EPFO: పీఎఫ్ ఖాతాదారుల‌కు హెచ్చ‌రిక‌.. ఈ త‌ప్పు చేస్తే మీ అకౌంట్ ఖాళీ అవ్వ‌డం ఖాయం

EPFO: అధికారిక వెబ్‌సైట్, ఉమంగ్ యాప్ మాత్రమే ఉపయోగించండి

పీఎఫ్ బ్యాలెన్స్ చూడడం, క్లెయిమ్ దాఖలు చేయడం, KYC అప్‌డేట్ చేయడం వంటి అన్ని సేవల కోసం EPFO అధికారిక వెబ్‌సైట్ లేదా ప్రభుత్వ అధికారిక UMANG యాప్‌ను మాత్రమే ఉపయోగించాలి. గూగుల్‌లో కనిపించే ప్రతి వెబ్‌సైట్ నిజమైనదే అనుకోవద్దు. కొన్నిసార్లు నకిలీ వెబ్‌సైట్లు కూడా సెర్చ్ ఫలితాల్లో కనిపించే అవకాశం ఉంటుంది. అందుకే అధికారిక వెబ్‌సైట్‌లోనే లాగిన్ కావాలి.

తెలియని లింకులపై ఎట్టి పరిస్థితుల్లోనూ క్లిక్ చేయొద్దు

"మీ PF డబ్బును వెంటనే విత్‌డ్రా చేసుకోండి", "KYC వెంటనే అప్‌డేట్ చేయండి", "మీ ఖాతా బ్లాక్ అవుతుంది" అంటూ వచ్చే SMSలు, వాట్సాప్ సందేశాలు లేదా ఈమెయిల్స్‌లోని లింకులపై క్లిక్ చేయకూడదు.

ఇలాంటి లింకులు ఎక్కువగా సైబర్ మోసగాళ్లు పంపేవే. ఒక్కసారి క్లిక్ చేస్తే మీ బ్యాంక్ ఖాతా వివరాలు, PF సమాచారం దొంగిలించే ప్రమాదం ఉంది. దీంతో మీ ఖాతాలోని డబ్బు కూడా కోల్పోయే అవకాశం ఉంటుంది.

UAN, OTP, బ్యాంక్ వివరాలు ఎవరికీ చెప్పొద్దు

మీ UAN (యూనివర్సల్ అకౌంట్ నంబర్), బ్యాంక్ ఖాతా వివరాలు, పాస్‌వర్డ్, OTP వంటి గోప్యమైన సమాచారాన్ని ఎప్పుడూ ఇతరులతో పంచుకోకూడదు. ఏదైనా అనుమానాస్పద వెబ్‌సైట్‌లో ఈ వివరాలు నమోదు చేయడం కూడా ప్రమాదకరం. ఒకసారి ఈ సమాచారం మోసగాళ్ల చేతికి వెళ్లితే మీ PF ఖాతాలో ఉన్న డ‌బ్బు కోల్పోయే ప్ర‌మాదం ఉంటుంది.

లాగిన్ చేసే ముందు వెబ్‌సైట్ అడ్రస్‌ను తప్పనిసరిగా పరిశీలించండి

సైబర్ నేరగాళ్లు అసలు EPFO వెబ్‌సైట్‌లా కనిపించే నకిలీ వెబ్‌సైట్లు తయారు చేస్తుంటారు. వెబ్‌సైట్ పేరులో ఒకటి లేదా రెండు అక్షరాలు మాత్రమే మార్చి ప్రజలను మోసం చేసే ప్రయత్నం చేస్తారు. అందువల్ల ఏదైనా లింక్ ఓపెన్ చేసినప్పుడు వెబ్‌సైట్ URL సరైనదేనా లేదా అని జాగ్రత్తగా చూసిన తర్వాతే లాగిన్ కావాలి.

EPFO ఎప్పుడూ ఫోన్‌లో OTP అడగదు

EPFO స్పష్టంగా తెలిపిన విషయం ఏమిటంటే... తమ అధికారులు ఎప్పుడూ ఫోన్ కాల్, SMS లేదా వాట్సాప్ ద్వారా OTP, పాస్‌వర్డ్, బ్యాంక్ వివరాలు లేదా ఇతర వ్యక్తిగత సమాచారాన్ని అడగరు. ఎవరైనా తాము EPFO అధికారులు అని చెప్పి OTP లేదా వ్యక్తిగత వివరాలు అడిగితే వెంటనే అప్రమత్తం కావాలి. అలాంటి వ్యక్తులకు ఎలాంటి సమాచారం ఇవ్వకుండా వెంటనే కాల్ క‌ట్ చేయండి.

ఖాతాదారులు తప్పనిసరిగా గుర్తుంచుకోవాల్సిన విషయాలు

అధికారిక EPFO వెబ్‌సైట్, UMANG యాప్ మాత్రమే ఉప‌యోగించాలి. తెలియని లింకులపై క్లిక్ చేయవద్దు. UAN, OTP, పాస్‌వర్డ్, బ్యాంక్ వివరాలు ఎవరికీ చెప్పవద్దు. లాగిన్ చేసే ముందు వెబ్‌సైట్ URLను ఒకసారి ప‌రిశీలించాలి. అనుమానాస్పద కాల్స్, మెసేజ్‌లు వస్తే వెంటనే నిర్లక్ష్యం చేయకుండా జాగ్రత్త పడండి. సైబర్ మోసాలు రోజురోజుకూ పెరుగుతున్న నేపథ్యంలో EPFO ఇచ్చిన ఈ సూచనలు ప్రతి PF ఖాతాదారు తప్పనిసరిగా పాటించాల్సినవే. కొద్దిపాటి అప్రమత్తతతో మీ కష్టార్జిత PF పొదుపును సురక్షితంగా కాపాడుకోవచ్చు.