Nirmal: దస్తూరాబాద్ మండలంలో ముమ్మరంగా ఓటర్ జాబితా పరిశీలన గ్రామసభలు!

Nirmal: దస్తూరాబాద్ మండలంలో ఓటర్ల జాబితా ప్రత్యేక సవరణ కార్యక్రమం వేగంగా సాగుతోంది. ఎన్నికల కమిషన్ ఆదేశాల మేరకు, జిల్లా కలెక్టర్ ఆదేశానుసారం మండలంలోని అన్ని గ్రామ పంచాయతీల్లో డ్రాఫ్ట్ ఓటర్ జాబితాపై ప్రత్యేక గ్రామసభలు నిర్వహించారు.

మండలంలోని మొత్తం 21 పోలింగ్ బూత్‌లకు సంబంధించి అందిన 3,348 నోటీసుల ఆధారంగా ఈ పరిశీలన ప్రక్రియ చేపట్టారు. ఇందులో నో లింకేజీకి (No Linkage) సంబంధించి 372 నోటీసులు, నో డిస్క్రిపెన్సీస్‌కు (No Discrepancies) సంబంధించి 2,976 నోటీసులపై అధికారులు క్షుణ్ణంగా సమీక్ష జరిపారు.

గ్రామసభల్లో బూత్ లెవల్ అధికారులు (BLOలు) ఓటర్ల జాబితాను చదివి వినిపించారు. జాబితాలో ఉన్న మరణించిన వారి పేర్లు, ఇతర ప్రాంతాలకు శాశ్వతంగా వలస వెళ్లిన వారు, ప్రస్తుతం గ్రామంలో నివసించని వారి వివరాలను గుర్తించి తొలగింపు ప్రక్రియను పరిశీలించారు.

అదేవిధంగా కొత్తగా ఓటు హక్కు కోసం అర్హులైన వారు ఫారం-6, ఓట్ల తొలగింపు కోసం ఫారం-7, మరియు తప్పుల సవరణల కోసం ఫారం-8 దరఖాస్తులను ప్రజల నుండి స్వీకరించారు. ఓటర్ల జాబితా పారదర్శకత కోసం ప్రజలంతా భాగస్వాములు కావాలని అధికారులు, ఈ సందర్భంగా కోరారు.