Mahindra XEV 9S: ఈవీ మార్కెట్‌లో మహీంద్రా XEV 9S దూకుడు.. ఎంజీ విండ్సర్‌‌కే ఇచ్చిపడేసిందిగా..

Mahindra XEV 9S: దేశీయ ఆటోమొబైల్ దిగ్గజం మహీంద్రా ఎలక్ట్రిక్ వాహనాల మార్కెట్‌లో తిరుగులేని ఆధిపత్యాన్ని ప్రదర్శిస్తోంది. ప్రస్తుత ఆర్థిక సంవత్సరం మొదటి త్రైమాసికంలో ప్యాసింజర్ ఈవీ విభాగంలో XEV 9S మోడల్ సరికొత్త రికార్డు సృష్టించింది. గతంలో అగ్రస్థానంలో ఉన్న ఎంజీ విండ్సర్ ఈవీని వెనక్కి నెట్టి అత్యధికంగా అమ్ముడైన వాహనంగా నంబర్ 1 స్థానాన్ని సొంతం చేసుకుంది.

భారత ఈవీ మార్కెట్లో మహీంద్రా సరికొత్త చరిత్ర సృష్టించింది. గత కొన్ని నెలలుగా మార్కెట్‌లో రారాజుగా ఏలిన ఎంజీ విండ్సర్ ఈవీని దాటుకుని XEV 9S ఎలక్ట్రిక్ ఎస్‌యూవీ అగ్రపీఠాన్ని కైవసం చేసుకుంది. మొదటి త్రైమాసికంలో ఏకంగా 10,762 యూనిట్ల హోల్‌సేల్ విక్రయాలు నమోదు చేసి రికార్డుల వేట ప్రారంభించింది. వినియోగదారుల నుంచి లభిస్తున్న అపూర్వ ఆదరణతో ఈవీ రంగంలో మహీంద్రా గ్రాఫ్ ఒక్కసారిగా ఆకాశాన్ని తాకింది.

దేశంలోనే తొలి 7-సీటర్ ఎలక్ట్రిక్ ఎస్‌యూవీ ప్రత్యేకతలు..

గతేడాది మార్కెట్లోకి అడుగుపెట్టిన మహీంద్రా XEV 9S, భారతదేశంలోనే రూపొందించిన మొదటి ఆథెంటిక్ 7-సీటర్ ఎలక్ట్రిక్ ఎస్‌యూవీగా గుర్తింపు పొందింది. కంపెనీకి చెందిన ప్రత్యేకమైన INGLO ఆర్కిటెక్చర్‌పై దీనిని నిర్మించారు. భారత మార్కెట్‌లో ఈ వాహనం ప్రారంభ ఎక్స్-షోరూమ్ ధర రూ. 19.95 లక్షలుగా నిర్ణయించారు. కస్టమర్ల అవసరాలకు తగినట్లుగా 59 kWh, 70 kWh, 79 kWh అనే మూడు విభిన్న బ్యాటరీ ఆప్షన్లను అందుబాటులోకి తెచ్చారు. ఇవి 281 బిహెచ్‌పి వరకు పీక్ పవర్ అందిస్తూ లాంగ్ డ్రైవ్‌లలో అద్భుతమైన పర్ఫార్మెన్స్ ఇస్తాయి.

రాయల్ డిజైన్.. లగ్జరీ ఇంటీరియర్స్ అండ్ స్పేస్..

ఈ ఎలక్ట్రిక్ ఎస్‌యూవీ డిజైన్ పరంగా చూపుతిప్పుకోనివ్వదు. ఎల్-షేప్ ఎల్‌ఈడీ డీఆర్‌ఎల్‌లు, వెర్టికల్ ప్రొజెక్టర్ హెడ్‌ల్యాంప్‌లు, సరికొత్త మహీంద్రా ఈవీ లోగోతో ఎంతో ఆకర్షణీయంగా ఉంటుంది. మొదటి, రెండవ వరుసల సీట్లకు కలిపి ఏకంగా 4,076 లీటర్ల కేబిన్ స్పేస్ కల్పించడం ఈ కారులోని ప్రధాన ప్రయోజనం. ప్రయాణికులకు లగ్జరీ అనుభూతిని అందించడానికి వెంటిలేటెడ్ సీట్లు, ప్రైవసీ సన్‌షేడ్స్ అమర్చారు. వినోదం కోసం డాల్బీ ఆట్మోస్ సపోర్ట్‌తో కూడిన 16-స్పీకర్ల హార్మన్ కార్డన్ ఆడియో సిస్టమ్, 12.3-ఇంచ్ సైజులో ఉండే మూడు డిజిటల్ స్క్రీన్‌లు అమర్చడం విశేషం.

జులై నెలలో 124 శాతం వార్షిక వృద్ధి..

ఇంధన ధరలు భగ్గుమంటున్న తరుణంలో భారత వాహనదారులు ఈవీ వైపు వేగంగా అడుగులు వేస్తున్నారు. జులై నెలలోనే దేశవ్యాప్తంగా ప్యాసింజర్ ఈవీ విక్రయాలు 81.6 శాతం పెరిగాయి. ఈ క్రమంలో మహీంద్రా ఏకంగా 124 శాతానికి పైగా వార్షిక వృద్ధితో 7,677 యూనిట్లను విక్రయించింది. సొంత అల్ట్రా-ఫాస్ట్ ఛార్జింగ్ నెట్‌వర్క్ విస్తరిస్తుండటంతో ప్రయాణికులు ఎటువంటి టెన్షన్ లేకుండా ఈ మోడల్‌ను ఎంచుకుంటున్నారు.

శక్తివంతమైన పర్ఫార్మెన్స్, విశాలమైన కేబిన్ స్పేస్, ఆధునిక సాంకేతికతల కలయికతో మహీంద్రా XEV 9S ఈవీ విభాగంలో కొత్త ప్రమాణాలను నెలకొల్పి నాటి పోటీదారులకు సవాలు విసురుతోంది. పెరిగిన అమ్మకాల జోరును బట్టి రాబోయే రోజుల్లో మహీంద్రా ఈవీ మార్కెట్లో మరింత తిరుగులేని శక్తిగా అవతరించే అవకాశాలు కనిపిస్తున్నాయి.