Tata Nano EV: టాటా నానో లవర్స్‌కు మైండ్ బ్లోయింగ్ న్యూస్.. మళ్ళీ రోడ్లపైకి రాబోతున్న డ్రీమ్ కార్..!

Tata Nano EV: ప్రతి మధ్యతరగతి కుటుంబం సొంతంగా కారు కొనాలనే కల నెరవేర్చిన టాటా నానో మళ్ళీ కొత్త అవతారంలో పునరాగమనం చేయబోతోంది. ఈ ప్రసిద్ధ కారు రీ-ఎంట్రీపై టాటా మోటార్స్ ఇండియా డిజైన్ హెడ్ అజయ్ జైన్ చేసిన సంచలన వ్యాఖ్యలు ఇప్పుడు దేశవ్యాప్తంగా విపరీతంగా వైరల్ అవుతున్నాయి. ఆసక్తికరమైన విశేషాలు పరిశీలిద్దాం.

కొన్నేళ్ళ క్రితం ఉత్పత్తి ఆగిపోయినప్పటికీ, టాటా నానో కారుకు భారతీయ ఆటోమొబైల్ ప్రేమికుల్లో ఉన్న క్రేజ్ కొంచెం కూడా తగ్గలేదు. సోషల్ మీడియాలో నిత్యం నానో కొత్త లుక్ గురించి, ఏఐ (AI) డిజైన్ల గురించి రకరకాల వార్తలు వస్తూనే ఉంటాయి. తాజాగా ఒక ప్రముఖ ఇంటర్వ్యూలో నానో రీ-ఎంట్రీ గురించి అడిగిన ప్రశ్నకు టాటా మోటార్స్ ఇండియా డిజైన్ హెడ్ అజయ్ జైన్ ఎంతో నవ్వుతూ స్పందించారు. "ట్రై చేస్తాం" అంటూ సమాధానం ఇచ్చిన ఆయన, నానో అనేది భారతదేశ ప్రాభవాన్ని ప్రపంచ పటంలో నిలిపిన అత్యంత అద్భుతమైన కారు అని కొనియాడారు. కొద్ది సంవత్సరాలలోనే నానోను సరికొత్త అవతారంలో ప్రపంచానికి మళ్ళీ పరిచయం చేసే అవకాశం ఉందంటూ ఆయన మాట్లాడటం ఆటోమొబైల్ రంగాన్ని ఒక్కసారిగా ఆశ్చర్యపరిచింది.

ఎలక్ట్రిక్ రూపంలో రీ-ఎంట్రీకి సిద్ధం..!

ఇప్పుడున్న ట్రెండ్ ప్రకారం ఈసారి నానో పెట్రోల్ వెర్షన్‌లో కాకుండా, పూర్తి ఎలక్ట్రిక్ కారు రూపంలో మార్కెట్‌లోకి అడుగుపెట్టే అవకాశం ఉందని సమాచారం. ప్రస్తుతం భారత ఈవీ రంగాన్ని శాసిస్తున్న టాటా కంపెనీ, తక్కువ ధరలో ఎక్కువ మైలేజ్ ఇచ్చే సిటీ ఈవీగా దీనిని తీర్చిదిద్దాలని భావిస్తోంది. గతంలో జయేమ్ ఆటోమోటివ్స్‌తో కలిసి 'జయేమ్ నియో' పేరుతో నానో ఎలక్ట్రిక్ మోడల్ ప్రయత్నాలు జరిగాయి. ఆ అనుభవంతో పాటు నయా బ్యాటరీ టెక్నాలజీని ఉపయోగించి, ఒకే ఛార్జ్‌పై ఏకంగా 200 కిలోమీటర్ల కంటే ఎక్కువ రేంజ్ ఇచ్చేలా రూపొందించవచ్చని నిపుణులు అంచనా వేస్తున్నారు. తక్కువ బడ్జెట్‌లో కారు కొనాలనుకునే వారికి ఇది నిజంగానే ఒక దివ్యౌషధంగా మారనుంది.

మారిన మార్కెట్ అవసరాలు - నానోకు ప్లస్ పాయింట్..

2009లో తొలిసారి నానో మార్కెట్‌లోకి వచ్చినప్పటి పరిస్థితులతో పోలిస్తే, ప్రస్తుత ఆటోమొబైల్ ప్రపంచం చాలా మారిపోయింది. అప్పట్లో "ప్రపంచంలోనే అతి చౌకైన కారు" అనే ప్రచారం కొంతవరకు ప్రతికూలంగా మారింది. నేటి రోజుల్లో మెట్రో నగరాల్లో ట్రాఫిక్ పెరిగిపోవడంతో, నిత్యం ఆఫీసులకు వెళ్లేవారికి కాంపాక్ట్ సిటీ కార్ల అవసరం బాగా పెరిగింది. అలాగే పెట్రోల్, డీజిల్ ధరల భారం నుంచి తప్పించుకోవడానికి ప్రజలు ఎలక్ట్రిక్ వాహనాల వైపు వేగంగా అడుగులు వేస్తున్నారు. ఈ నేపథ్యంలో నానో ఈవీ కనుక మార్కెట్‌లోకి వస్తే అది కచ్చితంగా సరికొత్త సంచలనం సృష్టిస్తుందని మార్కెట్ విశ్లేషకులు భావిస్తున్నారు.

సరికొత్త ఫీచర్లు, ప్రీమియం లుక్..

గతంలో లాగా కేవలం బడ్జెట్ కారుగానే కాకుండా, ప్రస్తుత సేఫ్టీ నిబంధనలు, కస్టమర్ల అంచనాలకు తగ్గట్టుగా ఈ కొత్త నానో రూపుదిద్దుకోనుంది. మరింత బలమైన బాడీ స్ట్రక్చర్, అధునాతన ఎయిర్‌బ్యాగ్‌లు, ఇన్ఫోటైన్‌మెంట్ సిస్టమ్స్ వంటి ప్రీమియం ఫీచర్లు ఇందులో జతచేసే అవకాశం ఉంది. ద్విచక్ర వాహనాల నుంచి నాలుగు చక్రాల వాహనాలకు మారాలనుకునే మధ్యతరగతి కుటుంబాలకు, అలాగే ఇంట్లో రెండో కారుగా ఉపయోగించుకోవాలనుకునే వారికి ఇది సరిగ్గా సరిపోతుంది. తమ అభిమాన కారును సరికొత్త ఎలక్ట్రిక్ రూపంలో చూడటానికి ఆటోమొబైల్ ప్రియులు వెయ్యి కళ్లతో నిరీక్షిస్తున్నారు.

టాటా నానో రీ-ఎంట్రీ వార్తలు దేశవ్యాప్తంగా ఉన్న కార్ లవర్స్‌లో సరికొత్త ఉత్సాహాన్ని నింపాయి. అధికారికంగా ఈ ప్రాజెక్ట్ ప్రారంభం కాకపోయినప్పటికీ, కంపెనీ ఉన్నతాధికారుల నోటి నుంచి వచ్చిన ఈ మాటలు భారత ఆటోమొబైల్ రంగంలో సరికొత్త ఆశలు రేకెత్తిస్తున్నాయి. ఎలక్ట్రిక్ నానో రూపంలో టాటా మోటార్స్ త్వరలోనే సామాన్యుల కలలకు మళ్ళీ ప్రాణం పోస్తుందో లేదో చూడాలి.