New Car Launches May 2026 : మే నెలలో కార్ల జాతర.. రోడ్ల మీద మెరవనున్న 5 అద్భుతమైన కొత్త మోడల్స్

New Car Launches May 2026 : భారతీయ ఆటోమొబైల్ ప్రేమికులకు వచ్చే నెల అంటే మే 2026 ఒక పండగలా మారబోతోంది. సమ్మర్ హీట్‌కు ధీటుగా కార్ల మార్కెట్ కూడా వేడెక్కుతోంది. ఈ నెలలో ఒకటి కాదు రెండు కాదు.. ఏకంగా ఐదు అద్భుతమైన కార్లు రోడ్ల మీదకు రావడానికి రెడీ అయిపోయాయి. ఇందులో మధ్యతరగతి వాసులకు ఇష్టమైన బ్రెజా నుంచి, 90వ దశకంలో దుమ్మురేపిన సియెర్రా ఈవీ వరకు అన్నీ ఉన్నాయి. పెట్రోల్ కార్లతో పాటు ఎలక్ట్రిక్ వాహనాల (EV) జాతర కూడా ఈసారి గట్టిగానే ఉండబోతోంది.

1. మారుతి సుజుకి బ్రెజా ఫేస్‌లిఫ్ట్

సబ్-కాంపాక్ట్ ఎస్‌యూవీ విభాగంలో మారుతి బ్రెజా అంటే ఒక నమ్మకం. ఇప్పుడు ఈ కారును మరింత పవర్‌ఫుల్‌గా మార్చేందుకు మారుతి సిద్ధమైంది. ఇందులో కొత్తగా 1.0 లీటర్ బూస్టర్‌జెట్ టర్బో పెట్రోల్ ఇంజన్‌ను ప్రవేశపెడుతున్నారు. ఇది 100 బీహెచ్‌పీ శక్తిని ఇస్తూ.. హైవేలపై దూసుకుపోవడానికి సిద్ధంగా ఉంది. అంతేకాదు, ఇందులో కొత్తగా 6-స్పీడ్ మాన్యువల్ గేర్‌బాక్స్ రాబోతోంది. దీనివల్ల డ్రైవింగ్ అనుభూతి మరింత స్మూత్‌గా మారుతుంది. దీని ధర దాదాపు రూ.9 లక్షల నుంచి రూ.15 లక్షల వరకు ఉండే అవకాశం ఉంది.

2. టాటా సియెర్రా ఈవీ

ఒకప్పుడు కుర్రాళ్ల కలల రాణిగా ఉన్న టాటా సియెర్రా.. ఇప్పుడు సరికొత్త ఎలక్ట్రిక్ రూపంలో మళ్లీ పునర్జన్మ ఎత్తుతోంది. మే మధ్యలో రానున్న ఈ ఈవీ కారులో మూడు రకాల బ్యాటరీ ఆప్షన్లు ఉండనున్నాయి. ఒక్కసారి ఛార్జ్ చేస్తే ఏకంగా 550 కిలోమీటర్ల దూరం వెళ్తుందట. పాత సియెర్రాలో ఉన్న సిగ్నేచర్ గ్లాస్ రూఫ్ ఈ కొత్త మోడల్‌లో కూడా హైలైట్‌గా నిలవనుంది. దీని ధర రూ.20 లక్షల నుంచి రూ.30 లక్షల మధ్య ఉండవచ్చని సమాచారం.

3. ఫోక్స్‌వ్యాగన్ వర్టస్ ఫేస్‌లిఫ్ట్

సెడాన్ కార్ల ప్రేమికుల కోసం ఫోక్స్‌వ్యాగన్ తన వర్టస్ మోడల్‌ను మరింత స్టైలిష్‌గా ముస్తాబు చేస్తోంది. ఇందులో కొత్తగా కనెక్టెడ్ లైట్ బార్, ఇల్యూమినేటెడ్ లోగో వంటి ఫీచర్లు యాడ్ అవుతున్నాయి. అన్నింటికంటే ముఖ్యంగా, ఇందులో పాత గేర్‌బాక్స్ ప్లేస్‌లో సరికొత్త 8-స్పీడ్ ఆటోమేటిక్ గేర్‌బాక్స్ వస్తోంది. ఇది డ్రైవర్‌కు మంచి కంఫర్ట్‌ను ఇస్తుంది. దీని ధర రూ. 11 లక్షల నుంచి రూ. 19 లక్షల వరకు ఉండవచ్చు.

4. స్కోడా స్లావియా ఫేస్‌లిఫ్ట్

స్కోడా స్లావియా కూడా మే నెలలో కొత్త హంగులతో మెరవబోతోంది. బయటి వైపు కొత్త బంపర్, ఎల్‌ఈడీ హెడ్ లైట్లతో పాటు లోపల లగ్జరీ ఫీచర్లు భారీగా పెంచారు. 10.25 అంగుళాల డిజిటల్ స్క్రీన్, రియర్ సీట్ మసాజర్ వంటివి ఈ కారును ప్రీమియం సెగ్మెంట్‌లో నిలబెడుతున్నాయి. ఫీచర్లు ఇష్టపడే వారికి ఈ కారు బెస్ట్ ఆప్షన్. దీని ధర కూడా రూ.11 లక్షల నుంచి రూ.19 లక్షల మధ్యే ఉండనుంది.

5. టాటా సఫారీ ఈవీ

పెద్ద ఫ్యామిలీలకు టాటా సఫారీ అంటే ఒక రాయల్ లుక్. ఇప్పుడు ఇదే కారు ఎలక్ట్రిక్ వెర్షన్‌లో రాబోతోంది. 7 సీట్ల సామర్థ్యంతో వచ్చే ఈ ఎస్‌యూవీ 550 కిలోమీటర్ల రేంజ్ ఇస్తుందని టాటా మోటార్స్ చెబుతోంది. పనోరమిక్ సన్‌రూఫ్, ఏడీఏఎస్ వంటి అధునాతన భద్రతా ఫీచర్లు ఇందులో ఉన్నాయి. దీని ధర రూ.22.5 లక్షల నుంచి రూ.30 లక్షల మధ్య ఉండే ఛాన్స్ ఉంది. ఎలక్ట్రిక్ విభాగంలో ఇది గేమ్ ఛేంజర్ కాబోతోంది.