P Gannavaram: కోనసీమలో సీఎం చంద్రబాబు పర్యటనకు సర్వం సిద్ధం!

P Gannavaram: ప్రజల మధ్యకు వెళ్లి వారి సమస్యలను తెలుసుకుని పరిష్కరించడమే లక్ష్యంగా ముఖ్యమంత్రి నారా చంద్రబాబు నాయుడు చేపడుతున్న ప్రజా కార్యక్రమాల్లో భాగంగా రేపు డా. బి.ఆర్. అంబేద్కర్ కోనసీమ జిల్లాలో పర్యటించనున్నారు. పి. గన్నవరం నియోజకవర్గ పరిధిలో జరిగే ‘మీ భూమి–మీ హక్కు’ కార్యక్రమంలో సీఎం పాల్గొని అర్హులైన రైతులు, లబ్ధిదారులకు పట్టాదారు పాస్‌పుస్తకాలను పంపిణీ చేయనున్నారు. రైతులతో ముఖాముఖి నిర్వహించి వ్యవసాయం, సాగునీరు, భూ హక్కులు, భూ రికార్డులు తదితర అంశాలపై నేరుగా వారి అభిప్రాయాలను తెలుసుకోనున్నారు.

రైతులతో ముఖాముఖిగా సీఎం

ముఖ్యమంత్రి పర్యటనలో ప్రధాన ఆకర్షణగా రైతులతో ముఖాముఖి కార్యక్రమం నిలవనుంది. మాచవరం గ్రామంలోని జయంతినగర్‌లో ఉదయం 10.55 గంటల నుంచి 11.35 గంటల వరకు రైతులతో సీఎం సమావేశం కానున్నారు. రైతులు ఎదుర్కొంటున్న సమస్యలు, సాగునీటి పరిస్థితులు, భూములకు సంబంధించిన ఇబ్బందులు, రెవెన్యూ రికార్డుల్లో ఉన్న సమస్యలను నేరుగా అడిగి తెలుసుకోనున్నారు. క్షేత్రస్థాయిలో రైతుల నుంచి వచ్చే సూచనలు, సమస్యలకు పరిష్కార మార్గాలను అధికారులకు సూచించే అవకాశం ఉంది.

గ్రామసభలో భూ హక్కులపై దిశానిర్దేశం

పండువారిపేట గ్రామంలో ఏర్పాటు చేసిన గ్రామసభ వేదికగా ‘మీ భూమి–మీ హక్కు’ కార్యక్రమం జరగనుంది. ఉదయం 11.40 గంటల నుంచి మధ్యాహ్నం 1.55 గంటల వరకు సీఎం ఈ కార్యక్రమంలో పాల్గొంటారు. అర్హులైన రైతులు, భూ యజమానులకు పట్టాదారు పాస్‌పుస్తకాలను అందజేస్తారు. భూ హక్కుల పరిరక్షణకు ప్రభుత్వం తీసుకుంటున్న చర్యలను ప్రజలకు వివరించడంతో పాటు, రీ-సర్వే సమస్యలు, రెవెన్యూ సంస్కరణలు, భూ రికార్డుల భద్రతపై అవగాహన కల్పించనున్నారు.

కేవలం పాస్‌పుస్తకాల పంపిణీ కాదు

‘మీ భూమి–మీ హక్కు’ కార్యక్రమాన్ని ప్రభుత్వం కేవలం పట్టాదారు పాస్‌పుస్తకాల పంపిణీ కార్యక్రమంగా కాకుండా భూ హక్కులకు శాశ్వత భరోసా కల్పించే కార్యక్రమంగా అమలు చేస్తోంది. భూమి యాజమాన్యంపై స్పష్టత లేకపోవడం, రికార్డుల్లో తప్పులు, రీ-సర్వేలో తలెత్తిన సమస్యలు, భూ లావాదేవీలకు సంబంధించిన ఇబ్బందులకు పరిష్కారం చూపడంపై ప్రభుత్వం దృష్టి సారించింది. ప్రతి భూ యజమానికి స్పష్టమైన హక్కు కల్పించడం, భూ రికార్డులను ఆధునీకరించడం లక్ష్యంగా చర్యలు చేపడుతోంది.

రీ-సర్వే 2.0తో భూ రికార్డుల ప్రక్షాళన

గతంలో చేపట్టిన రీ-సర్వే ప్రక్రియలో తలెత్తిన సమస్యలను పరిష్కరించేందుకు ప్రభుత్వం రీ-సర్వే 2.0ను అమలు చేస్తోంది. క్షేత్రస్థాయి వాస్తవ పరిస్థితులను పరిశీలించడం, పాత రికార్డులను ఆధునిక సర్వే వివరాలతో సమన్వయం చేయడం, భూముల హద్దులు, యాజమాన్య వివరాలను స్పష్టీకరించడం వంటి చర్యలకు ప్రాధాన్యం ఇస్తోంది. భవిష్యత్‌లో భూ వివాదాలకు అవకాశం లేకుండా సాంకేతిక పరిజ్ఞానాన్ని ఉపయోగించి రికార్డులను భద్రపరచే దిశగా ప్రభుత్వం ముందుకు సాగుతోంది.

36 లక్షలకు పైగా పాస్‌పుస్తకాల పంపిణీ

రాష్ట్రవ్యాప్తంగా కొత్త పట్టాదారు పాస్‌పుస్తకాల పంపిణీని ప్రభుత్వం పెద్ద ఎత్తున చేపట్టింది. ఈ ఏడాది జనవరి నుంచి ఇప్పటివరకు 8,234 గ్రామాల్లో 36 లక్షలకు పైగా పట్టాదారు పాస్‌పుస్తకాల పంపిణీ చేపట్టింది. ఈ నెలలో మరో 783 గ్రామాల్లో దాదాపు నాలుగు లక్షల పాస్‌పుస్తకాలను పంపిణీ చేసేందుకు ఏర్పాట్లు చేసింది. వచ్చే ఏడాది మార్చి నాటికి మిగిలిన 8,582 గ్రామాల్లో 56 లక్షలకు పైగా పాస్‌పుస్తకాలను అందించి కార్యక్రమాన్ని పూర్తి చేయాలని లక్ష్యంగా పెట్టుకుంది.

22-A భూములకు కీలక పరిష్కారం

సీఎం కోనసీమ పర్యటనలో దశాబ్దాలుగా పరిష్కారం కోసం ఎదురుచూస్తున్న గ్రౌండ్ రెంట్ స్థలాల సమస్యకు కూడా కీలక అడుగు పడనుంది. అమలాపురం, అంబాజీపేట, ముమ్మిడివరం, రామచంద్రాపురం ప్రాంతాల్లోని కొన్ని నివాస గ్రౌండ్ రెంట్ స్థలాలు పాత రెవెన్యూ వర్గీకరణ కారణంగా రిజిస్ట్రేషన్ చట్టంలోని సెక్షన్ 22-A(1)(b) కింద నిషేధిత ఆస్తుల జాబితాలో కొనసాగుతున్నాయి.

నాలుగు దశాబ్దాల సమస్యకు తెర

1984 నుంచే గ్రౌండ్ రెంట్ వ్యవస్థ నిలిచిపోయినప్పటికీ పాత రెవెన్యూ రికార్డుల్లోని వర్గీకరణ కారణంగా ఆయా స్థలాల యజమానులు ఇబ్బందులు ఎదుర్కొంటున్నారు. వాస్తవానికి ఈ స్థలాల్లో అనేక కుటుంబాలు దశాబ్దాలుగా నివాసాలు ఏర్పాటు చేసుకుని జీవిస్తున్నాయి. శాశ్వత నిర్మాణాలు ఉన్నప్పటికీ భూములపై ఉన్న నిషేధాల కారణంగా విక్రయాలు, రిజిస్ట్రేషన్లు, ఇతర ఆస్తి లావాదేవీలు నిలిచిపోయే పరిస్థితి నెలకొంది.

1,416 కుటుంబాలకు ప్రయోజనం

క్షేత్రస్థాయి విచారణలు, పాత రెవెన్యూ రికార్డులు, సర్వే వివరాలు, గత రిజిస్ట్రేషన్ లావాదేవీలను పరిశీలించిన అనంతరం నివాస గ్రౌండ్ రెంట్ స్థలాలకు పరిష్కారం చూపేందుకు ప్రతిపాదనలు సిద్ధమయ్యాయి. ఈ స్థలాలను గ్రామకంఠం భూములతో సమానంగా పరిగణించి 22-A నిషేధిత జాబితా నుంచి ప్రత్యేక కేటగిరీగా తొలగించే ప్రతిపాదన పరిశీలనలో ఉంది. ఇది అమలైతే 1,416 కుటుంబాలకు ప్రయోజనం కలగడంతో పాటు 56.37 ఎకరాల భూమిపై ఉన్న ఆంక్షలు తొలగే అవకాశం ఉంది. 1,281 సర్వే నంబర్లకు సంబంధించిన సమస్యకు పరిష్కారం లభించనుంది.

జయంతినగర్‌కు ప్రత్యేక ప్రయోజనం

మాచవరం గ్రామంలోని జయంతినగర్‌కు ఈ నిర్ణయం ప్రత్యేక ప్రాధాన్యతను సంతరించుకుంది. అక్కడ గుర్తించిన 32 మంది అర్హులైన నివాసితులకు కూడా ఈ చర్య ద్వారా ప్రయోజనం కలగనుంది. ఎన్నో ఏళ్లుగా భూమిపై హక్కు ఉన్నప్పటికీ రికార్డుల్లో ఉన్న వర్గీకరణ కారణంగా ఎదుర్కొంటున్న సమస్యలకు పరిష్కారం లభించనుంది. దీంతో ఆయా కుటుంబాలు తమ ఆస్తులపై మరింత స్పష్టమైన హక్కులను పొందే అవకాశం ఏర్పడుతుంది.

రాష్ట్రవ్యాప్తంగా 22-A సమస్యలకు పరిష్కారం

కేవలం కోనసీమకే పరిమితం కాకుండా రాష్ట్రవ్యాప్తంగా దీర్ఘకాలంగా నిషేధిత జాబితాలో ఉన్న భూముల సమస్యలను పరిష్కరించేందుకు ప్రభుత్వం చర్యలు చేపడుతోంది. గత నెలలో ఏలూరు జిల్లాలో కలిదిండి మండలం గురవాయిపాలెం, ముదినేపల్లి మండలం వైవాక, మండవల్లి మండలం ఉనికిలిలో 22-A నిషేధిత జాబితాలో ఉన్న భూములకు విముక్తి కల్పించారు. ఇదే తరహాలో ఇతర జిల్లాల్లోనూ దశాబ్దాలుగా పెండింగ్‌లో ఉన్న భూ సమస్యలను ప్రాధాన్యత క్రమంలో పరిష్కరించే దిశగా చర్యలు కొనసాగుతున్నాయి.

ప్రజల మధ్యే పాలనకు ప్రాధాన్యం

ప్రజల సమస్యలను కార్యాలయాలకే పరిమితం కాకుండా క్షేత్రస్థాయిలో తెలుసుకుని పరిష్కరించాలన్న లక్ష్యంతో ముఖ్యమంత్రి చంద్రబాబు నాయుడు వివిధ కార్యక్రమాల్లో ప్రత్యక్షంగా పాల్గొంటున్నారు. ప్రతి నెలా ఒకటో తేదీన ‘పేదల సేవలో’, మూడో శనివారం ‘స్వర్ణాంధ్ర–స్వచ్ఛాంధ్ర’, నాలుగో శనివారం ‘సంజీవని’, ప్రతి నెలా 9వ తేదీన ‘మీ భూమి–మీ హక్కు’ వంటి కార్యక్రమాల ద్వారా ప్రజలకు చేరువ అవుతున్నారు. పాలనలో ప్రజల భాగస్వామ్యాన్ని పెంచుతూ సమస్యలను నేరుగా తెలుసుకోవడమే ఈ కార్యక్రమాల ప్రధాన ఉద్దేశంగా ప్రభుత్వం చెబుతోంది.

కేడర్‌కు సీఎం దిశానిర్దేశం

కోనసీమ పర్యటనలో భాగంగా బుడుంగపేటలో జరిగే కేడర్ సమావేశంలో కూడా ముఖ్యమంత్రి పాల్గొంటారు. మధ్యాహ్నం 3.15 గంటల నుంచి సాయంత్రం 4.45 గంటల వరకు పార్టీ నాయకులు, ప్రజాప్రతినిధులు, కార్యకర్తలతో సమావేశమై దిశానిర్దేశం చేయనున్నారు. ప్రభుత్వ కార్యక్రమాలను ప్రజల్లోకి తీసుకెళ్లడం, స్థానిక సమస్యల పరిష్కారానికి ప్రజాప్రతినిధులు చొరవ చూపడం, పార్టీ శ్రేణులు ప్రజలకు అందుబాటులో ఉండటం వంటి అంశాలపై సూచనలు చేసే అవకాశం ఉంది.

నీరు జీవం... భూమి జీవితం

వ్యవసాయానికి సాగునీరు ఎంత అవసరమో రైతు జీవితానికి భూమిపై స్పష్టమైన హక్కు కూడా అంతే అవసరమనే భావనతో ప్రభుత్వం భూ సంస్కరణలకు ప్రాధాన్యం ఇస్తోంది. ఒకవైపు సాగునీటి భరోసా, మరోవైపు భూమిపై హక్కు భరోసా కల్పించడమే లక్ష్యంగా చర్యలు చేపడుతోంది. కోనసీమ పర్యటనలో రైతులతో ముఖాముఖి, గ్రామసభ, పట్టాదారు పాస్‌పుస్తకాల పంపిణీతో పాటు దశాబ్దాల భూ సమస్యకు పరిష్కారం చూపే ప్రతిపాదనలపై దృష్టి పెట్టనున్నారు. ప్రజల మధ్య పాలన, భూమిపై హక్కుకు భరోసా, సమస్యలకు శాశ్వత పరిష్కారం అనే లక్ష్యంతో ముఖ్యమంత్రి చంద్రబాబు నాయుడు పర్యటన కొనసాగనుంది.