Top Selling Cars: టాప్‎లో పంచ్.. దేశంలో అత్యధికంగా అమ్ముడవుతున్న టాప్-5 కార్లు ఇవే

Top Selling Cars: భారతీయ ఆటోమొబైల్ మార్కెట్‌కు ఆగస్టు 2026 నెల అత్యంత ఉత్సాహభరితంగా సాగింది. దేశవ్యాప్తంగా కార్ల అమ్మకాలు భారీగా పెరగగా, వినియోగదారులు తమ కుటుంబ అవసరాలకు తగినట్లుగా వివిధ మోడళ్లను ఎంచుకున్నారు. ఈ నెలలోనూ టాటా మోటార్స్‌కు చెందిన ప్రముఖ మైక్రో ఎస్‌యూవీ టాటా పంచ్ తన సత్తా చాటుతూ మొదటి స్థానాన్ని కైవసం చేసుకుంది. ఇక మిగతా స్థానాల్లో మారుతి సుజుకి కార్లు తమ ఆధిపత్యాన్ని ప్రదర్శించాయి. ఆగస్టు నెలలో అత్యధిక యూనిట్ల అమ్మకాలు జరిపిన టాప్-5 కార్ల వివరాలు, వాటి ధరలు, మైలేజ్, ప్రత్యేకతల గురించి తెలుసుకుందాం.

1. టాటా పంచ్

టాటా మోటార్స్ నుంచి వచ్చిన పాపులర్ మైక్రో ఎస్‌యూవీ టాటా పంచ్ దేశంలోనే అత్యధికంగా అమ్ముడవుతున్న కారుగా రికార్డు సృష్టించింది. ఆగస్టు 2026లో ఈ కారు ఏకంగా 99 శాతం వార్షిక వృద్ధిని నమోదు చేస్తూ మొత్తం 21,320 యూనిట్ల అమ్మకాలను సొంతం చేసుకుంది. ఈ కారు ప్రారంభ ఎక్స్ షోరూమ్ ధర సుమారు రూ.6.13 లక్షల నుంచి రూ.10.20 లక్షల వరకు ఉంది. ఇది పెట్రోల్, సీఎన్‌జీ ఆప్షన్లలో లభిస్తుంది. మైలేజ్ విషయానికి వస్తే, పెట్రోల్ వేరియంట్ లీటర్‌కు 18.8 కి.మీ., అలాగే సీఎన్‌జీ వేరియంట్ కిలోకు 26.99 కి.మీ వరకు మైలేజ్ను అందిస్తుంది.

2. మారుతి సుజుకి వ్యాగన్‌ఆర్

భారతీయ రోడ్లపై ఎప్పటికీ ప్రత్యేక క్రేజ్ ఉన్న మారుతి సుజుకి వ్యాగన్‌ఆర్ టాల్‌బాయ్ హ్యాచ్‌బ్యాక్ రెండో స్థానంలో నిలిచింది. ఆగస్టు 2026లో ఈ కారు 39 శాతం వార్షిక వృద్ధితో మొత్తం 20,180 యూనిట్ల అమ్మకాలను నమోదు చేసింది. దీని ఎక్స్-షోరూమ్ ధర రూ.5.55 లక్షల నుంచి రూ.7.38 లక్షల మధ్య ఉంది. దీని పెట్రోల్ వెర్షన్ లీటర్‌కు దాదాపు 24.35 కి.మీ, సీఎన్‌జీ వెర్షన్ కిలోకు 34.05 కి.మీ. అద్భుతమైన మైలేజ్ను ఇచ్చి వినియోగదారులను ఆకట్టుకుంటోంది.

3. మారుతి సుజుకి స్విఫ్ట్

యువత మనసు దోచుకున్న మారుతి సుజుకి స్విఫ్ట్ హ్యాచ్‌బ్యాక్ ఈ జాబితాలో మూడవ స్థానాన్ని దక్కించుకుంది. ఆగస్టు నెలలో ఈ కారు అద్భుతమైన ప్రతిభ కనబరుస్తూ 60 శాతం వార్షిక వృద్ధితో 19,832 యూనిట్ల అమ్మకాలను సాధించింది. ఈ కారు ఎక్స్ షోరూమ్ ధర రూ. 6.49 లక్షల నుండి రూ. 9.60 లక్షల వరకు ఉంది. కొత్త స్విఫ్ట్ కారు లీటర్ పెట్రోల్‌కు సుమారు 24.8 నుండి 25.75 కి.మీ. వరకు మైలేజ్ ఇస్తుంది.

4. మారుతి సుజుకి ఫ్రాంక్స్

మారుతి సుజుకికి చెందిన ప్రీమియం క్రాస్‌ఓవర్ ఫ్రాంక్స్ మార్కెట్లో దూసుకుపోతోంది. ఆగస్టు 2026లో ఈ కారు 51 శాతం వృద్ధితో మొత్తం 18,730 యూనిట్ల అమ్మకాలను నమోదు చేసి నాల్గవ స్థానంలో నిలిచింది. దీని ఎక్స్ షోరూమ్ ధర సుమారు రూ.7.51 లక్షల నుంచి రూ.13.04 లక్షల మధ్య ఉంది. ఈ స్టైలిష్ కారు లీటర్‌కు 20.01 నుంచి 22.89 కి.మీ. వరకు మైలేజ్ను అందిస్తుంది.

5. మారుతి సుజుకి ఎర్టిగా

పెద్ద కుటుంబాల ప్రయాణానికి అత్యంత అనువైన 7-సీటర్ ఎంపీవీ మారుతి సుజుకి ఎర్టిగా ఈ టాప్-5 జాబితాలో ఐదవ స్థానాన్ని దక్కించుకుంది. ఆగస్టు నెలలో ఈ కారు మొత్తం 18,516 యూనిట్ల అమ్మకాలను సొంతం చేసుకుంది. దీని ఎక్స్ షోరూమ్ ధర రూ. 8.69 లక్షల నుండి రూ. 13.03 లక్షల వరకు ఉంది. అर्टిగా పెట్రోల్ మోడల్ లీటర్‌కు 20.51 కి.మీ., అలాగే సీఎన్‌జీ మోడల్ కిలోకు 26.11 కి.మీ. మైలేజ్ను ఇచ్చి బడ్జెట్ కుటుంబాలకు ఎంతో మేలు చేస్తోంది.