Real Estate: ఒక్క ఫ్లాట్ ధర రూ.125 కోట్లు..ఎవరు కొన్నారో తెలుసా..?

Rishabh Satiya: దేశ ఆర్థిక రాజధాని ముంబైలో రియల్ ఎస్టేట్ ధరలు ఆకాశాన్ని తాకుతుంటాయి. ముఖ్యంగా సముద్రపు గాలి సోకే వర్లి లాంటి ప్రాంతాల్లో ఇల్లు కొనడం అంటే అది ఒక హోదాకు చిహ్నం. తాజాగా ముంబైలోని ఒబెరాయ్ 360 వెస్ట్ ప్రాజెక్టులో జరిగిన ఒక భారీ డీల్ ఇప్పుడు దేశవ్యాప్తంగా హాట్ టాపిక్ అయింది. ప్రముఖ హెల్త్‌టెక్ స్టార్టప్ ప్లిక్స్ సహ వ్యవస్థాపకుడు రిషబ్ సత్య, ఒక విలాసవంతమైన డ్యూప్లెక్స్ అపార్ట్‌మెంట్‌ను ఏకంగా రూ. 125 కోట్లకు కొనుగోలు చేశారు.

విలాసానికి కేరాఫ్ అడ్రస్

ముంబైలోని అత్యంత ఖరీదైన నివాస ప్రాంతాలలో ఒకటైన వర్లిలో ఈ ప్రాజెక్ట్ ఉంది. రిషబ్ సత్య కొనుగోలు చేసిన ఈ డ్యూప్లెక్స్ యూనిట్ మొత్తం 9,636 చదరపు అడుగుల విస్తీర్ణాన్ని కలిగి ఉంది. మార్చి 24న దీని రిజిస్ట్రేషన్ ప్రక్రియ పూర్తయింది. సముద్రం వైపు ముఖం కలిగి, అత్యాధునిక సౌకర్యాలతో కూడిన ఈ అపార్ట్‌మెంట్ విలాసానికి కొత్త అర్థాన్ని చెబుతోంది.

సెలబ్రిటీల సందడి..

ఈ 360 వెస్ట్ టవర్ కేవలం బిల్డింగ్ మాత్రమే కాదు, అది కుబేరుల నిలయం. గడిచిన కొన్నేళ్లుగా ఇక్కడ జరిగిన లావాదేవీలు చూస్తే కళ్ళు తిరగక మానవు. కేరట్ లేన్ వ్యవస్థాపకుడు మిథున్ సాచేతి సోదరుడు సిద్ధార్థ సాచేతి గత ఏడాది ఇక్కడ రెండు అపార్ట్‌మెంట్లను రూ. 160 కోట్లకు సొంతం చేసుకున్నారు. బాలీవుడ్ హీరో షాహిద్ కపూర్ - మీరా కపూర్ జంట రూ. 60 కోట్లతో ఇక్కడ నివాసం ఏర్పాటు చేసుకున్నారు. స్టార్ హీరో అక్షయ్ కుమార్, ట్వింకిల్ ఖన్నా జోడీ 2025 ప్రారంభంలో తమ యూనిట్‌ను రూ. 80 కోట్లకు విక్రయించి లాభాలను గడించారు. ఇండియానా గ్రూప్ కూడా రూ. 76 కోట్లతో ఒక యూనిట్‌ను దక్కించుకుంది.

ఎందుకు ఇంత డిమాండ్?

ముంబైలో భూమి కొరత ఉండటం, దానికి తోడు సముద్ర తీరానికి ఆనుకుని ఉండే లొకేషన్ కావడంతో వర్లి ప్రాంతానికి డిమాండ్ ఎప్పుడూ తగ్గదు. ఒబెరాయ్ 360 వెస్ట్‌లో ఉన్న రెండు టవర్లు కేవలం 4, 5 బీహెచ్‌కే అపార్ట్‌మెంట్లు, డ్యూప్లెక్సులు, పెంట్‌హౌస్‌లను మాత్రమే అందిస్తాయి. ఇక్కడి ప్రైవసీ , అత్యున్నత స్థాయి భద్రత కారణంగానే వ్యాపారవేత్తలు, సినీ తారలు ఈ భవనాన్ని ఎంచుకుంటున్నారు. మొత్తానికి, ముంబై రియల్ ఎస్టేట్ మార్కెట్ మళ్ళీ తన సత్తాను చాటుకుంది. సామాన్యుల కలల బడ్జెట్ వందల్లో ఉంటే, కుబేరుల ఇంటి ధరలు వందల కోట్లలో ఉండటం ముంబై ప్రత్యేకత.