7 Seater Cars: పెద్ద ఫ్యామిలీల కోసం రూ.15 లక్షల లోపు బడ్జెట్‌లో లభించే బెస్ట్ 7-సీటర్ కార్లు ఇవే

7 Seater Cars: మన దేశంలో పెద్ద ఫ్యామిలీలు ఉన్నవారికి ఎప్పుడూ 7-సీటర్ కార్లపై ప్రత్యేకమైన క్రేజ్ ఉంటుంది. అందరూ కలిసి హాయిగా ప్రయాణించడానికి వీలుగా ఉండే కార్ల కోసం చాలా మంది వెతుకుతుంటారు. ముఖ్యంగా రూ. 15 లక్షల బడ్జెట్‌లో లభించే అద్భుతమైన 7-సీటర్ కార్ల జాబితాలో మారుతి, మహీంద్రా, రెనాల్ట్, నిసాన్ వంటి ప్రముఖ కంపెనీల వాహనాలు అందుబాటులో ఉన్నాయి. తక్కువ ధరలో ఎక్కువ స్పేస్, మంచి మైలేజ్ అందించే ఆ కార్ల వివరాలు ఇప్పుడు చూద్దాం.

నిసాన్ గ్రావైట్, రెనాల్ట్ ట్రైబర్ ప్రత్యేకతలు

నిసాన్ గ్రావైట్, రెనాల్ట్ ట్రైబర్ కార్లు ఒకే ప్లాట్‌ఫారమ్‌పై రూపుదిద్దుకున్న కాంపాక్ట్ ఎంపీవీలు. ఈ రెండు కార్లలోనూ 1.0-లీటర్ 3-సిలిండర్ పెట్రోల్ ఇంజిన్ వస్తుంది. ఇది 71bhp పవర్, 96Nm టార్క్ ఉత్పత్తి చేస్తుంది. వీటిలో 5-స్పీడ్ మాన్యువల్, 5-స్పీడు AMT గేర్‌బాక్స్ ఆప్షన్లు ఉన్నాయి. ముఖ్యంగా గ్రావైట్లో ఫ్యాక్టరీ ఫిటెడ్ సీఎన్‌జీ ఆప్షన్ లభిస్తుండగా, ట్రైబర్లో డీలర్ లేదా ఆఫ్టర్‌మార్కెట్ ద్వారా సీఎన్‌జీ కిట్ అమర్చుకోవచ్చు. ఈ కార్ల ప్రత్యేకత ఏమిటంటే వీటి మూడో వరుస సీట్లను పూర్తిగా తొలగించవచ్చు. అలాగే రెండో వరుస సీట్లను ఫోల్డ్ చేయడం ద్వారా 1,000 లీటర్లకు పైగా భారీ బూట్ స్పేస్‌ను పొందవచ్చు. 8-అంగుళాల టచ్‌స్క్రీన్, వైర్‌లెస్ ఆపిల్ కార్‌ప్లే, ఆండ్రాయిడ్ ఆటో, క్రూయిజ్ కంట్రోల్ వంటి అధునాతన ఫీచర్లు ఇందులో ఉన్నాయి. ముంబైలో ఈ కార్ల ఆన్-రోడ్ ధర సుమారు రూ.6.81 లక్షల నుంచి రూ.10.80 లక్షల వరకు ఉంది.

కఠినమైన రోడ్లకు మహీంద్రా బొలెరో

సాధారణ ఎంపీవీల కంటే మరింత పటిష్టంగా, పవర్‌ఫుల్‌గా ఉండే 7-సీటర్ ఎస్‌యూవీ కావాలనుకునే వారికి మహీంద్రా బొలెరో ఒక అద్భుతమైన ఎంపిక. ఇందులో 1.5-లీటర్ 3-సిలిండర్ టర్బో డీజిల్ ఇంజిన్ ఉంటుంది. ఇది సుమారు 75bhp పవర్, 210Nm టార్కును ఉత్పత్తి చేస్తుంది. కేవలం 5 స్పీడు మాన్యువల్ గేర్‌బాక్స్, రియర్-వీల్ డ్రైవ్‌తో ఇది వస్తుంది. ల్యాడర్-ఫ్రేమ్ ఛాసిస్ ఆధారంగా తయారవ్వడం వల్ల ఇది ఎంతటి చెడ్డ రోడ్లపైనైనా అద్భుతమైన పనితీరును కనబరుస్తుంది. బొలెరోలో 7-అంగుళాల టచ్‌స్క్రీన్, డిజిటల్ ఇన్‌స్ట్రుమెంట్ క్లస్టర్, పవర్ స్టీరింగ్, సెంట్రల్ లాకింగ్, ఫోల్డింగ్ థర్డ్ రో సీట్లు వంటి ఫీచర్లు లభిస్తాయి. ముంబైలో దీని ఆన్-రోడ్ ధర సుమారు రూ. 10.16 లక్షల నుంచి రూ. 11.91 లక్షల మధ్య ఉంది.

అత్యంత ప్రజాదరణ పొందిన మారుతి సుజుకి ఎర్టిగా

ఈ బడ్జెట్‌లో ఎక్కువ మంది ఇష్టపడే 7-సీటర్ కార్లలో మారుతి సుజుకి ఎర్టిగా ముందుంటుంది. ఇందులో 1.5-లీటర్ 4-సిలిండర్ కె15సి స్మార్ట్ హైబ్రిడ్ పెట్రోల్ ఇంజిన్ ఉంటుంది. ఇది 101bhp పవర్ మరియు 139Nm టార్కును ఇస్తుంది. ఇది 5-స్పీడు మాన్యువల్, 6-స్పీడు ఆటోమేటిక్ గేర్‌బాక్స్ ఆప్షన్లతో లభిస్తుంది. అలాగే ఫ్యాక్టరీ ఫిటెడ్ ఎస్-సీఎన్‌జీ వేరియంట్ కూడా అందుబాటులో ఉంది. ఆటోమేటిక్ క్లైమెట్ కంట్రోల్, పుష్-బటన్ స్టార్ట్, క్రూయిజ్ కంట్రోల్, రియర్ పార్కింగ్ కెమెరా, 7-అంగుళాల స్మార్ట్‌ప్లే ప్రో టచ్‌స్క్రీన్, వెనుక భాగంలో రూఫ్-మౌంటెడ్ ఏసీ వెంట్లు ఇందులో ప్రత్యేక ఆకర్షణగా నిలుస్తాయి. ముంబైలో ఎర్టిగా ఆన్-రోడ్ ధర రూ. 10.45 లక్షల నుంచి రూ. 15.47 లక్షల వరకు ఉంది.