Gold, Silver Prices: బంగారాన్ని మించిన వెండి.. ఆగస్టులో 21% లాభం, ఇక సెప్టెంబర్‌లో?

Gold And Silver Prices: భారీ దిద్దుబాటు తర్వాత బంగారం, వెండి ధరలు సెప్టెంబర్‌లో మరింత అస్థిరంగా మారే అవకాశం ఉందని మార్కెట్‌ విశ్లేషకులు అంచనా వేస్తున్నారు. అమెరికా ఉద్యోగాల గణాంకాలు, ఫెడరల్‌ రిజర్వ్‌ వడ్డీ రేట్లపై అంచనాలు, భౌగోళిక రాజకీయ పరిణామాలు బులియన్‌ మార్కెట్‌పై ప్రభావం చూపే అవకాశముంది. ముఖ్యంగా ఈ వారం విడుదల కానున్న అమెరికా నాన్‌-ఫార్మ్‌ పేరోల్స్‌, నిరుద్యోగం, ఏడీపీ ఉపాధి గణాంకాలతో పాటు తయారీ, సేవల పీఎంఐ డేటాపై ఇన్వెస్టర్లు దృష్టి సారించనున్నారు.

గత వారం ఎంసీఎక్స్‌లో బంగారం, వెండి ధరలు గణనీయంగా తగ్గాయి. అక్టోబర్‌ డెలివరీ గోల్డ్‌ ఫ్యూచర్స్‌ 10 గ్రాములకు రూ.6,157 లేదా 3.8 శాతం తగ్గి సుమారు రూ.1.56 లక్షలకు చేరాయి. మరోవైపు సెప్టెంబర్‌ సిల్వర్‌ ఫ్యూచర్స్‌ కిలోకు రూ.9,893 లేదా 4 శాతం తగ్గి రూ.2.36 లక్షలకు పడిపోయాయి. వారంలో బంగారం ధర సుమారు రూ.1.63 లక్షల నుంచి రూ.1.56 లక్షలకు తగ్గడంతో గరిష్ఠ స్థాయి నుంచి రూ.6,000కుపైగా నష్టపోయింది.

అమెరికా ఫెడరల్‌ రిజర్వ్‌ చైర్‌ కెవిన్‌ వార్ష్‌ చేసిన వ్యాఖ్యల తర్వాత శుక్రవారం బంగారం, వెండిపై అమ్మకాల ఒత్తిడి మరింత పెరిగిందని విశ్లేషకులు తెలిపారు. ద్రవ్యోల్బణం, వడ్డీ రేట్లకు సంబంధించిన ఆయన వ్యాఖ్యలు ఇన్వెస్టర్లలో లాభాల స్వీకరణకు కారణమయ్యాయని పేర్కొన్నారు. సెప్టెంబర్‌లో ఫెడ్‌ విధాన నిర్ణయం ఎలా ఉండబోతోందన్న దానిపై తాజా ఆర్థిక గణాంకాలు కీలక ప్రభావం చూపే అవకాశం ఉంది.

భౌగోళిక రాజకీయ పరిణామాలు కూడా బంగారం, వెండి ధరలపై ప్రభావం చూపవచ్చని నిపుణులు చెబుతున్నారు. ముఖ్యంగా అమెరికా-ఇరాన్‌ మధ్య ఉద్రిక్తతలు, హోర్ముజ్‌ జలసంధి చుట్టూ పరిణామాలు చమురు ధరలు, ద్రవ్యోల్బణ అంచనాలను ప్రభావితం చేసే అవకాశం ఉందని విశ్లేషకులు పేర్కొన్నారు. డాలర్‌ కదలికలు, అమెరికా కార్మిక మార్కెట్‌ గణాంకాలు, ఫెడ్‌ వడ్డీ రేట్ల అంచనాలు సెప్టెంబర్‌లో బులియన్‌ మార్కెట్‌ దిశను నిర్ణయించనున్నాయి.

అయితే, గత వారం భారీ అమ్మకాలు నమోదైనప్పటికీ ఆగస్టు నెల మొత్తాన్ని పరిశీలిస్తే బంగారం, వెండి మంచి లాభాలను నమోదు చేశాయి. ఆగస్టులో బంగారం సుమారు 15.7 శాతం పెరగగా, వెండి దాదాపు 21 శాతం లాభపడి బంగారాన్ని అధిగమించింది. దీంతో సెప్టెంబర్‌లో ధరలు మళ్లీ కోలుకుంటాయా లేదా లాభాల స్వీకరణ కొనసాగుతుందా అన్నది కీలకంగా మారింది.