Tata Osprey: గ్లోబల్ మార్కెట్‌లో టాటా సంచలనం.. ‘ఆస్ప్రే’ పేరుతో కొత్త ఎస్‌యూవీ లాంచ్

Tata Osprey: దేశీయ ఆటోమొబైల్ దిగ్గజం టాటా మోటార్స్ అంతర్జాతీయ మార్కెట్‌లో తన ఆధిపత్యాన్ని మరింత పెంచుకుంటోంది. సౌత్ ఆఫ్రికా మార్కెట్‌లో వేగంగా దూసుకెళ్తున్న ఈ సంస్థ, మనదేశంలో అత్యంత ప్రాచుర్యం పొందిన నెక్సాన్ను ఆస్ప్రే అనే ఆకర్షణీయమైన కొత్త పేరుతో ZAR 2,49,900 (భారత కరెన్సీలో సుమారు రూ.14.80 లక్షలు) ప్రారంభ ధరకు లాంచ్ చేసింది. సౌతాఫ్రికా మార్కెట్ నుంచి 2019లో బయటకు వచ్చిన టాటా మోటార్స్, గతేడాది నుంచి మళ్లీ తన వ్యాపారాన్ని విస్తరించడం ప్రారంభించింది. హ్యారియర్, కర్వ్, పంచ్, టియాగో లాంటి కార్లతో అక్కడ ఇప్పటికే మంచి గుర్తింపు తెచ్చుకున్న సంస్థ, ఇప్పుడు నెక్సాన్ను కొత్త రూపంలో ఆవిష్కరించింది. సేఫ్టీ, అత్యంత వేగానికి ప్రసిద్ధి చెందిన ఆస్ప్రే అనే వేటాడే పక్షి పేరును ఈ కొత్త ఎస్‌యూవీకి ఖరారు చేశారు. మన దేశం నుంచి పూర్తిగా తయారైన కారుగా ఈ మోడల్ సౌత్ ఆఫ్రికాకు ఎగుమతి అవుతోంది. భారతీయ మార్కెట్‌లో లభించే ప్రిస్టైన్ వైట్ రంగును అక్కడ 'ఫస్ట్ లైట్' అని పిలవడంతో పాటు ఇతర రంగులకు ప్రత్యేకమైన పేర్లను నిర్ణయించారు.

సరికొత్త ఇంజిన్, గేర్‌బాక్స్ ఆప్షన్లు

టాటా ఆస్ప్రే మోడల్ స్మార్ట్ ప్లస్, క్రియేటివ్, క్రియేటివ్ ప్లస్ PS అనే మూడు రకాల ట్రిమ్స్‌లో లభిస్తోంది. భారత మార్కెట్‌లో నెక్సాన్ పెట్రోల్, డీజిల్, సీఎన్‌జీ ఎంపికల్లో లభిస్తుండగా, సౌత్ ఆఫ్రికాలో మాత్రం కేవలం 1.2 లీటర్ టర్బో పెట్రోల్ ఇంజిన్‌తోనే అందుబాటులోకి తెచ్చారు. ఈ శక్తివంతమైన ఇంజిన్ 120 PS పవర్, 170 Nm టాప్ టార్క్‌ను ఉత్పత్తి చేస్తుంది. డ్రైవర్ల సౌకర్యార్థం 5-స్పీడ్ మాన్యువల్ గేర్‌బాక్స్‌తో పాటు పాడిల్ షిఫ్టర్లు ఉన్న 7-స్పీడ్ డ్యూయల్ క్లచ్ ట్రాన్స్‌మిషన్ (DCA) ఆప్షన్ కూడా అందించారు.

అత్యాధునిక భద్రతా ప్రమాణాలు

ప్రయాణికుల రక్షణ విషయానికి వస్తే టాటా మోటార్స్ ఎక్కడా కాంప్రమైజ్ కాకుండా గరిష్ట భద్రతను పొందుపరిచింది. ఇందులో 6 ఎయిర్‌బ్యాగ్‌లు, ఎలక్ట్రానిక్ స్టెబిలిటీ ప్రోగ్రామ్, ఐసోఫిక్స్ చైల్డ్ సీట్ మౌంట్లు ప్రామాణికంగా లభిస్తాయి. వీటికి తోడు బ్లైండ్ వ్యూ మానిటర్‌తో కూడిన 360 డిగ్రీ సరౌండ్ వ్యూ కెమెరా, హెచ్‌డీ రియర్ వ్యూ కెమెరా, టైర్ ప్రెజర్ మానిటరింగ్ సిస్టమ్, ఆటోమేటిక్ రెయిన్ సెన్సింగ్ వైపర్లు, ఫ్రంట్ పార్కింగ్ సెన్సార్లను జోడించారు. ఈ కారుకు NCAP నుంచి 5-స్టార్ సేఫ్టీ రేటింగ్ లభించనుంది.

కేబిన్‌లో లగ్జరీ ఫీచర్లు, హైటెక్ టెక్నాలజీ

కారు అంతర్భాగంలో కస్టమర్లను ఆకట్టుకునేలా అనేక ప్రీమియం ఫీచర్లు ఉన్నాయి. బేస్ వేరియంట్లలో 7 అంగుళాల హార్మన్ టచ్‌స్క్రీన్, డిజిటల్ ఇన్‌స్ట్రుమెంట్ క్లస్టర్ ఉండగా, టాప్ వేరియంట్లలో 10.25 అంగుళాల ప్రతిష్టాత్మక హార్మన్ ఇన్ఫోటైన్‌మెంట్ స్క్రీన్ అమర్చారు. వాయిస్ కంట్రోల్‌తో పనిచేసే పనోరమిక్ సన్‌రూఫ్, వైర్‌లెస్ ఛార్జర్, ఆటోమేటిక్ క్లైమేట్ కంట్రోల్, వెనుక వైపు ఏసీ వెంట్లు, కూల్డ్ గ్లోవ్‌బాక్స్ ప్రయాణాన్ని అత్యంత ఆహ్లాదకరంగా మారుస్తాయి.