LPG Rate Today : అంతర్జాతీయ మార్కెట్లో సంక్షోభం.. ఈ రోజు గ్యాస్ ధరలు ఎలా ఉన్నాయో చూసుకోండి!

LPG Rate Today : అంతర్జాతీయంగా అమెరికా, ఇరాన్ దేశాల మధ్య కొనసాగుతున్న తీవ్ర ఉద్రిక్తతల కారణంగా దేశంలో పెట్రోల్, డీజిల్, సీఎన్‌జీ ధరలు భారీగా పెరిగిపోతున్నాయి. అయితే ఈ ఇంధన ధరల మంటల్లోనూ సామాన్య ప్రజలకు గ్యాస్ సిలిండర్ విషయంలో కేంద్ర ప్రభుత్వం కొంత ఊరటనిచ్చింది. ఈరోజు, అంటే జూన్ 5వ తేదీన దేశవ్యాప్తంగా డొమెస్టిక్ గ్యాస్ సిలిండర్ ధరలలో ఎలాంటి మార్పులు చేయలేదు. గత మార్చి నెల నుంచి ఇప్పటివరకు గృహ వినియోగ సిలిండర్ ధరలు స్థిరంగా కొనసాగుతుండటం గమనార్హం. మరోవైపు, వ్యాపారాల కోసం ఉపయోగించే కమర్షియల్ గ్యాస్ సిలిండర్ల ధరలు మాత్రం నిరంతరం పెరుగుతూనే ఉన్నాయి. మే నెలలో ఏకంగా రూ.993 మేర పెరిగిన కమర్షియల్ సిలిండర్ ధర, ఈ జూన్ నెలలోనూ మరో రూ.42 మేర పెరగడం గమనార్హం.

ప్రస్తుత మార్కెట్ ధరల ప్రకారం.. దేశంలోని ప్రధాన నగరాల్లో 14.2 కిలోల బరువుండే డొమెస్టిక్ ఎల్‌పీజీ సిలిండర్ల ధరలు రూ.910.50 నుంచి రూ.1002.50 మధ్య కొనసాగుతున్నాయి. హైదరాబాద్‌లో నేడు గృహ అవసరాల గ్యాస్ సిలిండర్ ధర రూ.955.50 వద్ద విక్రయించబడుతోంది. కాగా హోటళ్లు, క్యాటరింగ్ వ్యాపారాలలో వాడే 19 కిలోల కమర్షియల్ గ్యాస్ సిలిండర్ ధర నగరంలో రూ.3215.00 కు చేరుకుంది. దేశ రాజధాని ఢిల్లీ విషయానికి వస్తే, అక్కడ డొమెస్టిక్ సిలిండర్ ధర రూ.913.00 గా ఉండగా, కమర్షియల్ సిలిండర్ ధర రూ.3071.50 వద్ద కొనసాగుతోంది.

దేశంలోని మిగిలిన మెట్రో నగరాల విషయానికి వస్తే.. ఆర్థిక రాజధాని ముంబైలో డొమెస్టిక్ సిలిండర్ ధర రూ.912.50 కాగా, కమర్షియల్ రేట్ రూ.3024.00 వద్ద ఉంది. కోల్‌కతాలో గృహ వినియోగ సిలిండర్ రూ.939.00 పలకగా, కమర్షియల్ సిలిండర్ ధర రూ.3202.50 గా నమోదైంది. చెన్నైలో డొమెస్టిక్ గ్యాస్ ధర రూ.928.50 ఉండగా, కమర్షియల్ సిలిండర్ రూ.3237.00 వద్ద విక్రయించబడుతోంది. అలాగే ఐటీ హబ్ బెంగళూరులో డొమెస్టిక్ సిలిండర్ రూ.915.50, కమర్షియల్ సిలిండర్ రూ.3152.00 వద్ద ఉన్నాయి. అమృత్‌సర్‌లో గృహ వినియోగ సిలిండర్ రేట్ రూ.954.00, కమర్షియల్ రేట్ రూ.3178.00గా ఉంది. చండీగఢ్‌లో డొమెస్టిక్ సిలిండర్ ధర రూ.922.50, కమర్షియల్ ధర రూ.3092.50 వద్ద ఉంది. భోపాల్‌లో డొమెస్టిక్ రూ.918.50, కమర్షియల్ రూ.3077.00, భువనేశ్వర్‌లో డొమెస్టిక్ సిలిండర్ రూ.939.00, కమర్షియల్ సిలిండర్ రూ.3238.50 వద్ద విక్రయించబడుతున్నాయి.

మరోవైపు, పేదలు, బ్యాచిలర్స్ ఎక్కువగా ఉపయోగించే ఫ్రీ ట్రేడ్ ఎల్‌పీజీ (FTL) కింద లభించే 5 కిలోల చిన్న సిలిండర్, అంటే చోటూ సిలిండర్ ధర కూడా పెరిగింది. ఈ చిన్న సిలిండర్ ధరపై ఇటీవల రూ.11 మేర భారం పడింది. తాజా పెంపుతో దేశ రాజధాని ఢిల్లీలో 5 కేజీల చోటూ సిలిండర్ ధర రూ.821.50కి చేరుకుంది. స్థానిక పన్నుల వ్యత్యాసాల కారణంగా ఈ చిన్న సిలిండర్ ధర కూడా ప్రాంతాలను బట్టి స్వల్పంగా మారుతూ ఉంటుంది.

గ్యాస్ సిలిండర్ ధరలు ఎలా మారుతాయో తెలుసా?

మన దేశంలో ఎల్‌పీజీ సిలిండర్ ధరలను నిర్ణయించడంలో ముఖ్యంగా మూడు అంశాలు కీలక పాత్ర పోషిస్తాయి. మొదటిది అంతర్జాతీయ మార్కెట్. భారతదేశం తన అవసరాలకు కావలసిన ఎల్‌పీజీలో సుమారు 60 శాతం భాగం ఇతర దేశాల నుంచే దిగుమతి చేసుకుంటుంది. కాబట్టి గ్లోబల్ మార్కెట్లో ముడిచమురు, గ్యాస్ ధరలు పెరిగితే ఆ ప్రభావం నేరుగా మన సిలిండర్ రేట్లపై పడుతుంది. రెండవది డాలర్-రూపాయి ఎక్స్ఛేంజ్ రేట్. అమెరికన్ డాలర్‌తో పోలిస్తే రూపాయి విలువ తగ్గినా ఇంధన దిగుమతి భారం పెరిగి రేట్లు మారుతాయి. ఇక మూడవది రాష్ట్ర స్థాయి పన్నులు. ప్రతి రాష్ట్రంలోనూ లోకల్ వ్యాట్, డిస్ట్రిబ్యూటర్ల రవాణా ఖర్చులు వేర్వేరుగా ఉంటాయి. ఈ కారణంగానే ఒక నగరం నుంచి మరో నగరానికి ధరలలో తేడాలు కనిపిస్తాయి.