Chandrababu: పీ4 ద్వారా 2.4 లక్షల కుటుంబాలకు సాయం.. సీఎం సంచలన ప్రకటన!

Chandrababu: రాష్ట్ర సమగ్ర సమాచారాన్ని ప్రజలకు స్పష్టంగా తెలియజేయడమే ప్రభుత్వ ప్రథమ ప్రాధాన్యమని ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పష్టం చేశారు. అమరావతి సచివాలయంలో ఏర్పాటు చేసిన మీడియా సమావేశంలో ఆయన ఆర్థికశాఖపై శ్వేతపత్రాన్ని విడుదల చేశారు. ప్రభుత్వం చేపడుతున్న అభివృద్ధి కార్యక్రమాలు, ఎన్డీఏ ప్రభుత్వ పాలనా తీరు మరియు బ్రాండ్ ఆంధ్ర పునరుద్ధరణ చర్యలను ఈ సందర్భంగా ఆయన వివరించారు.

ప్రభుత్వం సరైన దిశలో పనిచేస్తుందనడానికి భోగాపురం అంతర్జాతీయ విమానాశ్రయం ప్రారంభోత్సవమే నిదర్శనమని సీఎం తెలిపారు. ప్రజా జీవితంలో అభివృద్ధి ప్రస్ఫుటంగా కనిపించాలనే ఉద్దేశంతోనే దీనిని అంతర్జాతీయ అనుసంధానానికి గేట్‌వేగా తీర్చిదిద్దామని పేర్కొన్నారు. ఉమ్మడి ఏపీ సమయం నుంచే తెలుగు జాతి శ్రేయస్సు కోసం కష్టపడ్డానని, ప్రస్తుతం ఎన్డీఏ ప్రభుత్వం వచ్చిన తర్వాత 'బ్రాండ్ ఆంధ్ర' స్థానాన్ని మళ్లీ పెంచే చర్యలు చేపట్టామని అన్నారు.

ఉమ్మడి ఏపీ విభజన తర్వాత ఆంధ్రప్రదేశ్ తలసరి ఆదాయం రూ.93,903 గా ఉంటే, సీఏజీఆర్ (CAGR) 13.5 శాతం వృద్ధి స్థాయికి చేరుకున్నామని వెల్లడించారు. అయితే 2019-24 మధ్యకాలంలో జీఎస్‌డీపీ (GSDP) వృద్ధిరేటు 3.18 శాతం తగ్గిపోవడం వల్ల రాష్ట్రానికి ఏకంగా రూ. 6.94 లక్షల కోట్ల మేర భారీ నష్టం వాటిల్లిందని ఆవేదన వ్యక్తం చేశారు.

సమాజంలో పేదరికం లేని వాతావరణం చూడాలనే లక్ష్యంతోనే "మార్గదర్శి - బంగారు కుటుంబం" నినాదంతో 'పీ4' (Public-Private-People Partnership) కార్యక్రమాన్ని తీసుకొచ్చినట్లు సీఎం వివరించారు. ఈ పథకం ద్వారా ఇప్పటికే 2.4 లక్షల పేద కుటుంబాలకు ఆర్థిక సాయం అందుతోందని తెలిపారు. ఎస్సీ, ఎస్టీ, బీసీ మరియు మైనార్టీ సంక్షేమానికి పెద్దపీట వేస్తున్నామని, పొదుపు సంఘాల మహిళలకు రూ. 14,757 కోట్లతో సహాయం అందించగా 97 శాతం మంది మహిళలు బ్యాంకింగ్ సేవలను సమర్థవంతంగా వినియోగించుకుంటున్నారని ప్రశంసించారు.

రాష్ట్రానికి భారీగా పెట్టుబడులను ఆకర్షించేందుకు 28 నూతన పారిశ్రామిక విధానాలను ప్రవేశపెట్టామని, వీటి ద్వారా సుమారు రూ. 23 లక్షల కోట్ల విలువైన ఒప్పందాలు (MoUs) కుదుర్చుకున్నామని చెప్పారు. పీపీపీ (PPP) ప్రాజెక్టుల అమలులో ఏపీ దేశంలోనే అగ్రస్థానంలో ఉందన్నారు. రాబోయే రోజుల్లో ఆర్టిఫిషియల్ ఇంటెలిజెన్స్ (AI) సాంకేతికతను ఉపయోగించి ప్రజలకు మరింత వేగవంతమైన, మెరుగైన సేవలు అందిస్తామని సీఎం చంద్రబాబు స్పష్టం చేశారు.