Ethanol Car : భారత్‌లో తొలి ఇథనాల్ కారు.. జూన్ 4న చరిత్ర సృష్టించనున్న మారుతి.!

Ethanol Car : పర్యావరణ పరిరక్షణ, ప్రత్యామ్నాయ ఇంధనాల వాడకమే లక్ష్యంగా భారతదేశం మరో చారిత్రాత్మక అడుగు వేయడానికి సిద్ధమైంది. ప్రపంచ పర్యావరణ దినోత్సవానికి ఒక రోజు ముందే, అంటే జూన్ 4వ తేదీన దేశంలోనే మొట్టమొదటి ఫ్లెక్స్-ఫ్యూయల్ ప్యాసింజర్ వాహనాన్ని ప్రముఖ కార్ల తయారీ సంస్థ మారుతి సుజుకి ఆవిష్కరించనుంది. ఢిల్లీలో జరగనున్న ఈ ప్రతిష్టాత్మక కార్యక్రమంలో కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ, కేంద్ర పెట్రోలియం, సహజ వాయువు శాఖ మంత్రి హర్దీప్ సింగ్ పూరిలు ముఖ్య అతిథులుగా పాల్గొననున్నారు.

వంద శాతం ఇథనాల్‌తో నడిచే తొలి కారు

మారుతి సుజుకి తీసుకురాబోతున్న ఈ సరికొత్త మోడల్.. దేశంలోనే వంద శాతం స్వచ్ఛమైన ఇథనాల్ ఇంధనంతో నడిచే మొదటి సాధారణ ప్యాసింజర్ వాహనంగా నిలవనుంది. ఈ విషయాన్ని నాగ్‌పూర్‌లో జరిగిన ఒక కార్యక్రమంలో కేంద్ర మంత్రి నితిన్ గడ్కరీ తొలిసారిగా ధృవీకరించారు. మారుతి సుజుకితో పాటు టాటా మోటార్స్, మహీంద్రా అండ్ మహీంద్రా, టయోటా వంటి ఇతర దిగ్గజ ఆటోమొబైల్ సంస్థలు కూడా ఈ సాంకేతికతపై పనిచేస్తున్నాయని, రాబోయే సంవత్సరాల్లో ఇవి భారీ ఎత్తున మార్కెట్లోకి రానున్నాయని ఆయన తెలిపారు.

ఏ మోడల్ రాబోతోంది.?

ఈ సరికొత్త ఫ్లెక్స్-ఫ్యూయల్ కారు ఏ మోడల్ అనే విషయాన్ని మారుతి సుజుకి ఇంకా అధికారికంగా వెల్లడించలేదు. అయితే ఆటోమొబైల్ వర్గాల అంచనాల ప్రకారం.. ఇది 'వేగన్ఆర్ ఫ్లెక్స్ ఫ్యూయల్' లేదా 'ఫ్రాంక్స్ ఫ్లెక్స్ ఫ్యూయల్' అయ్యే అవకాశం ఉంది. మారుతి సంస్థ గతంలో ఒక మొబిలిటీ ఎక్స్‌పోలో వేగన్ఆర్ ప్రోటోటైప్‌ను ప్రదర్శించగా, సుజుకి సంస్థ జపాన్ మొబిలిటీ షోలో ఫ్రాంక్స్ వెర్షన్‌ను ప్రదర్శించింది. ఇటీవలే కేంద్ర ప్రభుత్వం వాహన పరీక్షలు , ధృవీకరణ నిబంధనలను సవరించి ఈ ఇంధన వాహనాలకు అనుమతులు ఇవ్వడంతో, ఈ కార్ల విడుదలకు మార్గం సుగమమైంది.

ఈ కార్ల ప్రత్యేకత ఏంటి?

సాధారణ పెట్రోల్ కార్లతో పోలిస్తే ఫ్లెక్స్-ఫ్యూయల్ కార్ల ఇంజన్ నిర్మాణం చాలా భిన్నంగా ఉంటుంది. ఇథనాల్ అనేది పెట్రోల్ కంటే ఎక్కువ తుప్పు పట్టించే గుణాన్ని కలిగి ఉండటమే కాకుండా, తేమను సులభంగా పీల్చుకుంటుంది. అందువల్ల, ఈ వాహనాల్లోని ఇంధన పైపులు, ఇంజెక్టర్లు, సీల్స్ , ఇంజన్ పనితీరును అధిక సాంద్రత కలిగిన ఇథనాల్‌కు తట్టుకునేలా ప్రత్యేకంగా రీ-డిజైన్ చేస్తారు.

లాభాలు ఎన్నో.. కానీ సవాళ్లు కూడా.!

ఇథనాల్ వంటి బయో-ఫ్యూయల్స్ వాడకం పెరగడం వల్ల భారతదేశానికి మూడు ప్రధాన ప్రయోజనాలు కలుగుతాయని నితిన్ గడ్కరీ పేర్కొన్నారు. ప్రస్తుతం భారత్ తన పెట్రోల్, డీజిల్ అవసరాల కోసం 87 శాతం విదేశీ దిగుమతులపైనే ఆధారపడుతోంది. ఇథనాల్ వాడకం వల్ల దేశీయ ఇంధన బిల్లు భారీగా తగ్గుతుంది. వాహనాల నుండి వెలువడే కాలుష్య ఉద్గారాలు గణనీయంగా తగ్గుతాయి. ఇథనాల్ తయారీకి వ్యవసాయ ఉత్పత్తులను ముడిసరుకుగా వాడటం వల్ల గ్రామీణ ఆర్థిక వ్యవస్థ బలోపేతమవుతుంది.

అయితే, సాంకేతికత సిద్ధంగా ఉన్నప్పటికీ, దేశవ్యాప్తంగా వంద శాతం ఇథనాల్ ఇంధనం ఇంకా పూర్తి స్థాయిలో అందుబాటులోకి రాకపోవడం వల్ల ఈ కార్ల వాడకం ప్రారంభంలో నెమ్మదిగా సాగే అవకాశం ఉంది. ప్రస్తుతం భారత్‌లో 20 శాతం ఇథనాల్ కలిపిన పెట్రోల్ మాత్రమే అందుబాటులో ఉంది. భవిష్యత్తులో దీనిని మరికొంత శాతానికి పెంచేందుకు ప్రభుత్వం కసరత్తు చేస్తోంది. ఏదేమైనా, మారుతి సుజుకి తీసుకోబోయే ఈ చొరవ భారతదేశ హరిత ఇంధన ప్రయాణంలో ఒక మైలురాయిగా నిలవనుంది.