Weather Update: తెలుగు రాష్ట్రాలకు అల్పపీడన గండం.. నేడు భారీ వర్షాలు కురిసే జిల్లాలు ఇవే

Weather Update: ఉమ్మడి తెలుగు రాష్ట్రాల ప్రజలకు వాతావరణ శాఖ ఉపశమనాన్నిచ్చే వార్త అందించింది. దక్షిణ ఛత్తీస్‌గఢ్ ప్రాంతంలో ఏర్పడిన అల్పపీడనం ప్రభావంతో ఏపీ, తెలంగాణలోని పలు జిల్లాల్లో భారీ వర్షాలు కురిసే అవకాశం ఉందని విపత్తు నిర్వహణ సంస్థ అంచనా వేసింది. ప్రస్తుతం దక్షిణ ఛత్తీస్‌గఢ్, దాని పరిసర ప్రాంతాల్లో కొనసాగుతున్న అల్పపీడనం రాబోయే 24 గంటల్లో పశ్చిమ వాయువ్య దిశగా కదులుతూ విదర్భ మీదుగా పయనించే అవకాశం ఉందని అధికారులు తెలిపారు. దీని ప్రభావంతో తీరం వెంట గంటకు 50 నుంచి 60 కిలోమీటర్ల వేగంతో ఈదురుగాలులు వీచే ప్రమాదం ఉందని వాతావరణ శాఖ హెచ్చరించింది. సముద్రం అల్లకల్లోలంగా మారే అవకాశం ఉన్నందున మత్స్యకారులు ఎవరూ వేటకు వెళ్లకూడదని స్పష్టం చేశారు. చెట్ల కింద, ప్రకటనల బోర్డుల వద్ద నిలబడకుండా అప్రమత్తంగా ఉండాలని ప్రజలను కోరారు.

ఆంధ్రప్రదేశ్‌లో ఈ జిల్లాలకు భారీ వర్ష సూచన

ఆదివారం ఆంధ్రప్రదేశ్ లోని పలు జిల్లాల్లో పిడుగులతో కూడిన వర్షాలు కురిసే అవకాశం ఉందని విపత్తు నిర్వహణ సంస్థ ఎండీ ప్రఖర్ జైన్ తెలిపారు. ముఖ్యంగా మన్యం, పోలవరం, అల్లూరి సీతారామరాజు, ఏలూరు జిల్లాల్లో మోస్తరు నుంచి కుండపోత వర్షాలు పడొచ్చని చెప్పారు. వీటితో పాటు అనకాపల్లి, తూర్పుగోదావరి, పశ్చిమగోదావరి, ఎన్టీఆర్, కృష్ణా, గుంటూరు, బాపట్ల, పల్నాడు జిల్లాల్లో ఉరుములు, మెరుపులతో కూడిన మోస్తరు వర్షాలకు అవకాశముంది. రాయలసీమ ప్రాంతాల్లో అక్కడక్కడ తేలికపాటి జల్లులు కురిసే సూచనలు కనిపిస్తున్నాయి.

తెలంగాణలో విస్తారంగా వానలు

అల్పపీడన దెబ్బకు తెలంగాణ వ్యాప్తంగా ఉష్ణోగ్రతలు తగ్గి వాతావరణం చల్లబడింది. నేడు మెదక్, సిద్దిపేట, యాదాద్రి భువనగిరి, మేడ్చల్ మల్కాజిగిరి మీదుగా జనగాం, హన్మకొండ, వరంగల్, కరీంనగర్, జయశంకర్ భూపాలపల్లి, ములుగు, భద్రాద్రి కొత్తగూడెం జిల్లాల్లో భారీ వర్షాలు నమోదయ్యే అవకాశం ఉంది. అలాగే రాజధాని హైదరాబాద్ పరిసర ప్రాంతాలతో పాటు కాజీపేట, మహబూబాబాద్, సూర్యాపేట, నల్గొండలోని పలు ప్రాంతాల్లో మోస్తరు జల్లులు పడే వీలుంది.

ప్రజలు పాటించాల్సిన జాగ్రత్తలు

ప్రమాదకర స్థాయిలో ఉప్పొంగి ప్రవహించే వాగులు, వంకలు, కాలువలు దాటే సాహసం చేయవద్దని అధికారులు స్పష్టమైన ఆదేశాలు జారీ చేశారు. వర్షం కురిసే సమయంలో విద్యుత్ స్తంభాలు, పాత భవనాలు, చెట్ల కింద ఆశ్రయం పొందకూడదు. దిగువ ప్రాంతాల ప్రజలు జాగ్రత్తలు తీసుకోవాలని, అత్యవసర సమయాల్లో ఐఎమ్‌డీ బులెటిన్లను గమనిస్తూ ప్రయాణాలు ప్లాన్ చేసుకోవాలని నిపుణులు సూచిస్తున్నారు.