Amaravati: అమరావతిలోకి 9 లేన్ల ఇ-3 సీడ్ యాక్సెస్ రోడ్డు అందుబాటులోకి!

అమరావతి: ముఖ్యమంత్రి చంద్రబాబు గురువారం ఇ-3 సీడ్‌ యాక్సెస్‌ రోడ్డు, బకింగ్‌హామ్‌ కెనాల్‌ స్టీల్‌ బ్రిడ్జిని ప్రారంభించనున్నారు. దీంతో విజయవాడ వైపు నుంచి అమరావతి దిశగా వచ్చే వాహనాలకు మరింత వేగవంతమైన ప్రత్యామ్నాయ మార్గం అందుబాటులోకి రానుంది. ముఖ్యంగా కరకట్ట రోడ్డుపై పెరుగుతున్న ట్రాఫిక్‌ ఒత్తిడిని తగ్గించడంతోపాటు రాజధాని అంతర్గత రవాణాకు ఈ కారిడార్‌ కీలకంగా మారనుంది.

34 రహదారులు.. 350 కిలోమీటర్ల గ్రిడ్‌

అమరావతి రహదారుల అభివృద్ధి సాధారణ రోడ్ల నిర్మాణం తరహాలో కాకుండా.. భవిష్యత్‌ నగర అవసరాలను దృష్టిలో పెట్టుకుని గ్రిడ్‌ తరహాలో జరుగుతోంది. రాజధానిలో ఉత్తర–దక్షిణ, తూర్పు–పడమర దిశల్లో రహదారులను అనుసంధానించేలా ఈ వ్యవస్థను రూపొందిస్తున్నారు. ఎన్‌-1 నుంచి ఎన్‌-17 వరకు ఉన్న ప్రధాన రహదారులను ఇ-సిరీస్‌ రహదారులు పరస్పరం అనుసంధానించనున్నాయి... ఇ-సిరీస్‌, ఎన్‌-సిరీస్‌ రోడ్లలో 34 ప్రధాన రహదారులు నిర్మాణంలో ఉన్నాయి. వీటి మొత్తం పొడవు సుమారు 350 కిలోమీటర్లు. రాజధాని విస్తరించే కొద్దీ పెరిగే ట్రాఫిక్‌ను తట్టుకునేలా ఈ రహదారుల నెట్‌వర్క్‌ను ముందుగానే సిద్ధం చేస్తున్నారు.

అనవసరమైన మలుపులు, ట్రాఫిక్‌ రద్దీ లేకుండా రాజధానిలోని వివిధ ప్రాంతాల మధ్య వేగంగా ప్రయాణించేలా రహదారుల అమరికను రూపొందించడం ఈ గ్రిడ్‌ వ్యవస్థ ప్రత్యేకత. భవిష్యత్‌లో పరిపాలనా కేంద్రాలు, వాణిజ్య ప్రాంతాలు, నివాస ప్రాంతాలు, విద్యా సంస్థలు, ఆసుపత్రులు, ఇతర కీలక మౌలిక వసతులు అభివృద్ధి చెందినప్పుడు ఈ రోడ్ల నెట్‌వర్క్‌ వాటన్నింటినీ అనుసంధానించనుంది.

రూ.1,519 కోట్లతో ఇ-3 కారిడార్‌

దొండపాడు వద్ద ప్రారంభమయ్యే ఇ-3 సీడ్‌ యాక్సెస్‌ రోడ్డు.. రాయపూడి, వెంకటపాలెం, పెనుమాక, ఉండవల్లి, తాడేపల్లి మీదుగా సాగి మణిపాల్‌ హాస్పిటల్స్‌ సమీపంలో జాతీయ రహదారి-16ను కలుపుతుంది...మొత్తం 21.77 కిలోమీటర్ల పొడవైన ఈ కారిడార్‌ నిర్మాణానికి రూ.1,519 కోట్ల వ్యయం చేస్తున్నారు. 60 మీటర్ల వెడల్పుతో నిర్మిస్తున్న ఈ రహదారిని మూడు దశల్లో అభివృద్ధి చేస్తున్నారు. ఇందులో 9 లేన్ల ప్రధాన రహదారితోపాటు ప్రత్యేక బీఆర్‌టీఎస్‌ కారిడార్‌, సర్వీసు రోడ్లు ఏర్పాటు చేస్తున్నారు.

ఇది కేవలం వాహనాల రాకపోకల కోసం నిర్మిస్తున్న రహదారి మాత్రమే కాదు. భవిష్యత్‌ నగరానికి అవసరమైన మౌలిక వసతులన్నింటినీ ఒకేసారి అందుబాటులోకి తీసుకురావాలనే ఉద్దేశంతో పనులు జరుగుతున్నాయి. డ్రైనేజీ, మంచినీటి పైప్‌లైన్లు, గ్యాస్‌, విద్యుత్‌ నెట్‌వర్క్‌లకు అవసరమైన ఏర్పాట్లను కూడా రహదారి నిర్మాణంతోపాటే చేపడుతున్నారు.

సైకిళ్లకు.. పాదచారులకు ప్రత్యేక మార్గాలు

ఆధునిక నగర రహదారికి ఉండాల్సిన అన్ని అంశాలను ఇ-3లో పొందుపరుస్తున్నారు. సైకిల్‌ ట్రాక్‌లు, ఫుట్‌పాత్‌లు, గ్రీన్‌బెల్ట్‌లు ఏర్పాటు చేయడం ద్వారా కేవలం కార్లు, బస్సులు, ఇతర వాహనాలకే కాకుండా పాదచారులు, సైక్లిస్టులకు కూడా ప్రాధాన్యం ఇస్తున్నారు...భవిష్యత్‌లో అమరావతి నగరం విస్తరించినప్పుడు పెరిగే వాహనాల సంఖ్యను దృష్టిలో పెట్టుకుని రహదారి సామర్థ్యాన్ని రూపొందిస్తున్నారు. ప్రజా రవాణాకు ప్రత్యేక కారిడార్‌ ఉండటం వల్ల భవిష్యత్‌లో బస్సుల రాకపోకలు మరింత సమర్థవంతంగా నిర్వహించే అవకాశం ఉంటుంది.

బకింగ్‌హామ్‌ కెనాల్‌పై ఉక్కు వంతెన

ఇ-3 సీడ్‌ యాక్సెస్‌ రోడ్డుకు మరో కీలక అనుసంధానం బకింగ్‌హామ్‌ కెనాల్‌పై నిర్మించిన స్టీల్‌ బ్రిడ్జి. విజయవాడ–మంగళగిరి హైవే నుంచి ఇ-3 రోడ్డుకు నేరుగా చేరుకునేలా ఈ వంతెనను నిర్మించారు...రూ.82 కోట్ల వ్యయంతో 478 మీటర్ల పొడవున నాలుగు వరుసలుగా ఈ స్టీల్‌ బ్రిడ్జిని నిర్మించారు. వంతెన అందుబాటులోకి రావడంతో విజయవాడ వైపు నుంచి అమరావతికి వచ్చే వాహనాలకు మరో వేగవంతమైన మార్గం ఏర్పడుతుంది...ఇప్పటివరకు కరకట్ట రోడ్డుపై ఆధారపడే వాహనాల్లో కొంత భాగం ఈ కొత్త మార్గానికి మళ్లే అవకాశం ఉంది. ఫలితంగా కరకట్టపై ట్రాఫిక్‌ ఒత్తిడి తగ్గడమే కాకుండా.. అమరావతి వైపు వెళ్లే వాహనాలకు ప్రయాణ సమయం కూడా తగ్గే అవకాశం ఉంటుంది.

రాజధాని నిర్మాణానికి రవాణా వెన్నెముక

ఏ నగరం అభివృద్ధి చెందాలన్నా ముందుగా బలమైన రవాణా వ్యవస్థ అవసరం. అమరావతి విషయంలో ప్రభుత్వం ఇదే అంశానికి అత్యధిక ప్రాధాన్యం ఇస్తోంది. పరిపాలనా రాజధాని అవసరాలకు అనుగుణంగా రహదారులు, వంతెనలు, డ్రైనేజీ, తాగునీరు, విద్యుత్‌, ఇతర మౌలిక వసతులను సమాంతరంగా అభివృద్ధి చేసే ప్రయత్నం జరుగుతోంది...ఇ-3 సీడ్‌ యాక్సెస్‌ రోడ్డు ఈ మొత్తం వ్యవస్థలో కీలక లింక్‌గా నిలవనుంది. ఒకవైపు జాతీయ రహదారి-16ను, మరోవైపు అమరావతి అంతర్గత రహదారులను అనుసంధానించడంతో రాజధానికి ప్రధాన ప్రవేశ మార్గాల్లో ఇది ఒకటిగా మారనుంది.

రాజధాని నిర్మాణం వేగవంతం అవుతున్న కొద్దీ ఉద్యోగులు, ప్రజలు, సందర్శకులు, నిర్మాణ సంస్థలు, వాణిజ్య కార్యకలాపాల కోసం వచ్చే వాహనాల సంఖ్య పెరగనుంది. ఆ అవసరాలకు ముందుగానే రహదారుల సామర్థ్యాన్ని పెంచడం ద్వారా భవిష్యత్‌ ట్రాఫిక్‌ సమస్యలకు పరిష్కారం చూపే ప్రయత్నం చేస్తున్నారు.

రాయపూడిలో ఎమ్మెల్యేలు, ఎమ్మెల్సీల గృహ సముదాయాలు

ముఖ్యమంత్రి చంద్రబాబు నాయుడు గురువారం పర్యటనలో రహదారుల ప్రారంభంతోపాటు రాజధాని నిర్మాణంలోని మరో కీలక అంశాన్ని కూడా పరిశీలించనున్నారు. ఇ-3 సీడ్‌ యాక్సెస్‌ రోడ్డు మీదుగా రాయపూడికి చేరుకుని అక్కడ నిర్మిస్తున్న ఎమ్మెల్యే, ఎమ్మెల్సీల గృహ సముదాయాలను పరిశీలించనున్నారు...రాజధానిలో పరిపాలనా వ్యవస్థ పునరుద్ధరణతోపాటు ప్రజాప్రతినిధులకు అవసరమైన వసతుల కల్పన కూడా వేగంగా కొనసాగుతోంది. అసెంబ్లీ, సచివాలయం, ఇతర ప్రభుత్వ కార్యాలయాల చుట్టూ అవసరమైన రవాణా, నివాస, మౌలిక సదుపాయాలను సిద్ధం చేయడం ద్వారా అమరావతిని పూర్తిస్థాయి పరిపాలనా నగరంగా తీర్చిదిద్దే దిశగా ప్రభుత్వం అడుగులు వేస్తోంది.

సీఎం పర్యటన ఇలా..

ముఖ్యమంత్రి చంద్రబాబు ఉదయం 10.20 గంటలకు క్యాంపు కార్యాలయం నుంచి బయలుదేరి 10.30 గంటలకు ఉండవల్లి స్టీల్‌ బ్రిడ్జి వద్దకు చేరుకుంటారు. 10.35 గంటలకు శిలాఫలకాన్ని ఆవిష్కరిస్తారు. అనంతరం 10.45 గంటలకు ప్రజలను ఉద్దేశించి ప్రసంగిస్తారు.

తర్వాత ఇ-3 సీడ్‌ యాక్సెస్‌ రోడ్డు మీదుగా ప్రయాణిస్తూ రాయపూడికి చేరుకుంటారు. అక్కడ ఎమ్మెల్యేలు, ఎమ్మెల్సీల గృహ సముదాయాలను పరిశీలిస్తారు. అనంతరం మధ్యాహ్నం 1.25 గంటలకు సచివాలయానికి చేరుకుంటారు. సాయంత్రం 6.30 గంటలకు నివాసానికి చేరుకుంటారు.

అమరావతి వేగానికి మరో సంకేతం

ఇ-3 సీడ్‌ యాక్సెస్‌ రోడ్డు, బకింగ్‌హామ్‌ కెనాల్‌ స్టీల్‌ బ్రిడ్జి ప్రారంభం కేవలం రెండు మౌలిక వసతుల ప్రారంభ కార్యక్రమాలుగా చూడలేం. రాజధాని నిర్మాణం ఏ దిశగా సాగుతోంది.. భవిష్యత్‌ అమరావతి ఎలా ఉండబోతోందన్న దానికి ఇవి ఒక సంకేతంగా నిలవనున్నాయి...విస్తృత రహదారి నెట్‌వర్క్‌, వేగవంతమైన కనెక్టివిటీ, ప్రజా రవాణాకు ప్రత్యేక మార్గాలు, పాదచారులు–సైక్లిస్టులకు వసతులు, భవిష్యత్‌ ట్రాఫిక్‌కు అనుగుణమైన మౌలిక వసతులు.. ఇవన్నీ ఒకే ప్రణాళికలో భాగంగా అమలు చేస్తుండటంతో అమరావతి రవాణా వ్యవస్థకు కొత్త రూపు వస్తోంది.

రాజధానిలోకి రాకపోకలకు వేగం.. నగర విస్తరణకు దిశ.. భవిష్యత్‌ ట్రాఫిక్‌కు ముందస్తు ప్రణాళిక.. ఇ-3 సీడ్‌ యాక్సెస్‌ రోడ్డు రూపంలో అమరావతికి మరో కీలక అడుగు పడుతోన్న నేపథ్యంలో ఇది రాజధాని అభివృద్ధి కి ఎంతగానో ఉపయోగపడుతుందని భావిస్తోంది కూటమి సర్కార్.