Vijayasai Reddy: విజయసాయి రెడ్డి పొలిటీషియన్‌ మాత్రమే కాదు...మంచి ఫ్యామిలీ మ్యాన్‌ కూడా

Vijayasai Reddy: రాజకీయాల గడప దాటితే ప్రశాంతమైన కుటుంబ జీవనాన్ని, ఆత్మీయ బంధాలను అమితంగా ప్రేమించే వ్యక్తి వేణుంబాల విజయసాయిరెడ్డి. పార్లమెంటులో ఎన్నో కీలక బిల్లులు ప్రవేశపెడుతూ, రాష్ట్ర రాజకీయాల్లో అత్యంత వ్యూహాత్మకంగా వ్యవహరించే ఒక పవర్ ఫుల్ పొలిటీషియన్‌ వెనుక, ఒక బాధ్యతాయుతమైన భర్త, ఒక ప్రేమాస్పదుడైన తండ్రి, మామ, బంధుత్వాలకు విలువ ఇచ్చే నిలువెత్తు ఆత్మీయుడు ఉన్నాడు. 1957 జూలై 1న పొట్టి శ్రీరాములు నెల్లూరు జిల్లా తాళ్లపూడి గ్రామంలో ఒక వ్యవసాయ కుటుంబంలో జన్మించిన విజయసాయిరెడ్డి, చార్టర్డ్ అకౌంటెంట్‌గా కెరీర్ ప్రారంభించి ఐదు పదుల వయసు దాటాక రాజకీయ రంగంలోకి అడుగుపెట్టినప్పటికీ, కుటుంబ సంబంధాలకు ఎప్పుడూ మొదటి ప్రాధాన్యతే ఇస్తూ వచ్చారు.

విజయసాయిరెడ్డి ఫ్యామిలీ బ్యాక్‌గ్రౌండ్‌

1957 జులై 1న నెల్లూరు జిల్లాలో వ్యవసాయ కుటుంబంలో జన్మించిన విజయసాయి రెడ్డి చెన్నైలో సీఏ పూర్తిచేసి వీఎస్‌ రెడ్డి ఎస్పీ అండ్‌ అసోసియేట్స్‌ పేరుతో చెన్నై, హైదరాబాద్‌, బెంగళూరు నగరాల్లో 22 ఏళ్లకు పైగా సీఏగా ప్రాక్టీస్‌ చేశారు. కాగా, విజయసాయి రెడ్డి భార్య సునంద రెడ్డి. కుమార్రె పెనాక నేహారెడ్డిలు. పెనాక నేహా రెడ్డిని అరబిందో ఫార్మా డైరెక్టర్‌ శరత్‌ చంద్ర రెడ్డి సోదరుడైన రోహిత్‌ రెడ్డితో వివాహం జరిపించడంతో అరబిందో ఫార్మాతో బంధుత్వం ఏర్పడింది. అల్లుడి కుటుంబం అంటే ఆయనకు ఎంతో ప్రేమ. అరబిందో ఫార్మా మంచిచెడ్డలను కూడా ఆయన చూసుకునేవారు. అంతేకాదు, భార్య సునంద రెడ్డి సొంత అక్క కూతురైన అలేఖ్య రెడ్డిని సినీ నటుడు నందమూరి తారకరత్నకు ఇచ్చి చేశారు. ఒక విధంగా చెప్పాలి అంటే విజయసాయిరెడ్డికి తారకరత్న అల్లుడు అవుతాడు.

రాజకీయాల్లో బిజీగా ఉన్నా...

విజయసాయిరెడ్డి రాజకీయ మరియు వ్యాపార సలహాదారుడిగా ఎంతో బిజీగా ఉన్నప్పటికీ, కుటుంబానికి కేటాయించే సమయం విషయంలో ఎప్పుడూ కాంప్రమైజ్ కాకపోవడం ఆయన ప్రత్యేకత. చెన్నై, హైదరాబాద్ వంటి మహానగరాల్లో పెద్ద పెద్ద కార్పొరేట్ కంపెనీలకు ఆడిటింగ్‌లతో రాత్రింబవళ్లు శ్రమించిన రోజుల్లోనూ కుటుంబ పెంపకం, పిల్లల చదువుల బాధ్యతలను బాధ్యతాయుతంగా పర్యవేక్షించారు. ఆయన కుమార్తె నేహా రెడ్డి చదువులోనూ, వ్యక్తిత్వంలోనూ తండ్రి బాటలోనే నిలదొక్కుకోవడంలో సాయిరెడ్డి ప్రోత్సాహం ఎంతో ఉంది. ప్రసిద్ధ ఫార్మా సంస్థ అరబిందో ఫార్మాకు చెందిన రోహిత్ రెడ్డితో నేహా రెడ్డి వివాహం అంబరాన్నంటిన వేడుకగా జరిగింది. రాజకీయాల్లో ఎంతటి తీవ్రమైన నిర్ణయాలు తీసుకున్నా, ఇంటికి రాగానే మనవరాలు, మనవళ్లతో గడపడం ఆయనకు అత్యంత ఇష్టమైన విశ్రాంతి సమయం.

తారకరత్న కుటుంబంతో అనుబంధం

కుటుంబ సంబంధాలలో విజయసాయిరెడ్డి చూపే ఉదారతకు ఒక గొప్ప నిదర్శనం నందమూరి తారకరత్న కుటుంబంతో ఆయనకున్న అనుబంధం. సాయిరెడ్డి భార్య సునంద రెడ్డి అక్క కుమార్తె అలేఖ్య రెడ్డిని తారకరత్న వివాహం చేసుకున్నారు. ఆ రకంగా తారకరత్న సాయిరెడ్డికి అల్లుడు వరస అవుతారు. రాజకీయంగా ప్రత్యర్థి వర్గాలకు చెందిన కుటుంబాలతో బంధుత్వం ఏర్పడినప్పటికీ, సాయిరెడ్డి వ్యక్తిగత బంధానికే ప్రాధాన్యతనిచ్చారు. తారకరత్న అకాల మరణం చెందిన సమయంలో సాయిరెడ్డి చూపిన చొరవ, ఆ కుటుంబానికి వెన్నుముకగా నిలబడిన తీరు ప్రతీ ఒక్కరిని కంటతడి పెట్టించింది. తారకరత్న ఆసుపత్రిలో ఉన్న నాటి నుండి అంతిమ సంస్కారాలు పూర్తయ్యే వరకు పొలిటికల్ అజెండాలను పక్కనపెట్టి, ఒక సొంత తండ్రి స్థానంలో ఉండి అన్ని కార్యక్రమాలను పర్యవేక్షించారు.

వ్యాపార, రాజకీయ ప్రస్థానం

వైఎస్ రాజారెడ్డి ఆహ్వానంతో వైఎస్ కుటుంబ సంస్థల ఆడిటర్‌గా చేరి, ఆ తర్వాత ఉమ్మడి ఏపీ మాజీ సీఎం వైఎస్ రాజశేఖరరెడ్డికి అత్యంత విశ్వసనీయ ఆర్థిక సలహాదారుడిగా మారారు. అంతేకాదు, 2006 నుండి 2010 వరకు టిటిడి పాలకమండలి సభ్యుడిగా, 2006 నుండి 2009 వరకు ఓరియంటల్ బ్యాంక్ ఆఫ్ కామర్స్ డైరెక్టర్ గా సేవలు అందించారు. అంతేకాదు, జగన్ జైలులో ఉన్న సమయంలోనూ వైఎస్ భారతికి అండగా నిలిచి జగతి పబ్లికేషన్స్ పర్యవేక్షణ చూశారు. 2011లో వైఎస్సార్ కాంగ్రెస్ పార్టీ ఆవిర్భావం నుండి జాతీయ ప్రధాన కార్యదర్శిగా, రాజ్యసభ ఎంపీగా కీలక పాత్ర పోషించారు. మొత్తంగా చూసుకుంటే, విజయసాయిరెడ్డి అంటే కేవలం ఒక పదునైన వ్యాఖ్యలు చేసే రాజకీయ నాయకుడు, చాణక్యుడి లాంటి ఆడిటర్ మాత్రమే కాదు. ఎంతోమందికి మార్గదర్శకుడిగా, కష్టాల్లో ఉన్న సొంత బంధువులను గుండెలకు హత్తుకునే మంచి మనసున్న ఫ్యామిలీ మ్యాన్ గా ఆయన జీవన శైలి నిలుస్తోంది.