భూ వివాదాలకు చెక్... 'మీ భూమి' బ్లాక్‌చెయిన్‌ కు ముఖ్యమంత్రి శ్రీకారం

అమరావతి: ఆంధ్రప్రదేశ్‌లో భూ పరిపాలనను పూర్తిగా డిజిటల్‌, పారదర్శకంగా మార్చే దిశగా కూటమి ప్రభుత్వం కీలక అడుగు వేసింది. రాష్ట్రంలో భూ వివాదాలకు శాశ్వత పరిష్కారం చూపాలనే లక్ష్యంతో 'మీ భూమి–బ్లాక్‌చెయిన్' పైలట్ ప్రాజెక్టును ముఖ్యమంత్రి నారా చంద్రబాబు నాయుడు ప్రారంభించారు. భూ రికార్డులను ఎవరూ మార్చలేని విధంగా భద్రపరిచే ఈ వ్యవస్థ భవిష్యత్తులో భూ మోసాలు, డబుల్ రిజిస్ట్రేషన్లు, నకిలీ పత్రాల సమస్యలకు అడ్డుకట్ట వేయగలదనే అంచనాలు ఉన్నాయి.

ఇప్పటి వరకు భూమి రికార్డులు రెవెన్యూ, సర్వే, రిజిస్ట్రేషన్ శాఖల్లో విడివిడిగా ఉండటం వల్ల అనేక వివాదాలు తలెత్తాయి. ఒకే భూమికి రెండుసార్లు రిజిస్ట్రేషన్, రికార్డుల్లో మార్పులు, నకిలీ పాస్‌బుక్లు వంటి సమస్యలు కోర్టుల వరకు వెళ్లేవి. ఈ నేపథ్యంలో "సింగిల్ సోర్స్ ఆఫ్ ట్రూత్" అనే సూత్రంతో మూడు శాఖలను ఒకే డిజిటల్ వేదికపైకి తీసుకురావడమే ఈ ప్రాజెక్టు ప్రధాన ఉద్దేశం.

బ్లాక్‌చెయిన్ టెక్నాలజీ ప్రత్యేకత ఏమిటంటే... ఒకసారి నమోదు చేసిన సమాచారాన్ని ఎవ్వరూ రహస్యంగా మార్చలేరు. ప్రతి మార్పు శాశ్వతంగా నమోదవుతుంది. అందువల్ల భూమి యాజమాన్య చరిత్ర పూర్తిగా భద్రంగా ఉంటుంది. ప్రతి ల్యాండ్ పార్సెల్‌కు ప్రత్యేక డిజిటల్ ఐడీ ఇవ్వడం ద్వారా భూమి వివరాలు స్పష్టంగా అందుబాటులో ఉంటాయి. భవిష్యత్తులో క్యూ ఆర్ కోడ్, ఆధార్ అనుసంధానం కూడా చేయాలని ప్రభుత్వం భావిస్తోంది.

ప్రస్తుతం ఈ పైలట్ ప్రాజెక్టు కర్నూలు, చిత్తూరు, బాపట్ల, కృష్ణా, తూర్పుగోదావరి, పార్వతీపురం మన్యం, విజయనగరం జిల్లాల్లోని ఏడు మండలాల్లో అమలవుతోంది. మొత్తం 89 రీ-సర్వే గ్రామాల్లో 1.37 లక్షలకు పైగా ల్యాండ్ పార్సెల్ మ్యాప్‌లు ఈ వ్యవస్థలోకి తీసుకువస్తున్నారు. రెండు నెలల పాటు పైలట్ అమలును పరిశీలించి, లోపాలను సరిదిద్దిన తర్వాత నవంబర్ నుంచి రాష్ట్రవ్యాప్తంగా విస్తరించేందుకు ప్రభుత్వం లక్ష్యంగా పెట్టుకుంది.

ఈ సందర్భంగా ముఖ్యమంత్రి చంద్రబాబు భూ సమస్యల పరిష్కారానికి ప్రభుత్వం మూడు అంశాలపై దృష్టి పెట్టిందని చెప్పారు. ప్రక్షాళన ద్వారా రికార్డుల శుద్ధి, విముక్తి ద్వారా దశాబ్దాలుగా ఉన్న భూ వివాదాల పరిష్కారం, భద్రత ద్వారా భవిష్యత్తులో వివాదాలు రాకుండా రికార్డులకు సాంకేతిక రక్షణ కల్పించడం జరుగుతోందన్నారు. గతంలో 22-ఏ వంటి నిబంధనల దుర్వినియోగంతో ప్రజలు ఇబ్బందులు పడ్డారని, ఇప్పుడు శాశ్వత పరిష్కార దిశగా చర్యలు తీసుకుంటున్నామని పేర్కొన్నారు.

*బ్లాక్‌చెయిన్ వల్ల కలిగే ప్రయోజనాలు*

భూ రికార్డులను ఎవరూ ట్యాంపర్ చేయలేరు.

డబుల్ రిజిస్ట్రేషన్‌కు అవకాశం ఉండదు.

రెవెన్యూ, సర్వే, రిజిస్ట్రేషన్ శాఖల సమాచారం ఒకే చోట ఉంటుంది.భూమి కొనుగోలు, అమ్మకాలు వేగంగా, పారదర్శకంగా జరుగుతాయి.

కోర్టుల్లో భూ వివాదాలు తగ్గే అవకాశం ఉంటుంది.

ప్రజల్లో భూ యాజమాన్యంపై నమ్మకం పెరుగుతుంది.

*సవాళ్లు కూడా ఉన్నాయి*

అయితే ఈ వ్యవస్థ విజయవంతం కావాలంటే ముందుగా భూ రికార్డులు పూర్తిగా ఖచ్చితంగా ఉండాలి. పాత రికార్డుల్లో తప్పులు ఉంటే అవే డిజిటల్ రూపంలో కొనసాగిపోయే ప్రమాదం ఉంది. గ్రామస్థాయిలో సర్వేలు నాణ్యతగా జరగడం, ఫిర్యాదుల పరిష్కార వ్యవస్థ సమర్థంగా పనిచేయడం కీలకం. అందుకే పైలట్ దశలో కంప్లైంట్ సెల్ ఏర్పాటు చేసి ప్రజల నుంచి అభిప్రాయాలు సేకరించాలని సీఎం సూచించారు.

*రాష్ట్రానికి దీర్ఘకాలిక ప్రయోజనం*

భూమి యాజమాన్యంపై స్పష్టత రావడం వల్ల పెట్టుబడులు పెరిగే అవకాశం ఉంది. పరిశ్రమలు, బ్యాంకులు, రియల్ ఎస్టేట్ రంగాలకు విశ్వసనీయ భూ రికార్డులు అందుబాటులోకి వస్తాయి. కోర్టుల్లో పెండింగ్‌లో ఉన్న భూ వివాదాల సంఖ్య కూడా క్రమంగా తగ్గే అవకాశముంది. ప్రభుత్వం లక్ష్యంగా పెట్టుకున్న "ల్యాండ్ లిటిగేషన్ ఫ్రీ ఆంధ్రప్రదేశ్" సాధనలో ఈ ప్రాజెక్టు కీలక మైలురాయిగా మారే అవకాశం ఉందని అధికారులు భావిస్తున్నారు...