Maruti Baleno: టాటా ఆల్ట్రోజ్, హ్యుందాయ్ ఐ20లకు గట్టి పోటీ రూ.6 లక్షలకే బాలెనో ఫేస్‌లిఫ్ట్

Maruti Baleno: ప్రముఖ వాహన తయారీ సంస్థ మారుతి సుజుకి తన ప్రజాదరణ పొందిన ప్రీమియం హ్యాచ్‌బ్యాక్ బాలెనో కొత్త ఫేస్‌లిఫ్ట్ మోడల్‌ను భారత మార్కెట్‌లో ఆవిష్కరించింది. రూ.6.10 లక్షల ప్రారంభ ఎక్స్-షోరూమ్ ధరతో వచ్చిన ఈ కారులో లెవెల్ 2 అడాస్ టెక్నాలజీతో పాటు అధునాతన ఫీచర్లను కంపెనీ జతచేసింది. మారుతి సుజుకి కొత్త బాలెనో ఫేస్‌లిఫ్ట్‌ను రూ.6.10 లక్షల ప్రారంభ ఎక్స్-షోరూమ్ ధరతో మార్కెట్లోకి తీసుకొచ్చింది. ఈ మోడల్ బుకింగ్స్ నెక్సా డీలర్‌షిప్‌ల ద్వారా అధికారికంగా ప్రారంభమయ్యాయి. ప్రీమియం హ్యాచ్‌బ్యాక్ విభాగంలో పోటీగా ఉన్న టాటా ఆల్ట్రోజ్, హ్యుందాయ్ ఐ20 కార్లకు గట్టి పోటీ ఇచ్చేందుకు మారుతి సుజుకి ఈ కార్‌ను సర్వాంగ సుందరంగా తీర్చిదిద్దింది. కొత్త ఇంజిన్, ఆధునిక సేఫ్టీ ఫీచర్లను జతచేయడం ద్వారా కస్టమర్లను మరింతగా ఆకట్టుకునే ప్రయత్నం చేసింది.

నయా లుక్ తో సరికొత్త ఫ్రంట్ డిజైన్

బాహ్య రూపురేఖల విషయానికి వస్తే కొత్త బాలెనోలో పలు ఆకర్షణీయమైన మార్పులు చేశారు. ముందుభాగంలో పెద్ద బ్లాక్ హారిజాంటల్ స్లాట్ గ్రిల్, కొత్తగా రూపొందించిన బంపర్, మారిన ఫాగ్ లాంప్ హౌసింగ్ లభిస్తున్నాయి. మరింత స్లిమ్‌గా ఉన్న ఎల్ఈడీ హెడ్‌లాంప్‌లు, కొత్త 16 అంగుళాల అల్లాయ్ వీల్స్, క్రోమ్ ఫినిషింగ్, షార్క్ ఫిన్ యాంటెన్నా వంటివి కారుకు సరికొత్త ప్రీమియం లుక్‌ను అందిస్తున్నాయి. వెనుక బంపర్, టైల్ లాంప్స్ చుట్టూ చిన్నపాటి మార్పులు చేయడంతో పాటు ఎనిగ్మాటిక్ టీల్ అనే సరికొత్త రంగులో కూడా ఈ కారు లభిస్తుంది.

హైటెక్ ఫీచర్లతో అప్‌గ్రేడ్ అయిన కేబిన్

కేబిన్ డిజైన్‌లో మునుపటి లేఅవుట్ కొనసాగించినప్పటికీ, సాంకేతిక ఫీచర్ల పరంగా భారీ అప్‌గ్రేడ్లు అందించారు. వైర్‌లెస్ ఆపిల్ కార్ ప్లే, ఆండ్రాయిడ్ ఆటో సపోర్ట్ చేసే 10.1 అంగుళాల స్మార్ట్‌ప్లే ప్రో+ టచ్‌స్క్రీన్ ఇన్ఫోటైన్‌మెంట్ సిస్టమ్‌ను ఇందులో అమర్చారు. క్లారియన్ ప్రీమియం ఆడియో సిస్టమ్, వెంటిలేటెడ్ ఫ్రంట్ సీట్లు, వైర్‌లెస్ ఛార్జింగ్, హెడ్-అప్ డిస్‌ప్లే, 360 డిగ్రీ కెమెరా, ఆటోమేటిక్ క్లైమేట్ కంట్రోల్ వంటి సదుపాయాలు ప్రయాణాన్ని మరింత సుఖమయం చేస్తాయి. వెనుక సీట్ల ప్రయాణికుల కోసం ఏసీ వెంట్లు, పుష్-బటన్ స్టార్ట్ వంటి ఫీచర్లు కూడా అందుబాటులో ఉన్నాయి.

లెవెల్ 2 అడాస్ రక్షణ, నయా జెడ్-సిరీస్ ఇంజిన్

ఈ కార్‌లో ప్రధాన ఆకర్షణ లెవెల్ 2 అడాస్ (ADAS) సేఫ్టీ సిస్టమ్. కెమెరా, మిల్లీమీటర్ వేవ్ రాడార్ల సాయంతో నడిచే ఈ సాంకేతికతలో అడాప్టివ్ క్రూయిజ్ కంట్రోల్, లేన్ కీప్ అసిస్ట్, అడ్వాన్స్‌డ్ ఎమర్జెన్సీ బ్రేకింగ్, హై-బీమ్ అసిస్ట్ వంటి కీలక రక్షణ వ్యవస్థలు ఉన్నాయి. వీటికి తోడు 6 ఎయిర్‌బ్యాగ్‌లు, ఈఎస్‌సీ, హిల్-హోల్డ్ అసిస్ట్, టైర్ ప్రెజర్ మానిటరింగ్ సిస్టమ్ ప్రామాణికంగా లభిస్తాయి. కారులో కొత్త 1.2 లీటర్ జెడ్12ఈ 3-సిలిండర్ పెట్రోల్ ఇంజిన్‌ను అందించారు. ఇది 5-స్పీడ్ మాన్యువల్, ఏఎమ్‌టీ గేర్‌బాక్స్ వేరియంట్లలో లభిస్తుంది. సీఎన్‌జీ మోడల్‌లో సైతం ఏఎమ్‌టీ ఎంపికను కంపెనీ ప్రవేశపెట్టింది.