Ethanol Blending : కొత్త ఇంధనం.. పాత వాహనం.! మీ బైక్, కారుకు ప్రమాదమా.?

Ethanol Blending : భారతదేశంలో ఇప్పుడు ఎక్కడ చూసినా ఫ్లెక్స్-ఫ్యూయల్ వాహనాలు, ఇథనాల్ ఇంధనాల గురించే చర్చ నడుస్తోంది. ప్రభుత్వం ఇటీవల ఈ22, ఈ25, ఈ27, ఈ30 వంటి అధిక ఇథనాల్-పెట్రోల్ మిశ్రమాలకు సంబంధించిన ఇంధన ప్రమాణాలను అధికారికంగా నోటిఫై చేసింది. ముడి చమురు దిగుమతులను తగ్గించి, పర్యావరణాన్ని కాపాడటానికి ప్రభుత్వం ఇథనాల్ వాడకాన్ని పెంచుతోంది. ఒకవైపు మారుతి సుజుకి వ్యాగన్ఆర్ ఫ్లెక్స్-ఫ్యూయల్ కారును, మరోవైపు హీరో మోటోకార్ప్ స్ప్లెండర్ ప్లస్, హెచ్ఎఫ్ డీలక్స్ ల ఫ్లెక్స్-ఫ్యూయల్ బైకులను మార్కెట్లోకి తెచ్చాయి. అయితే, ఈ తరుణంలో ప్రస్తుతం మార్కెట్లో ఉన్న ఈ20 వాహనాల పరిస్థితి ఏంటనే ప్రశ్న అందరిలోనూ మొదలైంది.

ఈ20 వాహనాలపై అధిక ఇథనాల్ ప్రభావం

ప్రస్తుతం మన దేశంలో అమ్ముడవుతున్న మెజారిటీ వాహనాలు గరిష్టంగా 20 శాతం ఇథనాల్ కలిపిన పెట్రోల్ తో నడవడానికి మాత్రమే సర్టిఫై చేయబడ్డాయి. ఒకవేళ ఇంధనంలో ఇథనాల్ శాతం 20 కంటే ఎక్కువ పెంచితే పాత ఇంజన్లు తట్టుకోలేవు. ఇథనాల్‌కు తేమను అంటే నీటిని త్వరగా ఆకర్షించే గుణం ఉంటుంది. దీనివల్ల లాంగ్ రన్‌లో ఇంజన్ లోపల ఉండే రబ్బర్ సీల్స్, గ్యాస్కెట్లు, ఫ్యూయల్ పంపులు , ఇంజెక్టర్లు దెబ్బతింటాయి. వాహనం మైలేజ్, పర్ఫార్మెన్స్ కూడా తగ్గిపోయే ప్రమాదం ఉంది.

కన్వర్షన్ కిట్లతో మార్చవచ్చా?

సిద్ధాంతపరంగా చూస్తే, సాధారణ పెట్రోల్ బండ్లను ఎక్కువ ఇథనాల్‌తో నడిచేలా మార్చడానికి కన్వర్షన్ కిట్లు అందుబాటులో ఉన్నాయి. అయితే ఈ20 బండిని నేరుగా ఈ85 అంటే 85 శాతం ఇథనాల్ వాహనంగా మార్చడం చాలా ఖరీదైన, సంక్లిష్టమైన ప్రక్రియ. ఎందుకంటే దానికి ఇథనాల్‌కు తట్టుకునే ప్రత్యేక ఫ్యూయల్ పైపులు, ట్యాంకులు , ఇంధన శాతాన్ని గుర్తించే సాఫ్ట్‌వేర్ అవసరమవుతాయి.

కానీ, ఈ20 నుంచి ఈ30 అంటే 30 శాతం ఇథనాల్ కి మారడం కొంచెం సులువు. ఇంధనంలో ఇథనాల్ శాతం తక్కువ మొత్తంలోనే పెరుగుతుంది కాబట్టి, ఈ20 అనుకూల వాహనాలను ఈ30 ఇంధనంతో నడిచేలా మార్చడం సాంకేతికంగా సాధ్యమే. దీనికోసం ప్రత్యేకంగా రూపొందించిన కన్వర్షన్ కిట్లను ఉపయోగించాల్సి ఉంటుంది. ఈ కిట్ల ద్వారా వాహనంలోని ఇంజన్ కంట్రోల్ యూనిట్‌ను రీకాలిబ్రేట్ చేయవచ్చు. అంటే ఇంధన సరఫరాను నియంత్రించే సాఫ్ట్‌వేర్‌లో అవసరమైన మార్పులు చేస్తారు. దీనితో పాటు ఇంధనాన్ని ఇంజన్‌లోకి పంపే పారామితులను సరిచేయడం జరుగుతుంది. అలాగే అవసరమైన చోట్ల ఇంధన వ్యవస్థకు సంబంధించిన కొన్ని విడిభాగాలను మార్చడం ద్వారా పాత ఈ20 వాహనాలను ఈ22, ఈ25, ఈ27 లేదా ఈ30 ఇంధనాలతో కూడా సురక్షితంగా నడిపించుకోవచ్చు. కాకపోతే ప్రస్తుతం అన్ని బండ్లకు సరిపోయే ఒకే రకమైన కిట్ మార్కెట్లో లేదు. కంపెనీలు దీనికి అనుమతులు ఇవ్వాల్సి ఉంటుంది.

యాడిటివ్స్ ఏమైనా పనిచేస్తాయా?

పెట్రోల్‌లో కలిపే కొన్ని యాడిటివ్స్ వల్ల ఇంజన్ లోపల మురికి చేరకుండా, తేమ చేరకుండా కొంతవరకు కాపాడుకోవచ్చు. కానీ, యాడిటివ్స్ వాడినంత మాత్రాన ఒక సాధారణ ఈ20 వాహనం, ఈ85 వాహనంగా మారిపోదు. ఇక్కడ సమస్య ఇంధన నాణ్యతది కాదు, ఇంజన్ తయారీకి వాడిన మెటీరియల్‌ది. కాబట్టి యాడిటివ్స్ కేవలం చిన్న సహాయం మాత్రమే చేయగలవు.

మున్ముందు ఏం జరగబోతోంది?

భవిష్యత్తులో ఈ85 అనే కొత్త ఇంధనం మార్కెట్లోకి వచ్చినా, అది కేవలం ప్రత్యేకంగా తయారైన ఫ్లెక్స్-ఫ్యూయల్ వాహనాల కోసమే ప్రత్యేక ఆప్షన్‌గా అందుబాటులో ఉంటుంది. అదే సమయంలో, ప్రస్తుతం రోడ్లపై ఉన్న కోట్లాది పాత వాహనాల కోసం ఈ20 పెట్రోల్ సరఫరా ఎప్పటిలాగే కొనసాగుతుంది. దేశవ్యాప్తంగా ఈ20 స్థానంలో పూర్తిగా ఈ30 వస్తుందా లేదా అనేది కాలమే నిర్ణయించాలి. కాబట్టి ప్రస్తుతానికి పాత వాహనదారులు కంగారు పడాల్సిన అవసరం లేదు.