Vijayawada: విజయవాడలో ప్రైమ్ వాలీబాల్ లీగ్ ట్రయల్స్ ఘనంగా నిర్వహణ!

విజయవాడ: వాలీబాల్ క్రీడకు తెలుగు రాష్ట్రాల్లో కొత్త దిశను చూపే ప్రయత్నాలు ప్రారంభమయ్యాయి. ఆంధ్రప్రదేశ్, తెలంగాణలో ప్రతిభావంతులైన క్రీడాకారులను గుర్తించి అంతర్జాతీయ స్థాయికి తీసుకెళ్లే లక్ష్యంతో హైదరాబాద్ బ్లాక్ హాక్స్ సంస్థ దీర్ఘకాలిక కార్యాచరణ ప్రణాళికను ప్రకటించింది. ఆ ప్రణాళికలో భాగంగా విజయవాడలో నిర్వహించిన ప్రైమ్ వాలీబాల్ లీగ్ (PVL) ఓపెన్ ట్రయల్స్, అండర్-21 ఎంపిక పరీక్షలు క్రీడా వర్గాల్లో విశేష ఆసక్తిని రేకెత్తించాయి.

విజయవాడలోని వీఆర్ సిద్ధార్థ యూనివర్సిటీలో నిర్వహించిన ఈ ట్రయల్స్‌కు రాష్ట్ర నలుమూలల నుంచి యువ క్రీడాకారులు పెద్ద సంఖ్యలో హాజరయ్యారు. అండర్-21 విభాగంలో 105 మంది, ఓపెన్ విభాగంలో 40 మంది తమ ప్రతిభను ప్రదర్శించారు. ఇందులో ఎంపికైన ప్రతిభావంతులైన ఆటగాళ్లకు ఈ నెల 17న గోవాలో జరిగే ప్రైమ్ వాలీబాల్ లీగ్ ప్లేయర్స్ ఆక్షన్‌లో పాల్గొనే అవకాశం లభించనుంది. దీంతో గ్రామీణ ప్రాంతాల్లోని ప్రతిభకు నేరుగా ప్రొఫెషనల్ లీగ్‌లో అడుగుపెట్టే అవకాశం ఏర్పడుతోంది.

ఈ కార్యక్రమానికి ముఖ్య అతిథిగా హాజరైన రాష్ట్ర క్రీడా, రవాణా శాఖ మంత్రి ఎం. రాంప్రసాద్ రెడ్డి, రెండు తెలుగు రాష్ట్రాల్లో వాలీబాల్ అభివృద్ధికి హైదరాబాద్ బ్లాక్ హాక్స్ గత నాలుగేళ్లుగా చేస్తున్న కృషిని అభినందించారు. గ్రామీణ స్థాయి నుంచి క్రీడాకారులను తీర్చిదిద్దే కార్యక్రమాలకు రాష్ట్ర ప్రభుత్వం అన్ని విధాలా సహకారం అందిస్తుందని స్పష్టం చేశారు.

శాప్ ఛైర్మన్ ఎ. రవి నాయుడు మాట్లాడుతూ, తొలి దశలో జిల్లాలో రెండు ప్రభుత్వ పాఠశాలల్లో వాలీబాల్ శిక్షణ కేంద్రాలు ఏర్పాటు చేసి, ఆ తర్వాత ప్రతి మండలానికి విస్తరించే ప్రణాళికకు ప్రభుత్వం పూర్తి సహకారం అందిస్తుందని తెలిపారు. భవిష్యత్తులో ప్రైమ్ వాలీబాల్ లీగ్ పోటీలను విజయవాడలో నిర్వహించాలని బ్లాక్ హాక్స్ యాజమాన్యాన్ని కోరారు.

హైదరాబాద్ బ్లాక్ హాక్స్ ప్రధాన యజమాని అభిషేక్ రెడ్డి కంకనాల ప్రకటించిన కార్యాచరణ మరింత విస్తృతంగా ఉంది. ప్రతి ఏడాది టాలెంట్ హంట్ నిర్వహించడం, జిల్లా, గ్రామీణ స్థాయి టోర్నమెంట్‌లకు మద్దతు ఇవ్వడం, జాతీయ, అంతర్జాతీయ నిపుణులతో కోచ్‌లకు శిక్షణ అందించడం, ప్రతిభావంతులైన ఆటగాళ్లకు ప్రొఫెషనల్ అవకాశాలు కల్పించడం వంటి అంశాలను ఇందులో చేర్చారు. అలాగే ఆంధ్రప్రదేశ్, తెలంగాణలోని ప్రతి జిల్లాలో రెండు ప్రభుత్వ పాఠశాలలను ఎంపిక చేసి, 6వ తరగతి నుంచి 8వ తరగతి విద్యార్థుల్లో చిన్న వయసు నుంచే వాలీబాల్‌పై ఆసక్తి పెంచే కార్యక్రమాలను ప్రభుత్వంతో కలిసి చేపట్టనున్నట్లు వెల్లడించారు.

ఈ ప్రణాళికతో వాలీబాల్‌ను కేవలం పోటీ క్రీడగా కాకుండా, పాఠశాల స్థాయి నుంచే ప్రతిభను పెంపొందించే వ్యవస్థగా తీర్చిదిద్దాలనే లక్ష్యం కనిపిస్తోంది. ప్రభుత్వం, క్రీడా సంఘాలు, ప్రైవేట్ సంస్థలు కలిసి పనిచేస్తేనే బలమైన క్రీడా ఎకోసిస్టమ్ ఏర్పడుతుందని బ్లాక్ హాక్స్ అభిప్రాయపడుతోంది.

ఇటీవల ఫెడరేషన్ ఇంటర్నేషనల్ డి వాలీబాల్ (FIVB) ప్రైమ్ వాలీబాల్ లీగ్‌ను భారతదేశ తొలి డివిజన్ ప్రొఫెషనల్ వాలీబాల్ లీగ్‌గా గుర్తించడం కూడా ఈ కార్యక్రమానికి మరింత ప్రాధాన్యత తీసుకొచ్చింది. ఈ గుర్తింపుతో భారతీయ క్లబ్‌లకు సెంట్రల్ ఏషియన్ వాలీబాల్ అసోసియేషన్ (CAVA), ఆసియన్ వాలీబాల్ కాన్ఫెడరేషన్ (AVC), అలాగే FIVB ఆధ్వర్యంలోని అంతర్జాతీయ టోర్నమెంట్‌ల్లో పాల్గొనే అవకాశాలు విస్తరించనున్నాయి.

గ్రామీణ ప్రతిభకు ప్రపంచ వేదికను కల్పించాలనే లక్ష్యంతో ప్రారంభమైన ఈ కార్యక్రమం విజయవంతమైతే, తెలుగు రాష్ట్రాలు దేశంలోనే వాలీబాల్‌కు ప్రధాన కేంద్రంగా ఎదిగే అవకాశాలు ఉన్నాయని క్రీడా నిపుణులు భావిస్తున్నారు. ప్రభుత్వ సహకారం, ప్రైవేట్ భాగస్వామ్యం, అంతర్జాతీయ ప్రమాణాల శిక్షణ కలిసి వస్తే, రానున్న రోజుల్లో తెలుగు నేల నుంచి మరిన్ని జాతీయ, అంతర్జాతీయ స్థాయి వాలీబాల్ క్రీడాకారులు వెలుగులోకి రావడం ఖాయమనే ఆశాభావం వ్యక్తమవుతోంది.