Real Estate: దేశ వ్యాప్తంగా ఇళ్ల అమ్మకాలు డౌన్..హైదరాబాద్‌లో మాత్రం!

Real Estate: దేశంలోని ప్రధాన నగరాల్లో స్థిరాస్తి మార్కెట్ మందగమనాన్ని ఎదుర్కొంటోంది. ఈ ఏడాది ఏప్రిల్–జూన్ త్రైమాసికంలో దేశవ్యాప్తంగా అగ్రగామి ఎనిమిది ప్రధాన నగరాల్లో ఇళ్ల విక్రయాలు 6 శాతం క్షీణించి 91,729 యూనిట్లకు పడిపోయాయని ప్రముఖ రియల్ ఎస్టేట్ బ్రోకరేజ్ సంస్థ ప్రాప్‌టైగర్ తన రియల్ ఇన్‌సైట్ నివేదికలో వెల్లడించింది. గతేడాది ఇదే సమయంలో 97,674 యూనిట్ల అమ్మకాలు జరిగాయి.

పశ్చిమాసియా ప్రాంతంలో చోటుచేసుకున్న భౌగోళిక-రాజకీయ ఘర్షణలు, యుద్ధ భయాలు.కృత్రిమ మే వేగంగా విస్తరిస్తుండటంతో ఉద్యోగ భద్రతపై ఏర్పడిన ఆందోళనల కారణంగా కొనుగోలుదారులు ఆచితూచి అడుగులు వేస్తున్నారు.

ముంబై, ఢిల్లీ-ఎన్‌సీఆర్, బెంగళూరు, పుణే, కోల్‌కతా, అహ్మదాబాద్‌లలో నివాస గృహాల అమ్మకాలు గణనీయంగా పడిపోయాయి. దేశవ్యాప్తంగా మార్కెట్ మందగించినప్పటికీ దక్షిణ భారతదేశంలోని రెండు ప్రధాన నగరాలు మాత్రం బలమైన వృద్ధిని కనబరిచాయి. చెన్నైలో అత్యధికంగా 36 శాతం వృద్ధితో 7,183 యూనిట్ల విక్రయాలను సాధించింది. హైదరాబాద్‌లో 15 శాతం వృద్ధిని నమోదు చేస్తూ జూన్ త్రైమాసికంలో ఏకంగా 13,196 యూనిట్ల అమ్మకాలతో దూసుకుపోయింది.

ఒకవైపు అమ్మకాలు నెమ్మదించినప్పటికీ, డెవలపర్లు కొత్త ప్రాజెక్ట్‌లను విస్తృతంగా మార్కెట్లోకి తీసుకొచ్చారు. కొత్త ఇళ్ల సరఫరా 6 శాతం పెరిగి 89,161 యూనిట్లకు చేరింది. ఇక చదరపు అడుగు సగటు ధర వరుసగా రెండు త్రైమాసికాలుగా రూ.10,000 పైనే స్థిరంగా కొనసాగుతోందని ప్రాప్‌టైగర్ నివేదిక పేర్కొంది.

మార్కెట్ బలహీనపడటం లేదని, కొనుగోలుదారులు నాణ్యమైన ఇళ్లను ఎంచుకునే దిశగా పరిపక్వత సాధిస్తున్నారని, రాబోయే పండుగల సీజన్‌లో రియల్ ఎస్టేట్ రంగానికి మళ్లీ మంచి రోజులు వస్తాయని నిపుణులు భావిస్తున్నారు.