ఇంత తేడానా.. అక్కడ 60 లక్షలు, భారత్‌లో మాత్రం 7 లక్షల లోపే..!

Suzuki Fronx: ఆర్థిక సంక్షోభంతో కొట్టుమిట్టాడుతున్న పాకిస్థాన్‌లో సుజుకి సంస్థ తన సరికొత్త మోడల్ 'ఫ్రాంక్స్'ను అధికారికంగా విడుదల చేసింది. లాహోర్‌లో జరిగిన ఒక కార్యక్రమంలో ఈ కారును పరిచయం చేశారు. అక్కడ స్థానికంగా అసెంబ్లీ చేసిన మొదటి ఎస్‌యూవీగా దీనికి గుర్తింపు దక్కింది. ఆల్టో లేదా స్విఫ్ట్ వంటి కార్ల నుంచి అప్‌గ్రేడ్ అవ్వాలనుకునే ధనవంతులైన వినియోగదారులను లక్ష్యంగా చేసుకుని ఈ కారును ప్రవేశపెట్టారు.

భారీ ధర: సామాన్యులకు అందని ద్రాక్ష..

పాకిస్థాన్‌లో ఫ్రాంక్స్ ధర వింటే ఎవరైనా ముక్కున వేలేసుకోవాల్సిందే. అక్కడ ఈ కారు ప్రారంభ ధర సుమారు 59.99 లక్షల రూపాయల (పాకిస్థాన్ కరెన్సీ) నుంచి ప్రారంభమై, టాప్ వేరియంట్ 63.74 లక్షల వరకు పలుకుతోంది. విదేశాల నుంచి దిగుమతి చేసుకునే విడిభాగాలు, అక్కడ ప్రభుత్వం విధిస్తున్న భారీ పన్నుల కారణంగానే కారు ధర ఆకాశాన్ని తాకింది. సాధారణ ప్రజలు నిత్యావసరాల కోసం ఇబ్బంది పడుతున్న తరుణంలో, ఇంత భారీ ధరతో కారును విడుదల చేయడం చర్చకు దారితీసింది.

భారత్ వర్సెస్ పాకిస్థాన్: కీలక వ్యత్యాసాలు..

భారతదేశంలో మారుతీ సుజుకి ఫ్రాంక్స్ ప్రారంభ ధర కేవలం రూ. 6.85 లక్షల (ఎక్స్-షోరూమ్) మాత్రమే. పాకిస్థాన్ మోడల్‌తో పోలిస్తే మన దేశంలో ఇది ఐదు రెట్లు తక్కువ ధరకే లభిస్తోంది.

ఇంజిన్: పాకిస్థాన్ వెర్షన్‌లో 1.5 లీటర్ కే-సిరీస్ హైబ్రిడ్ ఇంజిన్‌ను అందించారు. మన దేశంలో 1.2 లీటర్ పెట్రోల్, 1.0 లీటర్ టర్బో పెట్రోల్ ఆప్షన్లు ఉన్నాయి.

కరెన్సీ విలువ: భారత రూపాయి విలువ పాకిస్థాన్ రూపాయి కంటే చాలా బలంగా ఉంది. డాలర్ రూపంలో చూసినా పాకిస్థాన్‌లో దీని ధర భారత్ కంటే మూడు రెట్లు ఎక్కువగా ఉంది.

ఆధునిక డిజైన్, ఫీచర్లు..

పాకిస్థాన్ వెర్షన్ ఫ్రాంక్స్‌లో 9 అంగుళాల టచ్‌స్క్రీన్, 360 డిగ్రీల కెమెరా, 6 ఎయిర్‌బ్యాగ్‌లు, క్రూయిజ్ కంట్రోల్ వంటి ప్రీమియం ఫీచర్లు ఉన్నాయి. దీని బాహ్య రూపం భారత్‌లో ఉన్న మోడల్ మాదిరిగానే పొడవాటి గ్రిల్, ఎల్‌ఈడీ లైట్లు, 16 అంగుళాల చక్రాలతో ఆకర్షణీయంగా ఉంది. లోపలి భాగం డ్యూయల్ టోన్ రంగులతో విలాసవంతంగా కనిపిస్తుంది. రోడ్డుపై మంచి పట్టును ఇచ్చే ఈ కారు, లీటరుకు 15 నుంచి 18 కిలోమీటర్ల మైలేజీని ఇస్తుందని సంస్థ పేర్కొంది.