Amaravati: సెప్టెంబర్ 17న సేవా సంకల్ప్ అభియాన్!

Amaravati: ప్రధాని నరేంద్ర మోదీ జన్మదినం సందర్భంగా దేశవ్యాప్తంగా సేవా కార్యక్రమాలను నిర్వహించేందుకు భారతీయ జనతా పార్టీ కార్యాచరణ సిద్ధం చేస్తోంది. సెప్టెంబర్ 17న మోదీ జన్మదినాన్ని పురస్కరించుకుని ‘సేవా సంకల్ప్ అభియాన్’ పేరుతో విస్తృత స్థాయిలో సేవా కార్యక్రమాలు చేపట్టాలని పార్టీ నిర్ణయించింది. ప్రజా సేవే లక్ష్యంగా వివిధ కార్యక్రమాలను నిర్వహించేందుకు రాష్ట్రాల వారీగా పార్టీ శ్రేణులను సమాయత్తం చేస్తున్నారు.

ఈ కార్యక్రమాల నిర్వహణ, కార్యాచరణపై చర్చించేందుకు ఢిల్లీలో నిర్వహించిన ‘సేవా సంకల్ప్ అభియాన్’ జాతీయ కార్యశాలలో ఏపీ బీజేపీ ప్రతినిధుల బృందం పాల్గొంది. దేశవ్యాప్తంగా చేపట్టాల్సిన సేవా కార్యక్రమాలు, వాటి నిర్వహణ విధానం, పార్టీ శ్రేణుల భాగస్వామ్యంపై జాతీయ నాయకత్వం దిశానిర్దేశం చేసింది.

జాతీయ కార్యశాలలో ఏపీ రాష్ట్ర సంఘటన ప్రధాన కార్యదర్శి మధుకర్ జీ, రాష్ట్ర మంత్రి వై. సత్యకుమార్ యాదవ్, సన్నారెడ్డి దయాకర్ రెడ్డి, కోలా ఆనంద్, నిర్మలాకిషోర్, ఇస్కా సునీల్, కే. నర్సింగ్‌రావు పాల్గొన్నారు. సెప్టెంబర్ 17 నుంచి నిర్వహించనున్న సేవా కార్యక్రమాలను రాష్ట్రంలో విజయవంతం చేసేందుకు తీసుకోవాల్సిన చర్యలపై సమావేశంలో చర్చించారు.

ప్రధాని మోదీ జన్మదినాన్ని కేవలం వేడుకలకే పరిమితం చేయకుండా ప్రజలకు ఉపయోగపడే సేవా కార్యక్రమాలకు వేదికగా మలచాలని బీజేపీ నిర్ణయించింది. పేదలు, వెనుకబడిన వర్గాలు, మహిళలు, యువతతో పాటు వివిధ సామాజిక వర్గాలకు ప్రయోజనం చేకూరేలా కార్యక్రమాలను రూపొందించనున్నట్లు పార్టీ వర్గాలు తెలిపాయి.

దేశవ్యాప్తంగా బీజేపీ కార్యకర్తలు సేవా కార్యక్రమాల్లో భాగస్వాములు అయ్యేలా కార్యాచరణ రూపొందిస్తున్నారు. రక్తదాన శిబిరాలు, ఆరోగ్య పరీక్షలు, పరిశుభ్రత కార్యక్రమాలు, సామాజిక సేవా కార్యక్రమాలతో పాటు ప్రజలకు అవగాహన కల్పించే కార్యక్రమాలను నిర్వహించే అంశంపై దృష్టి సారిస్తున్నారు.

ఏపీలోనూ సెప్టెంబర్ 17 నుంచి సేవా సంకల్ప్ అభియాన్‌ను విస్తృతంగా నిర్వహించేందుకు రాష్ట్ర బీజేపీ నేతలు సిద్ధమవుతున్నారు. కేంద్ర నాయకత్వం సూచనలకు అనుగుణంగా జిల్లాలు, మండలాలు, గ్రామస్థాయిలో పార్టీ శ్రేణులను సమన్వయం చేసి సేవా కార్యక్రమాలను విజయవంతం చేయాలని నిర్ణయించారు. ప్రధాని మోదీ జన్మదినాన్ని పురస్కరించుకుని ప్రజలతో మమేకమై సేవా కార్యక్రమాలను నిర్వహించడమే లక్ష్యంగా బీజేపీ ముందుకు సాగుతోంది.