పొగాకు రైతుల సంక్షేమంపై రాజకీయ వేడి.. వైసిపి అధినేత కు మంత్రి అచ్చెన్న బహిరంగ సవాల్..

అమరావతి: ఆంధ్రప్రదేశ్‌లో పొగాకు రైతుల సంక్షేమం అంశం మరోసారి రాజకీయ చర్చకు దారితీసింది. మాజీ ముఖ్యమంత్రి వైఎస్ జగన్‌మోహన్‌రెడ్డి చేసిన విమర్శలకు రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు ఘాటుగా స్పందించారు. రైతుల సంక్షేమంపై వాస్తవాలు, గణాంకాలతో బహిరంగ చర్చకు సిద్ధమా అంటూ జగన్‌మోహన్‌రెడ్డికి సవాల్ విసిరారు.గత వైసీపీ ప్రభుత్వం మరియు ప్రస్తుత కూటమి ప్రభుత్వం పొగాకు రైతుల కోసం తీసుకున్న చర్యలను పోల్చి ప్రజల ముందుకు రావాలని పిలుపునిచ్చారు.

పొగాకు రైతులు సంక్షోభంలో ఉన్న ప్రతిసారీ వారికి అండగా నిలిచింది టీడీపీ నాయకత్వంలోని ప్రభుత్వమేనని మంత్రి అచ్చెన్నాయుడు పేర్కొన్నారు. గత ఏడాది బర్లీ పొగాకు రైతుల నుంచి 25 మిలియన్ కిలోల పొగాకును కొనుగోలు చేసి సుమారు రూ.280 కోట్ల వ్యయంతో రైతులకు ఊరట కల్పించామని గుర్తు చేశారు. అలాగే 2014–15లో ఎఫ్‌సీవీ పొగాకు ధరలు తీవ్రంగా పడిపోయిన సమయంలో, వాణిజ్య పంట అయినప్పటికీ రైతులు నష్టపోకూడదనే ఉద్దేశంతో ప్రతి కిలోకు రూ.20 చొప్పున ఆర్థిక సహాయం అందించామని తెలిపారు. ఇది దేశంలోనే అరుదైన నిర్ణయంగా నిలిచిందని చెప్పారు.

మరోవైపు వైసీపీ ప్రభుత్వ హయాంలో రైతులకు తగిన సహాయం అందలేదని మంత్రి విమర్శించారు. 2019లో సుమారు 124 మిలియన్ కిలోల పొగాకు ఉత్పత్తి కాగా ధరలు కిలోకు రూ.121 నుంచి రూ.123 వరకు పడిపోయాయని, అయినప్పటికీ ప్రభుత్వం కేవలం 11.8 మిలియన్ కిలోల పొగాకును మాత్రమే కొనుగోలు చేసిందని ఆరోపించారు. 2020లో సుమారు 128 మిలియన్ కిలోల ఉత్పత్తి వచ్చినప్పటికీ ఒక్క కిలో కూడా ప్రభుత్వం కొనుగోలు చేయలేదని, రైతులకు అదనపు ఆర్థిక సాయం కూడా అందలేదని పేర్కొన్నారు.

పొగాకు ధరల పెరుగుదలపై కూడా మంత్రి వివరాలు వెల్లడించారు. 2019లో కిలో ధర రూ.142 ఉండగా, 2020లో రూ.140, 2021లో రూ.161, 2022లో రూ.192, 2023లో రూ.248కు చేరిందన్నారు. కూటమి ప్రభుత్వం అధికారంలోకి వచ్చిన తర్వాత 2024లో ధర రూ.326కు చేరగా, 2025లో రూ.300, ప్రస్తుత ఏడాది రూ.275గా నమోదైందని తెలిపారు.

ఈ ఏడాది టొబాకో బోర్డు లక్ష్యం 131 మిలియన్ కిలోల ఉత్పత్తి కాగా, రైతులు సుమారు 241 మిలియన్ కిలోల పొగాకు పండించారని మంత్రి వెల్లడించారు. లక్ష్యానికి మించి ఉత్పత్తి రావడంతో మార్కెట్‌లో ఇబ్బందులు తలెత్తాయని, రైతులను ఆదుకునేందుకు ప్రభుత్వం వెంటనే చర్యలు చేపట్టిందన్నారు. సుమారు 100 మిలియన్ కిలోల అదనపు పొగాకుకు ప్రతి కిలోకు రూ.10 చొప్పున మొత్తం రూ.100 కోట్ల ఆర్థిక సహాయం అందించాలని ప్రభుత్వం నిర్ణయించిందని చెప్పారు. ఈ సాయం పంపిణీని వెంటనే ప్రారంభిస్తున్నామని, అంచనాలకు మించి ఉత్పత్తి అయిన పొగాకుకు కూడా ఇదే విధంగా ప్రతి కిలోకు రూ.10 చొప్పున సహాయం అందించేందుకు ప్రభుత్వం సిద్ధంగా ఉందని వెల్లడించారు.

రాష్ట్ర ప్రభుత్వ చర్యలతో పాటు కేంద్ర ప్రభుత్వం ప్రతి పొగాకు బ్యారన్‌కు రూ.50 వేల వడ్డీలేని రుణం అందిస్తున్న విషయాన్ని కూడా మంత్రి ప్రస్తావించారు. ఈ పరిస్థితుల్లో కూటమి ప్రభుత్వంపై విమర్శలు చేసే ముందు గత ప్రభుత్వ పనితీరును గణాంకాలతో సమీక్షించాలన్నారు. రైతుల సంక్షేమం కోసం ఎవరు నిజంగా పనిచేశారో ప్రజలే నిర్ణయిస్తారని, వాస్తవాల ఆధారంగా బహిరంగ చర్చకు రావాలని జగన్‌మోహన్‌రెడ్డికి మరోసారి సవాల్ విసిరారు.