Skoda : ఏకంగా 16,000 శాతం వృద్ధి.. ఎగుమతుల్లో సంచలనం సృష్టించిన స్కోడా

Skoda : భారతదేశంలో తయారయ్యే కార్లకు అంతర్జాతీయంగా భారీ డిమాండ్ పెరుగుతోంది. అనేక ప్రముఖ వాహన తయారీ సంస్థలు భారత్‌ను ఎగుమతుల కేంద్రంగా మార్చుకోగా, ఆ జాబితాలో స్కోడా స్లావియా అగ్రస్థానంలో నిలిచింది. క్యాలెండర్ ఇయర్ 2026 రెండవ త్రైమాసికంలో అత్యధిక వార్షిక వృద్ధిని సాధించిన ఏకైక కారుగా స్లావియా నిలిచింది. 2025 క్యూ2లో కేవలం 3 యూనిట్లు మాత్రమే ఎగుమతి కాగా, 2026 క్యూ2లో ఏకంగా 483 యూనిట్లు ఎగుమతి అయ్యాయి. అంటే గత సంవత్సరంతో పోలిస్తే ఏకంగా 16,000 శాతం రికార్డు స్థాయి వృద్ధిని నమోదు చేసి అందరినీ ఆశ్చర్యపరిచింది.

ఆగస్ట్ 18న విపణిలోకి స్కోడా స్లావియా ఫేస్‌లిఫ్ట్

ఫిబ్రవరి 2022లో తొలిసారిగా భారత్‌లో ప్రవేశపెట్టిన స్కోడా స్లావియా మోడల్‌ను, నాలుగున్నరేళ్ల విరామం తర్వాత సరికొత్త రూపంలో తీసుకువస్తున్నారు. ఆగస్ట్ 18, 2026న స్కోడా స్లావియా ఫేస్‌లిఫ్ట్ వేరియంట్‌ను భారత మార్కెట్‌లో లాంచ్ చేయనున్నారు. ఈ నూతన మిడ్‌సైజ్ సెడాన్ ఎక్స్‌టీరియర్‌లో భారీ మార్పులు చేశారు. ఇందులో ఇంటిగ్రేటెడ్ ఎల్‌ఈడీ ఎలిమెంట్లతో కూడిన కొత్త ఫ్రంట్ గ్రిల్, మోడిఫై చేసిన ఫ్రంట్ అండ్ రియర్ లైటింగ్ సిస్టమ్ ప్రధాన ఆకర్షణగా నిలవనున్నాయి.

ఎక్స్‌టీరియర్, ఇంటీరియర్ డిజైన్‌లో కీలక మార్పులు

కొత్త స్కోడా స్లావియా ఫేస్‌లిఫ్ట్‌లో సరికొత్త డిజైన్ కలిగిన బంపర్లు, ఆకర్షణీయమైన అలాయ్ వీల్స్, ఫ్రంట్ పార్కింగ్ సెన్సార్లను అందించనున్నారు. కారు లోపల రిఫ్రెష్ చేసిన కేబిన్ అప్‌హోల్స్టరీతో పాటు, కుషాక్ ఫేస్‌లిఫ్ట్ తరహాలో వెనుక సీట్లకు మసాజ్ ఫంక్షన్ సదుపాయం కల్పించే అవకాశముంది. వీటితో పాటు డ్రైవర్ సౌకర్యార్థం పెద్దదైన 10.25-ఇంచ్ డిజిటల్ ఇన్స్ట్రుమెంట్ క్లస్టర్‎ను కూడా ఈ మోడల్‌లో చేర్చనున్నారు.

ఇండియా 2.0 స్ట్రాటజీ, అంతర్జాతీయ డిమాండ్

స్కోడా ఇండియా 2.0 వ్యూహంలో స్లావియా అత్యంత కీలకమైన మోడల్‌గా నిలిచింది. ప్రత్యేకంగా భారత్ కోసం రూపొందించిన MQB A0 IN ప్లాట్‌ఫారమ్‌పై దీనిని నిర్మించారు. భారతదేశంలోనే కాకుండా నేపాల్, వియత్నాం వంటి అనేక ఇతర దేశాలకు కూడా ఈ కారు ఎగుమతి అవుతోంది. మహారాష్ట్రలోని ఛత్రపతి శంభాజీ నగర్‌లో ఉన్న స్కోడా ప్లాంట్‌లో ఈ కారు ఉత్పత్తి జరుగుతోంది. ఈ నూతన మోడల్‌లో డోర్ హ్యాండిల్స్ పైన బలమైన క్యారెక్టర్ లైన్లు, పెద్ద స్కోడా లెటరింగ్, రివైజ్డ్ ఎల్‌ఈడీ టెయిల్ ల్యాంప్స్, స్పోర్టీ లుక్ ఇచ్చే నకిలీ ట్విన్-ఎగ్జాస్ట్ డిజైన్ కనిపించనున్నాయి.

ఇంజిన్ ఆప్షన్లు, అడ్వాన్స్‌డ్ సేఫ్టీ ఫీచర్లు

సేఫ్టీ విషయానికి వస్తే.. కొనుగోలుదారులు ఎక్కువగా ఎదురుచూస్తున్న లెవెల్-2 ADAS టెక్నాలజీని ఈ ఫేస్‌లిఫ్ట్ మోడల్‌లో పరిచయం చేసే అవకాశం ఉంది. ఇక ఇంజిన్ సామర్థ్యం విషయానికి వస్తే.. ఇందులో మునుపటిలాగే నమ్మకమైన 1.0-లీటర్ TSI పెట్రోల్, పవర్‌ఫుల్ 1.5-లీటర్ TSI పెట్రోల్ ఇంజిన్ ఆప్షన్లను కొనసాగించనున్నారు. లగ్జరీ ఇంటీరియర్లు, గరిష్ట భద్రతా ప్రమాణాలతో ఈ కారు భారత సెడాన్ మార్కెట్లో మళ్లీ కొత్త ట్రెండ్ సృష్టించబోతోంది.