Gold Rate: బంగారం ప్రియులకు గుడ్ న్యూస్.. భారీగా పడిపోయిన ధరలు

Gold Price : బంగారం, వెండి కొనాలనుకునే వారికి ఇది ఒక రకంగా ఊరటనిచ్చే వార్త. గత కొన్ని రోజులుగా పసిడి, వెండి ధరలు ఊహించని విధంగా హెచ్చుతగ్గులకు లోనవుతున్నాయి. ఇటీవల సరికొత్త రికార్డులను సృష్టిస్తూ తులం బంగారం ధర ఏకంగా రూ.1,60,000 మార్కును దాటేసి సామాన్యులకు చుక్కలు చూపించింది. అయితే, ప్రస్తుతం అంతర్జాతీయ మార్కెట్ల ప్రభావంతో ధరలు భారీగా దిగివచ్చాయి. జూన్ 10న విడుదలైన తాజా గణాంకాల ప్రకారం, బులియన్ మార్కెట్ ప్రస్తుతం స్వల్ప బలహీనత, స్థిరత్వం మధ్య కొనసాగుతోంది.

హైదరాబాద్‌లో నేటి ధరలను ఓసారి పరిశీలిస్తే.. 24 క్యారెట్ల 10 గ్రాముల బంగారం ధర రూ. 1,53,170 వద్ద ట్రేడవుతోంది. 22 క్యారెట్ల ఆర్నమెంట్ 10 గ్రాముల ధర రూ. 1,40,410 వద్ద కొనసాగుతోంది. దేశీయంగా కిలో వెండి ధర రూ. 2,59,900 నుండి మార్కెట్ లభ్యతను బట్టి రూ. 2,69,900 వరకు ట్రేడవుతోంది. పసిడి ధరలు ఒక్కసారిగా దిగిరావడం వెనుక అంతర్జాతీయ మార్కెట్లలో చోటుచేసుకున్న పలు పరిణామాలు ఉన్నాయి.

అమెరికా బాండ్ల రాబడులు పెరగడంతో పెట్టుబడిదారులు సురక్షిత సాధనమైన బంగారం నుండి తమ పెట్టుబడులను బాండ్ల వైపు మళ్లిస్తున్నారు. ఇది ప్రపంచ మార్కెట్‌లో బంగారం బలహీనపడటానికి కారణమైంది. అమెరికా ఫెడరల్ రిజర్వ్ వడ్డీ రేట్ల తగ్గింపుపై తీసుకుంటున్న నిర్ణయాల్లో అస్థిరత మార్కెట్‌ను ప్రభావితం చేస్తోంది. గ్లోబల్ మార్కెట్‌లో క్రూడ్ ఆయిల్ ధరలు పెరగడం కూడా బులియన్ మార్కెట్ కదలికలను మార్చేసింది. వివిధ దేశాల మధ్య ఉన్న పొలిటికల్ ఇష్యూస్ కారణంగా ఇన్వెస్టర్లు అప్రమత్తంగా వ్యవహరిస్తున్నారు. పండగలు, పెళ్లిళ్ల సీజన్ ముగియడంతో తాత్కాలికంగా కొనుగోళ్లు నెమ్మదించడం కూడా దేశీయ మార్కెట్లో రేట్లు తగ్గడానికి దోహదపడింది.

మార్కెట్ అస్థిరత ప్రస్తుతానికి ఇలాగే కొనసాగవచ్చని ఆర్థిక నిపుణులు భావిస్తున్నారు. దీర్ఘకాలికంగా చూస్తే బంగారానికి డిమాండ్ ఎప్పుడూ బలంగానే ఉంటుంది. కానీ, స్వల్పకాలంలో మాత్రం ధరల్లో ఇలాంటి హెచ్చుతగ్గులు సహజం. ఏదేమైనా.. రూ. 1.60 లక్షల దాకా వెళ్లిన బంగారం ఇప్పుడు కాస్త తగ్గడం వల్ల, రాబోయే పెళ్లిళ్ల సీజన్‌కు ఆభరణాలు చేయించుకోవాలనుకునే సామాన్య, మధ్యతరగతి కొనుగోలుదారులకు ఇది మంచి అవకాశమనే చెప్పాలి.