలా ఉంటుందంటే, ఎవరైనా యూజర్ UPI ద్వారా డబ్బులు బదిలీ చేస్తున్నప్పుడు సిస్టమ్ ఆ లావాదేవీని పరిశీలిస్తుంది. ఒకవేళ ఆ లావాదేవీలో ఏదైనా అనుమానాస్పద అంశాన్ని లేదా రిస్క్‌ను గుర్తిస్తే, వెంటనే ఆ ఖాతాదారునికి మొబైల్ స్క్రీన్‌పై 'YES or NO' అని ఒక పాప్-అప్ నోటిఫికేషన్ ప్రత్యక్షమవుతుంది. ఆ ట్రాన్సాక్షన్ మీరు చేస్తున్నదేనా కాదా అని నిర్ధారించుకోవడానికి ఈ పాప్-అప్ ఉపయోగపడుతుంది. యూజర్ ఒకవేళ 'YES' అని కన్ఫర్మ్ చేస్తేనే తదుపరి ప్రక్రియ కొనసాగుతుంది, మనీ బదిలీ విజయవంతంగా పూర్తవుతుంది. ఒకవేళ 'NO' అని సెలెక్ట్ చేస్తే లావాదేవీ నిలిచిపోతుంది.

అయితే, ఈ ఎక్స్‌ట్రా సెక్యూరిటీ లేయర్ ప్రతి చిన్న ట్రాన్సాక్షన్‌కూ వర్తించదని బ్యాంకులు స్పష్టం చేశాయి. ప్రతీ రోజూ మనం చేసే సాధారణ, చిన్న మొత్తాల చెల్లింపులకు ఈ పాప్-అప్ అడ్డంకిగా మారదు. కేవలం భద్రతాపరంగా రిస్క్ ఉన్నట్లు భావించే లావాదేవీలకు మాత్రమే ఈ ఎక్స్ట్రా లేయర్‌ను తేవాలని బ్యాంకులు గట్టిగా భావిస్తున్నాయి. దీనివల్ల సాధారణ వినియోగదారులకు ఎటువంటి ఇబ్బంది కలగకుండా, అనధికారిక లేదా మోసపూరిత లావాదేవీలను మాత్రమే అడ్డుకోవడానికి వీలవుతుంది. ప్రస్తుతం ఈ ప్రతిపాదన ఇంకా ప్రాథమిక దశలోనే ఉందని, దీనికి సంబంధించిన విధివిధానాలపై పరిశీలన జరుగుతోందని సమాచారం. త్వరలోనే దీనిపై పూర్తి స్పష్టత వచ్చే అవకాశం ఉంది.