Tirumala: తిరుమల భక్తులకు అలర్ట్: డిసెంబర్ నెల TTD ఆర్జిత సేవలు, దర్శన టికెట్ల కోటా విడుదల తేదీలు ఇవే

Tirumala: తిరుమల శ్రీవారి భక్తులకు తిరుమల తిరుపతి దేవస్థానం (TTD) కీలక ప్రకటన చేసింది. డిసెంబర్‌ నెలకు సంబంధించిన ఆర్జిత సేవలు, ప్రత్యేక ప్రవేశ దర్శనాలు, వసతి గదుల కోటా విడుదల తేదీల వివరాలను వెల్లడించింది. భక్తులు TTD అధికారిక వెబ్‌సైట్ (https://ttdevasthanams.ap.gov.in) ద్వారా టికెట్లు బుక్ చేసుకోవాలని సూచించింది.

ఈ నెల 19న (ఉదయం 10 గంటలకు) సుప్రభాతం, తోమాల, అర్చన, అష్టదళ పాదపద్మారాధన వంటి ఆర్జిత సేవల ఆన్‌లైన్ కోటా విడుదల.

ఈ సేవా టికెట్ల డిప్ కోసం ఈ నెల 21 ఉదయం 10 గంటల వరకు ఆన్‌లైన్‌లో పేర్లు నమోదు చేసుకోవచ్చు. డిప్‌లో ఎంపికైన వారు 21 నుంచి 23వ తేదీ మధ్యాహ్నం 12 గంటలలోపు డబ్బులు చెల్లించి టికెట్లు ఖరారు చేసుకోవాలి.

ఈ నెల 22న (ఉదయం 10 గంటలకు): కల్యాణోత్సవం, ఊంజల్‌సేవ, ఆర్జిత బ్రహ్మోత్సవం, సహస్రదీపాలంకార సేవ, పుష్పయాగం టికెట్ల విడుదల.

ఈ నెల 22న (మధ్యాహ్నం 3 గంటలకు): వర్చువల్ సేవలు, వాటి దర్శన స్లాట్ల కోటా విడుదల.

ఈ నెల 23న (ఉదయం 10 గంటలకు): అంగ ప్రదక్షిణం టోకెన్ల కోటా విడుదల.

ఈ నెల 23న (ఉదయం 11 గంటలకు): శ్రీవాణి ట్రస్టు బ్రేక్ దర్శనం కోటా విడుదల.

ఈ నెల 23న (మధ్యాహ్నం 3 గంటలకు): వృద్ధులు, దీర్ఘకాలిక వ్యాధిగ్రస్థులు, దివ్యాంగుల ఉచిత ప్రత్యేక ప్రవేశ దర్శన టోకెన్ల కోటా విడుదల.

ఈ నెల 24న (ఉదయం 10 గంటలకు): డిసెంబర్‌ నెల రూ.300 ప్రత్యేక ప్రవేశ దర్శనం టికెట్ల కోటా విడుదల.

ఈ నెల 24న (మధ్యాహ్నం 3 గంటలకు): తిరుమల, తిరుపతిలలో అద్దె గదుల బుకింగ్ కోటా విడుదల.