Dharmavaram: ధర్మవరం రథోత్సవానికి డ్రోన్లతో పటిష్ట భద్రతా ఏర్పాట్లు

Dharmavaram: ధర్మవరం పట్టణంలో జరుగుతున్న శ్రీ లక్ష్మీ చెన్నకేశవ స్వామి బ్రహ్మోత్సవాల్లో భాగంగా రథోత్సవం సందర్భంగా పోలీసులు పటిష్ట భద్రతా ఏర్పాట్లు చేపట్టారు. భక్తుల రద్దీ అధికంగా ఉండనున్న నేపథ్యంలో ఎస్పీ ఎస్. సతీష్ కుమార్ ఆదేశాల మేరకు విస్తృత బందోబస్తు ఏర్పాటు చేశారు.

రథోత్సవం జరిగే ప్రధాన మార్గాలు, దేవాలయ పరిసరాలు, భక్తుల రాకపోకలు అధికంగా ఉండే కూడళ్లు, పార్కింగ్ ప్రదేశాలు, జనసమ్మర్థ ప్రాంతాల్లో డ్రోన్ల సహాయంతో నిఘా కొనసాగిస్తున్నారు. డ్రోన్ కెమెరాల ద్వారా పరిస్థితిని నిరంతరం పర్యవేక్షిస్తూ ఎటువంటి అవాంఛనీయ సంఘటనలు జరగకుండా ముందస్తు చర్యలు తీసుకుంటున్నారు.

అదనంగా ట్రాఫిక్ నియంత్రణ, మహిళల భద్రత, తప్పిపోయే చిన్నారుల గుర్తింపు, అత్యవసర సేవల సమన్వయం కోసం ప్రత్యేక పోలీసు బృందాలను నియమించారు. షీ టీమ్స్, సివిల్ పోలీసులు, ట్రాఫిక్ పోలీసులు సమన్వయంతో విధులు నిర్వర్తిస్తున్నారు.

భక్తులు పోలీసులకు సహకరించి క్రమశిక్షణ పాటించాలని, అనుమానాస్పద వ్యక్తులు లేదా వస్తువులు కనిపిస్తే వెంటనే సమాచారం అందించాలని అధికారులు సూచించారు. ప్రజల భద్రతే ప్రధాన లక్ష్యమని, రథోత్సవం ప్రశాంతంగా జరిగేలా అన్ని చర్యలు తీసుకున్నట్లు పోలీసులు తెలిపారు.