CM Chandrababu: ఆగస్టు 15 నుంచి రాష్ట్రవ్యాప్తంగా ‘సంజీవని’.. వంటశాలే ఔషధశాల అన్న సీఎం చంద్రబాబు!

CM Chandrababu: "మనం తినే ఆహారమే మనకు తిరుగులేని ఆరోగ్యాన్ని అందిస్తుంది. ఆహారమే ఔషధం, వంటశాలే ఔషధ శాల అనే మాటను నేను ఎప్పుడూ నమ్ముతాను" అని ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఉద్ఘాటించారు. చిత్తూరు జిల్లా పూతలపట్టు నియోజకవర్గం, యాదమరి మండలం కండ్రిగలో నిర్వహించిన ప్రతిష్టాత్మక 'సంజీవని' కార్యక్రమంలో ఆయన పాల్గొన్నారు. ఈ సందర్భంగా ప్రజల ఆరోగ్యానికి కూటమి ప్రభుత్వం ఇస్తున్న ప్రాధాన్యతను సీఎం సుదీర్ఘంగా వివరించారు.

ప్రతి ఒక్కరూ తమ జీవనశైలిలో యోగా, ధ్యానం, ప్రాణాయామం భాగం చేసుకోవాలని, మంచి ఆలోచనలు, వ్యాయామం ద్వారా ఆరోగ్యాన్ని కాపాడుకోవాలని సూచించారు. సంపద ఉన్నవాళ్లకంటే ఆరోగ్యంగా ఉన్నవాళ్లే అసలైన అదృష్టవంతులని ఆయన పేర్కొన్నారు.

రామ-రావణ యుద్ధంలో లక్ష్మణుడి ప్రాణాలు కాపాడేందుకు హనుమంతుడు సంజీవని మూలికను తెచ్చిన స్ఫూర్తితోనే, డిజిటల్ హెల్త్ రికార్డుల ద్వారా ప్రజల ప్రాణాలు కాపాడేందుకు ఈ కార్యక్రమానికి 'సంజీవని' అని పేరు పెట్టినట్లు సీఎం వివరించారు. వ్యాధులు రాకముందే గుర్తించి, నివారించేలా ప్రిడిక్టివ్, ప్రివెంటివ్, క్యూరేటివ్ (Predictive, Preventive, Curative) విధానంలో ఈ ప్రాజెక్టును రూపుదిద్దారు.

సంజీవని పథకం టైమ్‌లైన్ & ముఖ్యాంశాలు:

పైలట్ ప్రాజెక్ట్: గతేడాది జూలైలో కుప్పంలో విజయవంతంగా ప్రారంభం.

జిల్లా వ్యాప్తంగా అమలు: మార్చి 15 నుంచి చిత్తూరు జిల్లాలోని 19.75 లక్షల మంది కోసం అమలు.

రాష్ట్రవ్యాప్త విస్తరణ: ఆగస్టు 15 నుంచి ఆంధ్రప్రదేశ్ అంతటా ఈ ప్రాజెక్టు ప్రారంభం.

కీలక సేవలు: ఈ పథకం ద్వారా ప్రజల ఇళ్ల వద్దే 42 రకాల వైద్య పరీక్షలు నిర్వహించి రిపోర్టులు ఇస్తారు. డిజిటల్ హెల్త్ రికార్డులు, వర్చువల్ డాక్టర్ కన్సల్టేషన్ సేవలు ఉంటాయి. భవిష్యత్తులో ప్రతి వ్యక్తికీ ఒక 'ఏఐ డాక్టర్' (AI Doctor) ద్వారా వైద్య సేవలు అందించేలా సాంకేతికతను వాడుకోనున్నారు.

వైద్యరంగానికి భారీ నిధులు.. రూ.25 లక్షల వరకు భరోసా!

పేద కుటుంబాలపై వైద్య ఖర్చుల భారం పడకుండా చూడడమే ప్రభుత్వ లక్ష్యమని చంద్రబాబు స్పష్టం చేశారు. ఈ క్రమంలోనే కొన్ని కీలక గణాంకాలను పంచుకున్నారు.

ఈ ఏడాది వైద్యరంగానికి రూ.19,305 కోట్లు కేటాయించామని, 15వ ఆర్థిక సంఘం నుంచి దేశంలోనే అత్యధికంగా రూ.2,601 కోట్ల ఆరోగ్య గ్రాంట్లు సాధించామని గుర్తుచేశారు. యూనివర్సల్ హెల్త్ పాలసీ కింద ప్రతి ఒక్కరికీ రూ.2.5 లక్షల విలువైన వైద్యం, ఎన్టీఆర్ వైద్య సేవ, సీఎం రిలీఫ్ ఫండ్ ద్వారా రూ.25 లక్షల వరకు ఖర్చులు భరిస్తామని హామీ ఇచ్చారు.

పర్యావరణ పరిరక్షణ, నీటి నిర్వహణపై సీఎం ప్రత్యేకంగా మాట్లాడారు. సమర్థవంతమైన నీటి యాజమాన్య పద్ధతుల వల్ల అన్నమయ్య జిల్లాలో భూగర్భ జలాలు 8.5 మీటర్లు పెరిగాయని, దీనివల్ల పచ్చదనం పెరిగి ఉష్ణోగ్రతలు తగ్గాయని నివేదికలను ఉటంకించారు. రాష్ట్రవ్యాప్తంగా తీవ్ర ఎండలు ఉన్నప్పటికీ, పిడుగురాళ్లలో 49 డిగ్రీలు నమోదైతే.. అన్నమయ్య జిల్లాలో మాత్రం కేవలం 40 డిగ్రీలే నమోదవడం పర్యావరణ పరిరక్షణకు నిదర్శనమన్నారు.

రాయలసీమను సస్యశ్యామలం చేసేందుకు సాగునీటి ప్రాజెక్టుల పూర్తికి గడువులతో కూడిన క్యాలెండర్ విడుదల చేశామని చంద్రబాబు తెలిపారు. నీవా పనులు పూర్తి చేసి పూతలపట్టు మీదుగా చిత్తూరుకు, కల్యాణి డ్యాంకు కృష్ణా నీటిని తెస్తామని హామీ ఇచ్చారు. గాలేరు-నగరి, మల్లెమడుగు, సోమశిల-స్వర్ణముఖి లింక్ కెనాల్ ప్రాజెక్టులను వేగంగా పూర్తి చేసి ప్రజల భవిష్యత్తుకు భరోసా ఇస్తామని సీఎం చంద్రబాబు నాయుడు స్పష్టం చేశారు.