Chandrababu: విశాఖకు రూ.15 లక్షల కోట్లతో గూగుల్.. సీఎం చంద్రబాబు సంచలన ప్రకటన!

Chandrababu: గత ప్రభుత్వంలో ఒక నెల పింఛను తీసుకోకపోతే వెంటనే రద్దు చేసేవారని.. కానీ, తమ కూటమి ప్రభుత్వం అధికారంలోకి వచ్చిన తర్వాత పేదల ఇబ్బందులను గమనించి 3 నెలల వరకు పింఛను తీసుకునే వెసులుబాటు కల్పించిందని ఆంధ్రప్రదేశ్ ముఖ్యమంత్రి నారా చంద్రబాబు నాయుడు అన్నారు. రాష్ట్రవ్యాప్తంగా ప్రతి పేద కుటుంబాన్ని ఆర్థికంగా ఆదుకునేలా ఒక్కో ఇంటికి దాదాపు 3 నుంచి 4 సంక్షేమ పథకాలను అమలు చేస్తున్నట్లు ఆయన స్పష్టం చేశారు. కాకినాడ జిల్లా తుని నియోజకవర్గ పరిధిలోని చామవరంలో నిర్వహించిన ‘పేదల సేవ’ కార్యక్రమంలో ముఖ్యమంత్రి చంద్రబాబు నాయుడు పాల్గొని లబ్ధిదారులకు స్వయంగా పింఛన్లు పంపిణీ చేశారు.

ఈ సందర్భంగా ఏర్పాటు చేసిన బహిరంగ సభలో ఆయన మాట్లాడుతూ రాష్ట్ర అభివృద్ధి, పారిశ్రామిక పెట్టుబడులు మరియు రాజకీయ పరిణామాలపై కీలక వ్యాఖ్యలు చేశారు. రాష్ట్ర యువతకు స్థానికంగానే ఉపాధి కల్పించడమే ధ్యేయంగా కూటమి ప్రభుత్వం ముందుకు సాగుతోందని సీఎం తెలిపారు. పరిశ్రమలు వస్తే మన పిల్లలు ఉద్యోగాల కోసం ఎక్కడికో వలస వెళ్లాల్సిన అవసరం లేదని, అందుకోసమే రాష్ట్రానికి ఇప్పటివరకు రూ.23 లక్షల కోట్ల పెట్టుబడులను ఆకర్షించామని వెల్లడించారు.

ఐటీ రంగాన్ని మరింత పరుగులు పెట్టించేలా విశాఖపట్నంలో 'గూగుల్' (Google) సంస్థ రూ.15 లక్షల కోట్ల భారీ పెట్టుబడి పెడుతోందని సీఎం చంద్రబాబు సంచలన విషయాన్ని ప్రకటించారు. యువత నైపుణ్యాలు (Skills) పెంచుకుని ఈ ఉద్యోగ అవకాశాలను అందుకోవాలని పిలుపునిచ్చారు. గ్యాస్ ధరలు పెరిగినప్పటికీ మహిళల సంక్షేమం కోసం ఏడాదికి 3 ఉచిత సిలిండర్ల పథకాన్ని అమలు చేస్తున్నామన్నారు. అలాగే అసెంబ్లీలో మహిళలకు 33 శాతం సీట్లు ఇచ్చి రాజకీయంగా వారిని ఎదిగేలా చేస్తామని హామీ ఇచ్చారు.

రాష్ట్రాన్ని 'ఆరోగ్యాంధ్రప్రదేశ్'గా మార్చడమే తమ సంకల్పమని చంద్రబాబు పేర్కొన్నారు. "గతేడాది 'యోగాంధ్ర' కార్యక్రమాన్ని విజయవంతంగా నిర్వహించాం. ఈసారి రాజధాని అమరావతి కేంద్రంగా పెద్ద ఎత్తున యోగా కార్యక్రమాలు చేపడతాం. ప్రజలు రోజుకు కనీసం అరగంట వ్యాయామం చేస్తే అనారోగ్యాల బారిన పడకుండా ఉండవచ్చు" అని సూచించారు. పింఛన్ల కోసం ప్రజలు ప్రభుత్వ కార్యాలయాల చుట్టూ తిరిగే పని లేకుండా నేరుగా ఇంటికే అందిస్తున్నామని, ఏ సమస్యకైనా ఆన్‌లైన్‌లోనే పరిష్కారం చూపుతూ P4 (People Progress Through Public-Private Partnership) కార్యక్రమం కింద పేదలను ఆదుకుంటున్నామని తెలిపారు. రాష్ట్రాభివృద్ధి కోసం తాను, డిప్యూటీ సీఎం పవన్ కళ్యాణ్ కలిసికట్టుగా పనిచేస్తున్నామని స్పష్టం చేశారు.

తమ ప్రభుత్వం డీఎస్సీ (DSC) నిర్వహించి ఉద్యోగాలను భర్తీ చేస్తుంటే వైసీపీ ఓర్వలేకపోతోందని సీఎం మండిపడ్డారు. "కూటమి ప్రభుత్వ హయాంలో రాష్ట్రాభివృద్ధిని చూసి వైసీపీ నేతలకు ఫ్రస్ట్రేషన్ పెరిగిపోతోంది. అందుకే రాష్ట్రంలో మత విద్వేషాలు సృష్టించేందుకు దుర్మార్గపు కుట్రలు పన్నుతున్నారు. నంద్యాలలో వైఎస్సార్ విగ్రహంపై దాడి చేసి, ఆ నెపం మా కూటమి ప్రభుత్వంపై నెట్టాలని చూశారు. కానీ పోలీసులు ఆరా తీస్తే దారుణంగా విగ్రహాన్ని ధ్వంసం చేసింది వైసీపీ వాళ్లేనని ఆధారాలతో సహా రుజువైంది. కేవలం సానుభూతి కోసమే ఇలాంటి దారుణాలకు ఒడిగడుతున్నారు" అని చంద్రబాబు తీవ్రంగా ధ్వజమెత్తారు.

వైసీపీ చేస్తున్న ఇలాంటి అసత్య ప్రచారాలు, కుట్రల పట్ల ప్రజలు ఎల్లప్పుడూ అప్రమత్తంగా ఉండాలని సీఎం చంద్రబాబు నాయుడు కోరారు. ఇటువంటి దుర్మార్గాలపై కఠినంగా యుద్ధం చేస్తూనే, పేదల కోసం సంక్షేమ పథకాలను నిరంతరాయంగా అమలు చేస్తామని నొక్కి చెప్పారు.