Range Rover Sport Twenty: రేంజ్ రోవర్ స్పోర్ట్ ట్వంటీ ఎడిషన్ లాంచ్..4.5 సెకన్లలో 100 కి.మీ వేగం.. ధర రూ.1.90 కోట్లు!

Range Rover Sport Twenty: లగ్జరీ వాహనాల తయారీ సంస్థ జేఎల్‌ఆర్ (JLR) ఇండియా, భారత మార్కెట్లోకి పరిమిత సంఖ్యలో రూపొందించిన 'రేంజ్ రోవర్ స్పోర్ట్ ట్వంటీ ఎడిషన్‌'ను అధికారికంగా విడుదల చేసింది.

రేంజ్ రోవర్ స్పోర్ట్ మోడల్ పరిచయమై 20 ఏళ్లు పూర్తి చేసుకున్న సందర్భంగా తీసుకొచ్చిన ఈ ప్రత్యేక ఎడిషన్ ధరను రూ. 1.90 కోట్లు (ఎక్స్-షోరూమ్)గా నిర్ణయించారు. ఈ శ్రేణి లగ్జరీ ఎస్‌యూవీకి సంబంధించిన బుకింగ్‌లను కంపెనీ ఇప్పటికే ప్రారంభించగా, విక్రయించిన వాహనాల డెలివరీలు రాబోయే అక్టోబర్ నెల నుంచి ప్రారంభం కానున్నాయి.

ఇంజిన్ పనితీరు విషయానికి వస్తే, ఇందులో శక్తివంతమైన 4.4-లీటర్ ట్విన్-టర్బో V8 మైల్డ్-హైబ్రిడ్ పెట్రోల్ ఇంజిన్‌ను అమర్చారు. ఇది 395 kW (దాదాపు 529 bhp) పవర్, 750 Nm గరిష్ఠ టాప్ టార్క్‌ను ఉత్పత్తి చేస్తుంది.

కేవలం 4.5 సెకన్లలోనే 0 నుంచి 100 కిలోమీటర్ల వేగాన్ని అందుకునే సామర్థ్యం ఈ వాహనం సొంతం. రేంజ్ రోవర్ స్పోర్ట్ ఆటోబయోగ్రఫీ వేరియంట్ ఆధారంగా డిజైన్ చేసిన ఈ వార్షికోత్సవ ఎడిషన్‌లో బ్లాక్ ఎక్స్‌టీరియర్ ప్యాక్, ప్రత్యేకమైన ‘TWENTY’ ఎచింగ్, ఆకర్షణీయమైన 23-అంగుళాల గ్లాస్ స్పార్కిల్ సిల్వర్ వీల్స్ అందించారు.

కస్టమర్ల కోరిక మేరకు గ్లాస్ బ్లాక్ వీల్స్ ఐచ్ఛికంగా లభిస్తాయి. ఇక రంగుల విషయానికొస్తే, ఒరిజినల్ రేంజ్ స్టార్మర్ కాన్సెప్ట్ ఆధారంగా రూపొందించిన సాంగినెల్లో ఆరెంజ్ మరియు వెసువియస్ ఆరెంజ్ ఫస్ట్ ఎడిషన్‌తో పాటు శాంటోరిని బ్లాక్, ఎస్ ఒస్తుని వైట్ రంగుల్లో ఈ వాహనం కస్టమర్లకు లభ్యం కానుంది.