Kerala: చెట్టికులంగర భగవతి అమ్మవారి సేవలో పవన్ కళ్యాణ్!

Kerala: కేరళ రాష్ట్రంలోని అలప్పుజ జిల్లా పరిధిలో చారిత్రక ప్రాశస్త్యం కలిగిన చెట్టికులంగర శ్రీ భగవతి అమ్మవారి ఆలయాన్ని రాష్ట్ర ఉప ముఖ్యమంత్రి పవన్ కళ్యాణ్ దర్శించుకున్నారు. శనివారం సాయంత్రం ఆలయానికి చేరుకున్న ఆయనకు అధికారులు, అర్చక స్వాములు ఆలయ సంప్రదాయాలకు అనుగుణంగా ఘన స్వాగతం పలికారు. అనంతరం ఆలయంలో ప్రత్యేక పూజల్లో పాల్గొని అమ్మవారి ఆశీస్సులు పొందారు.

ఆలయ సంప్రదాయం ప్రకారం ముందుగా బాలశివుని దర్శించుకున్న పవన్ కళ్యాణ్ ప్రత్యేక అర్చనలు నిర్వహించారు. అనంతరం శ్రీ భగవతి అమ్మవారిని దర్శించుకుని పుష్పాంజలి సేవలో పాల్గొన్నారు. అమ్మవారికి పుష్పాలను సమర్పించి ప్రత్యేక పూజలు చేశారు. ఆలయ మేల్ శాంతి ఆధ్వర్యంలో ఉప ముఖ్యమంత్రితో పూజా కార్యక్రమాలు నిర్వహించారు.

చెట్టికులంగర భగవతి అమ్మవారు ఆరోగ్య ప్రదాయినిగా భక్తుల విశ్వాసాలను అందుకుంటున్నారు. అమ్మవారికి పుష్పాంజలి సమర్పిస్తే సర్వదోషాలు తొలగిపోతాయని భక్తుల నమ్మకం. త్రిశక్తి స్వరూపిణిగా కొలిచే అమ్మవారి దర్శనం కోసం వివిధ ప్రాంతాల నుంచి పెద్ద సంఖ్యలో భక్తులు ఈ ఆలయానికి తరలివస్తుంటారు.

అమ్మవారి దర్శనం అనంతరం ఆలయ ప్రాంగణంలోని వినాయకుడు, నాగదేవతలను కూడా పవన్ కళ్యాణ్ దర్శించుకున్నారు. వారికి ప్రత్యేక పూజలు నిర్వహించారు. ఆలయ సంప్రదాయాలు, పూజా విధానాలను అర్చకులు ఉప ముఖ్యమంత్రికి వివరించారు.

ఇదిలా ఉండగా, దసరా శరన్నవరాత్రుల సందర్భంగా చెట్టికులంగర భగవతి అమ్మవారి ఆలయానికి వచ్చే వేలాది మంది భక్తుల కోసం దేవస్థానం నిర్వహించే అన్నదాన కార్యక్రమానికి పవన్ కళ్యాణ్ విరాళం అందించారు. నవరాత్రుల తొమ్మిది రోజుల పాటు భక్తులకు అందించే అన్నదానానికి అయ్యే మొత్తం వ్యయాన్ని దేవస్థానం బోర్డుకు విరాళంగా అందజేశారు.

చెట్టికులంగర శ్రీ భగవతి అమ్మవారి ఆలయానికి వెయ్యి రెండువందల ఏళ్లకు పైగా చరిత్ర ఉన్నట్లు ఆలయ వర్గాలు చెబుతున్నాయి. పురాణ కథనాల ప్రకారం రాక్షస సంహారం కోసం శివుడి మూడో కన్ను నుంచి అమ్మవారు అవతరించినట్లు ప్రతీతి. అందుకే అమ్మవారిని త్రిశక్తి స్వరూపిణిగా భక్తులు ఆరాధిస్తారు.

దసరా శరన్నవరాత్రుల సమయంలో ఆలయంలో ప్రత్యేక పూజలు, ఉత్సవాలు నిర్వహించడం ఆనవాయితీగా వస్తోంది. ఈ తొమ్మిది రోజుల పాటు అమ్మవారి దర్శనం కోసం వేలాది మంది భక్తులు ఆలయానికి చేరుకుంటారు. భక్తుల కోసం దేవస్థానం ఆధ్వర్యంలో అన్నదాన కార్యక్రమాన్ని కూడా నిర్వహిస్తారు.

ఈ నేపథ్యంలో భక్తులకు అన్నదానానికి అయ్యే పూర్తి వ్యయాన్ని విరాళంగా అందించడం ద్వారా పవన్ కళ్యాణ్ తన భక్తి భావాన్ని చాటుకున్నారు. అమ్మవారి దర్శనం, ప్రత్యేక పూజలు, అన్నదానానికి విరాళం అందించడం వంటి కార్యక్రమాలతో చెట్టికులంగర ఆలయంలో పవన్ కళ్యాణ్ పర్యటన సాగింది.