AP: ఏపీలో సినీ పరిశ్రమకు కొత్త ఊపు.. విజయవాడ వేదికగా మంత్రి దుర్గేష్ కీలక పిలుపు!

AP: ఆంధ్రప్రదేశ్‌లో సినిమా పరిశ్రమ అభివృద్ధికి కూటమి ప్రభుత్వం పూర్తిస్థాయిలో కట్టుబడి ఉందని సినిమాటోగ్రఫీ మంత్రి కందుల దుర్గేష్ స్పష్టం చేశారు. సీఎం చంద్రబాబు నాయుడు, డిప్యూటీ సీఎం పవన్ కళ్యాణ్ నాయకత్వంలో రాష్ట్రంలో సినీ పరిశ్రమ విస్తరణకు అనుకూలమైన వాతావరణాన్ని ప్రభుత్వం కల్పిస్తోందన్నారు. విజయవాడ ఏ ప్లస్ కన్వెన్షన్‌లో నిర్వహించిన ‘వెండితెర–ఓటీటీ అవార్డ్స్ 2025–26’, ‘సేవ్ ఆర్టిస్ట్–సేవ్ టాలెంట్’ అవార్డుల ప్రధానోత్సవంలో మంత్రి పాల్గొన్నారు.

ఈ సందర్భంగా మంత్రి మాట్లాడుతూ.. ఆంధ్రప్రదేశ్‌లో సినీ మౌలిక వసతుల అభివృద్ధికి ప్రభుత్వం ప్రత్యేక ప్రాధాన్యత ఇస్తోందన్నారు. సినిమా షూటింగ్‌లకు అవసరమైన అనుమతులను ఉచితంగా, సింగిల్ విండో విధానంలో అందిస్తున్నామని తెలిపారు. రాష్ట్రంలో సినిమాల నిర్మాణానికి అనుకూలమైన వాతావరణాన్ని మరింత బలోపేతం చేయడమే ప్రభుత్వ లక్ష్యమన్నారు.

సినీ పరిశ్రమకు అవసరమైన స్టూడియోలు, షూటింగ్ ప్రదేశాలు, ఇతర మౌలిక సదుపాయాల ఏర్పాటుకు భూములు కేటాయించేందుకు ప్రభుత్వం సిద్ధంగా ఉందని మంత్రి వెల్లడించారు. ఆంధ్రప్రదేశ్‌లో సినీ మౌలిక వసతుల ఏర్పాటుకు టాలీవుడ్ నిర్మాతలు ముందుకు రావాలని పిలుపునిచ్చారు. రాష్ట్రంలోని సహజసిద్ధమైన అందాలు, చారిత్రక ప్రదేశాలు, పర్యాటక ప్రాంతాలను సినిమా షూటింగ్‌లకు మరింతగా వినియోగించుకోవచ్చన్నారు.

హైదరాబాద్ తరహాలో విజయవాడలోనూ సినీ కార్యక్రమాలు, అవార్డు వేడుకలు, సినిమా ప్రమోషన్ ఈవెంట్లు విస్తృతంగా నిర్వహించాలని మంత్రి కోరారు. విజయవాడను సినీ, సాంస్కృతిక కార్యక్రమాలకు ముఖ్య వేదికగా తీర్చిదిద్దేందుకు ప్రభుత్వం సహకరిస్తుందని చెప్పారు. రాష్ట్రంలోని ఇతర ప్రాంతాల్లోనూ సినిమా పరిశ్రమకు అనుకూలమైన వసతులను అభివృద్ధి చేయాల్సిన అవసరం ఉందన్నారు.

సినీ రంగంలో నటీనటులు మాత్రమే కాకుండా వేలాది మంది సాంకేతిక నిపుణులు, కార్మికులు, కళాకారులు ఆధారపడి జీవిస్తున్నారని మంత్రి గుర్తుచేశారు. ప్రతిభ ఉన్న కళాకారులకు అవకాశాలు కల్పించడం, వారి నైపుణ్యాలను ప్రోత్సహించడం ద్వారా సినీ పరిశ్రమను మరింత బలోపేతం చేయవచ్చన్నారు. ‘సేవ్ ఆర్టిస్ట్–సేవ్ టాలెంట్’ వంటి కార్యక్రమాలు కళాకారుల ప్రతిభను గుర్తించి ప్రోత్సహించడంలో కీలకమని పేర్కొన్నారు.

మంత్రి దుర్గేష్ చొరవతో ఆంధ్రప్రదేశ్‌లో చిత్ర పరిశ్రమకు మళ్లీ మంచి రోజులు వస్తున్నాయని సినీ ప్రముఖులు అభిప్రాయపడ్డారు. కార్యక్రమంలో సినీ నిర్మాత కే.ఎస్. రామారావు, నటుడు వడ్డే నవీన్, సంగీత దర్శకుడు రఘు కుంచె, నటుడు రాజీవ్ కనకాల తదితరులు పాల్గొన్నారు.

విజయవాడ వేదికగా జరిగిన ఈ అవార్డుల వేడుక.. రాష్ట్రంలో సినిమా పరిశ్రమకు కొత్త అవకాశాలపై చర్చకు దారితీసింది. ప్రభుత్వ సహకారం, మౌలిక వసతుల కల్పన, సింగిల్ విండో అనుమతులు, షూటింగ్‌లకు అనుకూల వాతావరణంతో ఏపీని సినీ నిర్మాణాలకు మరింత ఆకర్షణీయమైన గమ్యస్థానంగా మార్చే దిశగా కూటమి ప్రభుత్వం అడుగులు వేస్తోందనే సంకేతాన్ని మంత్రి దుర్గేష్ ఇచ్చారు.