Amaravathi: ఉద్యోగుల హక్కుల కోసం ఏపీజేఏసీ అమరావతి ఉద్యమబాట!

Amaravathi: ఉద్యోగుల హక్కులు, న్యాయమైన డిమాండ్ల సాధన కోసం ఏపీజేఏసీ అమరావతి మరోసారి ఉద్యమ కార్యాచరణకు సిద్ధమైంది. నేటి నుంచి తొలి దశ ఉద్యమ కార్యక్రమాలను ప్రారంభిస్తున్నట్లు ఏపీజేఏసీ అమరావతి నేతలు బొప్పరాజు, పలిశెట్టి దామోదరరావు ప్రకటించారు.

ఉద్యోగుల సమస్యల పరిష్కారానికి ప్రభుత్వం తక్షణ చర్యలు తీసుకోవాలని డిమాండ్ చేశారు. ఉద్యోగులకు రావాల్సిన బకాయిలు, ఆర్థిక ప్రయోజనాలు అందించాలని కోరుతూ దశలవారీగా నిరసన కార్యక్రమాలు చేపట్టనున్నట్లు తెలిపారు.

తొలి దశ ఉద్యమంలో భాగంగా ఆగస్టు 31న జిల్లా కలెక్టర్లకు PGRS ద్వారా ఉద్యమ నోటీసులు అందించనున్నారు. ఉద్యోగుల సమస్యలను ప్రభుత్వం దృష్టికి తీసుకెళ్లడంతో పాటు, తమ డిమాండ్లపై స్పష్టమైన కార్యాచరణ ప్రకటించాలని కోరనున్నారు. ప్రభుత్వం నుంచి సానుకూల స్పందన రాకపోతే ఉద్యమాన్ని మరింత ఉధృతం చేస్తామని ఏపీజేఏసీ అమరావతి నేతలు స్పష్టం చేశారు.

సెప్టెంబర్ 1న “CM సార్.. మా డబ్బులు మాకివ్వండి” అనే నినాదంతో ఉద్యోగులు వాట్సాప్ DPల ద్వారా నిరసన వ్యక్తం చేయనున్నారు. తమకు రావాల్సిన ఆర్థిక ప్రయోజనాలను ప్రభుత్వం వెంటనే చెల్లించాలని ఈ కార్యక్రమం ద్వారా ప్రభుత్వానికి తెలియజేయనున్నారు. అదే రోజు నుంచి సెప్టెంబర్ 5 వరకు ఉద్యోగులు నల్ల బ్యాడ్జీలు ధరించి విధులకు హాజరై నిరసన తెలపనున్నారు.

ఉద్యమాన్ని క్షేత్రస్థాయికి తీసుకెళ్లేందుకు సెప్టెంబర్ 2 నుంచి 8 వరకు “Hand to Hand” కార్యక్రమాన్ని నిర్వహించనున్నారు. ఉద్యోగులను వ్యక్తిగతంగా కలుసుకుని ఉద్యమ ఉద్దేశాలు, డిమాండ్లను వివరించి వారిని ఉద్యమంలో భాగస్వాములను చేయాలని నిర్ణయించారు. ఉద్యోగులందరూ ఐక్యంగా నిలబడి తమ హక్కుల సాధన కోసం పోరాడాలని ఏపీజేఏసీ పిలుపునిచ్చింది.

అలాగే సెప్టెంబర్ 3, 5 తేదీల్లో రెండు రోజుల పాటు భోజన విరామ సమయంలో నిరసనలు చేపట్టనున్నారు. కార్యాలయాల్లో ఉద్యోగులు Lunch Hour సమయంలో నిరసన కార్యక్రమాలు నిర్వహించి తమ సమస్యలను ప్రభుత్వం దృష్టికి తీసుకెళ్లనున్నారు.

తొలి దశలో మరో కీలక కార్యక్రమంగా సెప్టెంబర్ 11న అన్ని జిల్లా కేంద్రాల్లో Round Table సమావేశాలు నిర్వహించనున్నారు. ఉద్యోగ సంఘాల ప్రతినిధులు, వివిధ వర్గాల ప్రతినిధులతో చర్చించి ఉద్యోగుల సమస్యలు, ప్రభుత్వం నుంచి రావాల్సిన ప్రయోజనాలు, తదుపరి ఉద్యమ కార్యాచరణపై నిర్ణయం తీసుకోనున్నారు.

అయితే ప్రభుత్వం తమ డిమాండ్లపై స్పందించకపోతే సెప్టెంబర్ 15 నుంచి రాష్ట్రవ్యాప్తంగా Work to Rule ఉద్యమాన్ని ప్రారంభిస్తామని ఏపీజేఏసీ అమరావతి నేతలు హెచ్చరించారు. నిబంధనల ప్రకారం మాత్రమే విధులు నిర్వహిస్తూ నిరసనను కొనసాగిస్తామని తెలిపారు. ఉద్యోగులపై అదనపు పనిభారం మోపడం, న్యాయబద్ధమైన ఆర్థిక ప్రయోజనాలను నిలిపివేయడం సరికాదన్నారు.

ఉద్యోగుల న్యాయమైన డిమాండ్లను పరిష్కరించే వరకు ఉద్యమాన్ని కొనసాగిస్తామని బొప్పరాజు, పలిశెట్టి దామోదరరావు స్పష్టం చేశారు. ప్రభుత్వం ఉద్యోగులతో చర్చలు జరిపి సమస్యలకు పరిష్కారం చూపాలని కోరారు. ఉద్యోగుల సమస్యల పరిష్కారం కోసం చేపడుతున్న ఉద్యమానికి అన్ని ఉద్యోగ సంఘాలు, ఉద్యోగులు ఐక్యంగా సహకరించాలని పిలుపునిచ్చారు.