AP: ఏపీలో ఎన్‌సీడీ సర్వే: 2.82 కోట్ల మందికి పూర్తయిన స్క్రీనింగ్!

AP: రాష్ట్రంలో అసాంక్రమిక వ్యాధులను (ఎన్‌సీడీ) ముందుగానే గుర్తించి, సకాలంలో చికిత్స అందించేందుకు ప్రభుత్వం నిర్వహిస్తున్న ఎన్‌సీడీ-4.0 కార్యక్రమం కీలక దశకు చేరుకుంది. ఇప్పటివరకు రాష్ట్రవ్యాప్తంగా 2,82,38,795 మందికి ఎన్‌సీడీ పరీక్షలు పూర్తయ్యాయి. 18 సంవత్సరాలు, అంతకంటే ఎక్కువ వయస్సు ఉన్న జనాభాను లక్ష్యంగా చేసుకుని నిర్వహిస్తున్న ఈ కార్యక్రమంలో ఇప్పటివరకు 66.05 శాతం మందికి స్క్రీనింగ్ పూర్తయిందని రాష్ట్ర వైద్య, ఆరోగ్య శాఖ మంత్రి సత్యకుమార్ యాదవ్ తెలిపారు. ఎన్‌సీడీ-4.0 తాజా పురోగతి నివేదికను రాష్ట్ర ఆరోగ్య, కుటుంబ సంక్షేమ శాఖ కమిషనర్ చక్రధర్ బాబు మంత్రికి నివేదించారు.

86.97 శాతం జనాభాపై సర్వే

2025 సెప్టెంబర్ 17న ప్రారంభమైన ఎన్‌సీడీ-4.0 కార్యక్రమంలో భాగంగా 2026 ఆగస్టు 31 నాటికి 3,71,86,846 మందిపై సర్వే పూర్తయింది. ఇది లక్ష్య జనాభాలో 86.97 శాతానికి సమానం. సర్వేలో భాగంగా సిబ్బంది ఇళ్లకు వెళ్లిన సమయంలో కొందరు అందుబాటులో లేకపోవడం, వలసలు వెళ్లడం, మరణాలు తదితర కారణాలతో ప్రతి ఒక్కరికీ పరీక్షలు నిర్వహించడం సాధ్యం కాలేదని అధికారులు తెలిపారు.

రాష్ట్ర జనాభా 4,27,56,478 మందిగా పరిగణనలోకి తీసుకుని ఇప్పటివరకు 2.82 కోట్ల మందికి పరీక్షలు నిర్వహించారు. మిగిలిన వారిని కూడా గుర్తించి వీలైనంత త్వరగా ఎన్‌సీడీ స్క్రీనింగ్ పూర్తి చేయాలని వైద్య, ఆరోగ్య శాఖ లక్ష్యంగా పెట్టుకుంది.

59.29 లక్షల బీపీ కేసులు

ఎన్‌సీడీ-4.0 కింద నిర్వహించిన పరీక్షల్లో రాష్ట్రంలో ఇప్పటివరకు 59.29 లక్షల అధిక రక్తపోటు కేసులు గుర్తించారు. ఇందులో గతంలో నిర్వహించిన సర్వేల ద్వారా గుర్తించిన కేసులతో పాటు తాజా ఎన్‌సీడీ-4.0 సర్వేలో వెలుగులోకి వచ్చిన కేసులు ఉన్నాయి. తాజా సర్వే ద్వారా మాత్రమే 11.79 లక్షల కొత్త బీపీ కేసులు గుర్తించడం గమనార్హం.

అధిక రక్తపోటు అనేక సందర్భాల్లో స్పష్టమైన లక్షణాలు లేకుండానే కొనసాగుతుండటంతో సాధారణ స్క్రీనింగ్ ప్రాధాన్యత మరింత పెరుగుతోందని వైద్య వర్గాలు చెబుతున్నాయి. ప్రారంభ దశలోనే గుర్తించి మందులు, ఆహార నియంత్రణ, వ్యాయామం వంటి చర్యలు చేపట్టడం ద్వారా సమస్యను నియంత్రించవచ్చు.

48.15 లక్షల మధుమేహ కేసులు

రాష్ట్రవ్యాప్తంగా నిర్వహించిన ఎన్‌సీడీ పరీక్షల్లో 48.15 లక్షల మధుమేహ కేసులు గుర్తించారు. వీటిలో తాజా ఎన్‌సీడీ-4.0 సర్వేలో 10.72 లక్షల కొత్త మధుమేహ కేసులు వెలుగులోకి వచ్చాయి. గతంలో జరిగిన సర్వేల్లో గుర్తించిన కేసులు కూడా మొత్తం సంఖ్యలో ఉన్నాయి.

మధుమేహాన్ని ప్రారంభ దశలోనే గుర్తించడం ద్వారా జీవనశైలిలో మార్పులు, వైద్యుల సూచనల మేరకు చికిత్సతో భవిష్యత్ ఆరోగ్య సమస్యలను తగ్గించే అవకాశం ఉంటుందని ప్రభుత్వం ప్రజలకు అవగాహన కల్పిస్తోంది.

క్యాన్సర్‌పై ప్రత్యేక దృష్టి

ఎన్‌సీడీ కార్యక్రమంలో క్యాన్సర్‌ను ప్రారంభ దశలోనే గుర్తించేందుకు కూడా ప్రత్యేకంగా స్క్రీనింగ్ నిర్వహిస్తున్నారు. క్షేత్రస్థాయిలో అనుమానితులుగా గుర్తించిన 22,110 నోటి క్యాన్సర్, 14,822 రొమ్ము క్యాన్సర్, 18,837 గర్భాశయ ముఖద్వార క్యాన్సర్ కేసులను తదుపరి పరీక్షల కోసం క్యాన్సర్ వైద్య విభాగాలకు పంపించారు.

తదుపరి పరీక్షల్లో 2,026 నోటి క్యాన్సర్, 3,571 రొమ్ము క్యాన్సర్, 2,076 గర్భాశయ ముఖద్వార క్యాన్సర్ కేసులు నిర్ధారణ అయ్యాయి. నిర్ధారణ అయిన కేసులకు సకాలంలో చికిత్స అందిస్తున్నట్లు మంత్రి సత్యకుమార్ యాదవ్ తెలిపారు. క్యాన్సర్‌ను ప్రారంభ దశలో గుర్తించడం ద్వారా చికిత్స ఫలితాలు మెరుగుపడే అవకాశం ఉండటంతో స్క్రీనింగ్‌ను విస్తృతంగా నిర్వహిస్తున్నామని పేర్కొన్నారు.

బీపీ కేసుల్లో బాపట్ల టాప్

జిల్లాల వారీగా పరిశీలిస్తే అధిక రక్తపోటు కేసుల శాతంలో బాపట్ల జిల్లా 19.65 శాతంతో మొదటి స్థానంలో ఉంది. డా. బి.ఆర్. అంబేద్కర్ కోనసీమ 19.45 శాతం, పశ్చిమ గోదావరి 19.05 శాతం, కృష్ణా 17.97 శాతం, తూర్పు గోదావరి 17.77 శాతంతో తర్వాతి స్థానాల్లో ఉన్నాయి.

అదే సమయంలో అల్లూరి సీతారామరాజు జిల్లాలో 5.63 శాతం, శ్రీ సత్యసాయి జిల్లాలో 8.47 శాతం, అన్నమయ్య జిల్లాలో 9.93 శాతం, చిత్తూరు జిల్లాలో 10.10 శాతం, కర్నూలు జిల్లాలో 10.28 శాతం చొప్పున బీపీ కేసులు నమోదయ్యాయి.

మధుమేహంలోనూ బాపట్లే ముందంజ

మధుమేహం కేసుల శాతంలోనూ బాపట్ల జిల్లా 16.89 శాతంతో మొదటి స్థానంలో ఉంది. పశ్చిమ గోదావరి 15.89 శాతం, తూర్పు గోదావరి 15.23 శాతం, ప్రకాశం 15.19 శాతం, కృష్ణా 15.01 శాతంతో తర్వాతి స్థానాల్లో ఉన్నాయి.

తక్కువ శాతం కేసులు నమోదైన జిల్లాల్లో అల్లూరి సీతారామరాజు 1.51 శాతంతో అత్యల్పంగా ఉంది. పోలవరం 5.88 శాతం, శ్రీ సత్యసాయి 6.56 శాతం, కర్నూలు 6.86 శాతం, పార్వతీపురం మన్యం 7.14 శాతం చొప్పున నమోదయ్యాయి.

అల్లూరిలో ఆరోగ్యకర జీవనశైలి ప్రభావం

గిరిజన జనాభా అధికంగా ఉన్న అల్లూరి సీతారామరాజు జిల్లాలో బీపీ, మధుమేహం కేసుల శాతం రాష్ట్రంలోని అన్ని జిల్లాలతో పోలిస్తే అత్యల్పంగా ఉండటం ప్రత్యేకంగా కనిపిస్తోందని మంత్రి సత్యకుమార్ యాదవ్ తెలిపారు.

గిరిజన ప్రాంతాల్లో కనిపించే సంప్రదాయ జీవన విధానం, సహజ ఆహారానికి ప్రాధాన్యం, నిత్య జీవితంలో అధికంగా ఉండే శారీరక శ్రమ వంటి అంశాలు ఈ ఆరోగ్య ఫలితాలపై ఎంత మేర ప్రభావం చూపుతున్నాయనే విషయాన్ని శాస్త్రీయంగా పరిశీలించాల్సిన అవసరం ఉందన్నారు. సంప్రదాయ జీవన విధానంలోని ఆరోగ్యకరమైన అంశాలను ప్రోత్సహించడంతో పాటు గిరిజన ప్రాంతాల్లో కూడా ఎన్‌సీడీలపై నిరంతర పరీక్షలు, అవగాహన కార్యక్రమాలను కొనసాగిస్తామని చెప్పారు.

మిగిలిన వారు పరీక్షలు చేయించుకోవాలి

ఎన్‌సీడీ-4.0 సర్వే త్వరలో ముగియనున్న నేపథ్యంలో ఇంకా పరీక్షలు చేయించుకోని ప్రజలు వైద్య, ఆరోగ్య శాఖ సిబ్బందికి సహకరించాలని మంత్రి సత్యకుమార్ యాదవ్ విజ్ఞప్తి చేశారు. ఇంటి వద్దకు వచ్చే సిబ్బందికి అవసరమైన వివరాలు అందించి స్క్రీనింగ్ చేయించుకోవాలని సూచించారు.

బీపీ, మధుమేహం వంటి అసాంక్రమిక వ్యాధులను నిర్లక్ష్యం చేయకుండా ముందుగానే గుర్తించడం ద్వారా ఆరోగ్య సమస్యలను నియంత్రించవచ్చని తెలిపారు. రాష్ట్రవ్యాప్తంగా ఎన్‌సీడీ స్క్రీనింగ్‌ను మరింత సమర్థంగా పూర్తి చేసి, గుర్తించిన వారికి నిరంతర చికిత్స, ఫాలోఅప్ అందించేలా చర్యలు తీసుకుంటున్నామని మంత్రి వెల్లడించారు.